မၢၵ်ႇတႅၵ်ႇၼႂ်းဝၢင်းလုမ်း ၽူႈၵွၼ်းၸႄႈတွၼ်ႈၵျွၵ်ႉမႄး လုၵ်ႈၼိုင်ႈ ပလိၵ်ႈ/ သိုၵ်းမၢၼ်ႈ ထႅမ်ဢဵၼ်ႁႅင်းသိုၵ်း ဢဝ်ႁူမ်ႇလူမ်ႈ တိူဝ်းၼမ်ထႅင်ႈ။
မိူဝ်ႈဝႃး ဝၼ်းတီႈ 5/10/2022 ယၢမ်းၵၢင်ၶမ်ႈမွၵ်ႈ 9 မူင်း မၢၵ်ႇတႅၵ်ႇ ၼႂ်းဝၢင်းလုမ်းၽူႈၵွၼ်းၸႄႈတွၼ်ႈ ဢၼ်ပၵ်းဝႆႉ ၼႂ်း ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ လုၵ်ႈ ၼိုင်ႈ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆ ဢမ်ႇမီး ဝၢႆးမၢၵ်ႇတႅၵ်ႇယဝ်ႉ ပလိၵ်ႈသိုၵ်းမၢၼ်ႈ ယိုင်ႈၶႅၼ်းထႅမ်ႁႅင်းသိုၵ်း ဢဝ်ႁူမ်ႇလူမ်ႈၼႅၼ်ႈၼႃထႅင်ႈ။
ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇတႅၵ်ႇ မိူဝ်ႈဝႃး တီႈၼႂ်းလုမ်း ၽူႈၵွၼ်းၸႄႈတွၼ်ႈ လုၵ်ႈၼိုင်ႈ။ ဝၢႆးမၢၵ်ႇတႅၵ်ႇယဝ်ႉ ၾႆးၾႃႉၵေႃႈမွတ်ႇ။ ယဝ်ႉၵေႃႈ ပလိၵ်ႈသိုၵ်းမၢၼ်ႈ ၸိူဝ်းၼႆႉ ယိုင်ႈၶႅၼ်းဢဝ်ႁူမ်ႇလူမ်ႈထႅင်ႈ တင်းၼမ်”- ဝႃႈၼႆ။
မိူဝ်ႈၼႆႉ ဝၼ်းတီႈ 6 ၸွမ်းႁိမ်းၵၢတ်ႇလူင်လႄႈ ၼႃႈပၢၼ်ႇ(ယေးငိုၼ်း) ၸိူဝ်းၼႆႉ ပလိၵ်ႈသိုၵ်းမၢၼ်ႈ ဢဝ်ဢဵၼ်ႁႅင်းတင်းၼမ် သေ ပႂ်ႉၵူတ်ႇထတ်းၵူၼ်းၵႂႃႇမႃးႁၢဝ်ႈႁႅင်းထႅင်ႈ။
“မိူဝ်ႈၼႆႉ ၸွမ်းၵၢတ်ႇလူင်၊ ၼႃႈပၢၼ်ႇ ၸိူဝ်းၼႆႉ ၶဝ်ယိုင်ႈၶႅၼ်းၵူတ်ႇထတ်းၵူၼ်း ၵႂႃႇမႃးႁၢဝ်ႈႁႅင်း လိူဝ်ၵူႈပွၵ်ႈ။ ဢိင်ၼိူဝ် လွင်ႈ မၢၵ်ႇတႅၵ်ႇ မိူဝ်ႈဝႃးၼၼ်ႉသေ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။ ၵူၺ်းၵႃႈ မၢၼ်ႇတီႈလုမ်းၶဝ်ၼၼ်ႉတႄႉ မီးလွင်ႈလူႉၵွႆတႅၵ်ႇၵမ်ႈၽွင်ႈ”- ၵူၼ်းပိုၼ်ႉတီႈ ဝဵင်းၵျွၵ်ႉမႄး သိုပ်ႇလၢတ်ႈၼႄ ၼင်ႇၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းၸမ် 2 ပီၼႆႉ လုမ်းလူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ် ၼႂ်းၸႄႈမိူင်းတႆး ၵႆႉမီး လွင်ႈမၢၵ်ႇတႅၵ်ႇမႃး လၢႆတီႈယဝ်ႉ။
မိူဝ်ႈဝၼ်းတီႈ 19/9/2022 ယၢမ်းဝၢႆးဝၼ်းမွၵ်ႈ 3:00 မူင်း မၢၵ်ႇတႅၵ်ႇတီႈၼႂ်းဝၢင်းလုမ်း ၽူႈၵွၼ်းၸႄႈတွၼ်ႈ 2 လုၵ်ႈ ဢၼ် ပၵ်း ဝႆႉတီႈဝၢၼ်ႈဝဵင်းမႂ်ႇ ၾၢႆႇဢွၵ်ႇဝဵင်း ယၢၼ်ဝဵင်း 4 လၵ်း။ ထိုင်မႃး ယၢမ်းၵၢင်ၶမ်ႈ 8:36 မူင်းသမ်ႉ မၢၵ်ႇတႅၵ်ႇထႅင်ႈ တီႈလုမ်း ၽူႈ ၵွၼ်းၸႄႈဝဵင်း ဢၼ်ပၵ်းဝႆႉ ၼႂ်းၵၢင်ဝဵင်းမိူင်းမိတ်ႈၼၼ်ႉ ထႅင်ႈ 1 လုၵ်ႈ တင်းမူတ်းႁူမ်ႈၵၼ် တႅၵ်ႇ 3 လုၵ်ႈ ၼႂ်းဝဵင်းမိူင်း မိတ်ႈ ၸိုင်ႈတႆးပွတ်းႁွင်ႇ။
