ၵူၼ်းပၢႆႈၽေးသိုၵ်း ဢၼ်ပဵၼ်ၽေးၵိုင်ႉၵၢင်ႉ ရူတ်ႉၶိူင်ႈၽႃႇၵၼ် တင်းၵူၼ်းဝၢၼ်ႈ မိူဝ်ႈႁၢၼ်လိူၼ်ပူၼ်ႉမႃးၼၼ်ႉ ယၢမ်းလဵဝ် လူဝ်ႇတၢင်း ၵႃႈၽႃႇတတ်း ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 28/9/2022 ၼၼ်ႉ ၸၢႆးဢၢႆႈႁူမ်ႈ ဢႃယု 42 ပီလႄႈ ၼၢင်းၸိင်ႇ ဢႃယု 39 ပီ သွၼ်ႉရူတ်ႉၶိူင်ႈၵၼ် လုၵ်ႉမၢၼ်ႈပိုၼ်ႉမႃး တႃႇမိူဝ်းတေႃႉၶဝ်ႈၼမ်ႉတၢင်းၵိၼ် တီႈဝၢၼ်ႈၼႆသေ လႆႈပဵၼ်ၽေးၵိုင်ႉၵၢင်ႉ ရူတ်ႉတမ်ၽႃႇၵၼ် တင်း ၵူၼ်းဝၢၼ်ႈႁူၺ်ႈ တီႈႁိမ်းဝၢၼ်ႈၵုၼ်ၵွၵ်ႇ ၼႂ်းၵႄႈသဵၼ်ႈတၢင်းလူင် ၵျွၵ်ႉမႄး – မိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်း ႁွင်ႇ ယၢမ်းလဵဝ် သူင်ႇယူတ်းယႃတူဝ်ဝႆႉ တီႈႁူင်းယႃလူင်လႃႈသဵဝ်ႈလႄႈ လူဝ်ႇတၢင်းၸွႆႈထႅမ် ငိုၼ်းတွင်း တႃႇၵႃႈယူတ်းယႃ ႁၢဝ်ႈႁႅင်း။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈၽေး သိုၵ်းႁဝ်းၶႃႈ သွင်ၵေႃႉၼႆႉလႆႈသူင်ႇယူတ်းယႃတူဝ် ဝႆႉတီႈႁူင်းယႃလူင်လႃႈသဵဝ်ႈ။ ၵေႃႉပဵၼ် ၼၢင်းယိင်း တႄႉ လူဝ်ႇၽႃႇတတ်း ယွၼ်ႉမၢတ်ႇၸဵပ်း တီႈသူပ်းလႄႈ တီႈၶဵဝ်ႈ၊ တေသဵင်ႈငိုၼ်း ၵႃႈၽႃႇတတ်း 8 သႅၼ်ပျႃး။ ယၢမ်းလဵဝ် ငိုၼ်းပႆႇတဵမ်ထူၼ်ႈ တႃႇၵႃႈၽႃႇတတ်း လူဝ်ႇ တၢင်းၸွႆႈထႅမ်ႁႅင်းၶႃႈဢေႃႈ။ ၵေႃႉၵူၼ်းၸၢႆးတႄႉ ပႆႇႁူႉဝႃႈ တေသဵင်ႈၵႃႈႁိုဝ် ဢၼ်ဝႃႈၼၼ်ႉ။ လူဝ်ႇတင်းၸွႆႈထႅမ် တႃႇ သွင် ၵေႃႉယဝ်ႉၶႃႈ”- ဝႃႈၼႆ။
ၵေႃႉၵူၼ်းၸၢႆး ၸၢႆးဢၢႆႈႁူမ်ႈ ဢႃယု 42 ပီၼၼ်ႉ မၼ်းၸၢႆး လႆႈတိူဝ်ႉမၢတ်ႇၸဵပ်း တီႈၼႃႈ၊ သူပ်း၊ လုပ်ႇၶႅၼ်ၽၢႆႇၶႂႃႁၵ်း ။ ၼၢင်းၸိင်ႇသမ်ႉ လႆႈတိူဝ်ႉမၢတ်ႇၸဵပ်း တီႈသူပ်း၊ ၶဵဝ်ႈလႄႈ ၸွမ်းတူဝ် ၸိူဝ်းၼႆႉ။
ၸၢႆးဢၢႆႈႁူမ်ႈတင်း ၼၢင်းၸိင်ႇၼႆႉ ပဵၼ်ၵူၼ်း မၢၼ်ႈပွၵ်း ပၢႆႈၽေးသိုၵ်းမႃးယူႇတီႈမိူင်းငေႃႉ ၸဵမ်မိူဝ်ႈပီၵၢႆ 2021 ယွၼ်ႉ SSPP လႄႈ RCSS ယိုဝ်းၵၼ်။
