ၼႂ်းဝူင်ႈဝၢင်ႈၼႆႉ ၽူႈလၵ်ႉၵူၼ်းၸူၼ်လိူင်ႇၼမ် ၵူၼ်းမိူင်းဝဵင်းၵေးသီးလႄႈ ႁူမ်ႇလူမ်ႈဝၢၼ်ႈဢိူင်ႇႁူမ်ႈပၼ် တီႉၺွပ်းၵူၼ်းလၵ်ႉရူတ်ႉၶိူင်ႈတီႈဝဵင်းၵေးသီး တီႉၺွပ်းလႆႈတင်းၼမ်။
ဝၼ်းတီႈ 2/10/2022 ၼႆႉ ၵူၼ်းမိူင်းတီႉလႆႈ ၵူၼ်းလၵ်ႉရူတ်ႉၶိူင်ႈၼႂ်းၵၢတ်ႇလူင်ၵေးသီး လႄႈ ရူတ်ႉၶိူင်ႈၸုမ်းၾၢႆႇပၢႆးယူႇလီ ၼႂ်းႁူင်းယႃၵေးသီး။
ၵူၼ်းၵေးသီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၽူႈလၵ်ႉၸိူဝ်းၼႆႉ ပဵၼ်ၵူၼ်းၼုမ်ႇလွၼ်ႉလွၼ်ႉ။ ၶဝ်ႉလုၵ်ႉတၢင်းၼမ်ႉသၼ်ႇသေလူင်းမႃးၵေးသီးလႆႈ 2-3 ဝၼ်းယဝ်ႉ၊ ဝၼ်းတီႈ 2 ၼၼ်ႉၶဝ်လၵ်ႉရူတ်ႉၶိူင်ႈၼႂ်းၵၢတ်ႇလႄႈ ၼႂ်းဝၢင်းႁူင်းယႃ။ ၵူၼ်းမိူင်းလႄႈၽူႈမီးပုၼ်ႈၽွၼ်းၵႂႃႇတီႉၺွပ်းဝႅတ်ႉလွမ်ႉလႆႈၶဝ်တီႈတၢင်းဢွၵ်ႇဝဵင်း ၶဝ်ဢၢၼ်းၵႂႃႇမိူင်းၵိုင်ၼၼ်ႉၶႃႈၼေႈ ”- ဝႃႈၼႆ။
ၵူၼ်းလၵ်ႉရူတ်ႉၶိူင်ႈၸိူဝ်းၼႆႉဢဵၼ်ႁႅင်းမီး 6 ၵေႃႉ။ ပဵၼ်ၵူၼ်းၼုမ်ႇလုၵ်ႉတၢင်းၼမ်ႉသၼ်ႇမိူင်းတႆးပွတ်းႁွင်ႇပုၼ်ႉမႃး ၊ ယၢမ်းလဵဝ်ဢဝ်ၶဝ်ႈမွပ်ႈပၼ်ၼႂ်းမိုဝ်းပလိၵ်ႈယဝ်ႉ ဝႃႈၼႆ။
“ရူတ်ႉၶိူင်ႈဢၼ်ၶဝ်ႈလၵ်ႉမႃးၼႂ်းၵၢတ်ႇၼၼ်ႉၶဝ်ဢဝ်မူၵ်းဝႆႉတၢင်းၵႂႃႇၵွင်းလၢင်းၼႆဝႃႇ။ ၽွင်းၶဝ်ဢွၵ်ႇမႃးၶိုၼ်းၼၼ်ႉ မႃးၺႃးလၢၼ်ႇ/ၵဵၵ်ႉ SSPP သေ သိုၵ်းတီႈၼၼ်ႈသမ်ႉႁႄႉထဵတ်ႈထၢမ်ၶဝ် လႄႈ ၵူၼ်းမိူင်းၸိူဝ်းလမ်းမႃးၵေႃႈမႃးတီႉဢဝ်ၶဝ်ၵႂႃႇသေယဝ်ႉၶႃႈၼႃႇ။ ရူတ်ႉၶိူင်ႈၵေႃႈ ၶိုၼ်းလႆႈတင်း 2 လမ်းယဝ်ႉၶႃႈ ဝၼ်းၼၼ်ႉ ”ဝႃႈၼႆ။
တီႈဝဵင်းၵေးသီးၼႆႉ ပူၼ်ႉမႃး 2 ဝူင်ႈၼၼ်ႉၵေႃႈ မီးၵူၼ်းမႃးလႅၼ်ဝႃႈ တေသိုဝ်ႉၵႃးၼႆသေ ႁေႃႈပၢႆႈ တေႃႇထိုင်ဝၼ်းမိူဝ်ႈၼႆႉ ဢမ်ႇတီႉၺွပ်းလႆႈၶိုၼ်း ။
ၸူဝ်ႈသိုၵ်းမၢၼ်ႈယိုတ်းမိူင်းမႃးၼႆႉ ဢမ်ႇဝႃႈတီႈဝဵင်းၵေးသီးၵူၺ်း ၼႂ်းၸိုင်ႈတႆးလၢႆလၢႆၸႄႈဝဵင်း ၽူႈလၵ်ႉၵူၼ်းၸူၼ်လိူင်ႇၼမ်၊ ၵူၼ်းၵႃႉၶၢႆ သူႇသမ်းယႃႈမဝ်းၵမ်လိူင်ႇၼမ် ၵူၼ်းမိူင်းလႆႈပိုင်ႈဢိင်တူဝ်ၵဝ်ႇ ၵႅတ်ႇၶႄႁႄႉၵင်ႈၶူဝ်းၶွင်ႁိူၼ်းယေး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ