သိုၵ်းမၢၼ်ႈတင်း သိုၵ်းၶၢင် KIA, PDF ပဵၼ်ပၢင်တိုၵ်းၵၼ်ႁၢဝ်ႈႁႅင်း တၢင်းပၢင်ႁႆး ႁဵတ်းႁႂ်ႈၵူၼ်းပိုၼ်ႉတီႈ 300 ပၢႆ ဢွၼ်ၵၼ်ပၢႆႈၶဝ်ႈဝဵင်း ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်။
မိူဝ်ႈဝႃး ဝၼ်းတီႈ 28/9/2022 ယၢမ်းႁူဝ်ၶမ်ႈ ၵူၼ်းဝၢၼ်ႈၵုင်းၵယႃး ႁူဝ်ၵူၼ်း 336 ၵေႃႉ ဢွၼ်ၵၼ်ပၢႆႈၽေးသိုၵ်း မႃး သွၼ်ႈယူႇဝႆႉတီႈ ဝတ်ႉပုပ်ႉပႃႇရူင်ႇ ပွၵ်ႉ 8 ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၵမ်ႈၼမ် ပဵၼ်လုၵ်ႈ ဢွၼ်ႇ၊ ၼၢင်းယိင်းလႄႈ ၵူၼ်းထဝ်ႈ ယၢမ်းလဵဝ် လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ်။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၵူၼ်း ဝၢၼ်ႈၵုင်းၵယႃးၶႃႈဢေႃႈ ပၢႆႈမႃး။ ႁူဝ် ၵူၼ်းတေမီး 336 ၵေႃႉ။ ၼႂ်းၼၼ်ႉ ၽူႈယိင်း 170 ပၢႆ ၽူႈၸၢႆး 100 ပၢႆ။ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်း ၵိၼ်ၶႃႈဢေႃႈ ၵမ်ႈၼမ် ပဵၼ်ပီႈၼွင်ႉၸၢဝ်းတဢၢင်း ၵူၼ်းထဝ်ႈ၊ လုၵ်ႈဢွၼ်ႇလႄႈ ၼၢင်းယိင်း။ သင်ဝႃႈ သိုၵ်းမၢၼ်ႈ ဢမ်ႇ ထႅမ်ႁႅင်းသိုၵ်း သွၵ်ႈတဝ်ၼႂ်းထိူၼ်ႇထႅင်ႈၸိုင် ပၢင်တိုၵ်းတႄႉ တေဢမ်ႇပဵၼ်။ ငိၼ်းဝႃႈ သိုၵ်းမၢၼ်ႈထွႆယဝ်ႉၼႆၶႃႈ။ ဝၢၼ်ႈၵုင်း ၵယႃးၼႆႉ တေယၢၼ်ၵႆၵၼ် တင်းဝဵင်းမွၵ်ႈ 12 လၵ်း” – ဝႃႈၼႆ။
မိူဝ်ႈဝႃး ဝၼ်းတီႈ 28/9/2022 ယၢမ်းဝၢႆးဝၼ်း ၶွင်ႇသီႇသိုၵ်းမၢၼ်ႈ ယိုတ်းမိူင်းတပ်ႉၶမယ 324 တင်း သိုၵ်းၶၢင် KIA လႄႈ PDF ယိုဝ်းၵၼ် တၢင်းပၢင်ႁႆး ႁၢဝ်ႈႁႅင်း။ သိုၵ်းမၢၼ်ႈ ယိုဝ်းၵွင်ႈလူင်ၸူး တၢင်းပွတ်းတွၼ်ႈပုၼ်ႉ ဢမ်ႇယွမ်း 10 လုၵ်ႈ။
မိူဝ်ႈဝၼ်းတီႈ 27 ၼၼ်ႉၵေႃႈ သိုၵ်းမၢၼ်ႈၼႆႉၵူၺ်း ၼင်ႇၵဝ်ႇ လုၵ်ႉတီႈတပ်ႉၶဝ်ၼႆႉသေ ယိုဝ်းၵွင်ႈလူင် ၵႂႃႇတၢင်းပၢင်ႁႆး ဢမ်ႇ ယွမ်း 7-8 လုၵ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ