ၵူၼ်းပၢႆႈၽေးသိုၵ်း ဢၼ်မႃးမီးတီႈ မိူင်းငေႃႉ သွင်ၵေႃႉ သွၼ်ႉရူတ်ႉၶိူင်ႈ ၸွမ်းၵၼ် ပဵၼ်ၽေးၵိုင်ႉၵၢင်ႉ ၽႃႇတမ်ၵၼ်တင်းၵူၼ်းဝၢၼ်ႈသေ မၢတ်ႇၸဵပ်းႁႅင်း၊ ထိုင်တီႈပေႃးလႆႈ သူင်ႇယူတ်းယႃတူဝ် တီႈဝဵင်းလႃႈသဵဝ်ႈ။

မိူဝ်ႈဝႃး ဝၼ်းတီႈ 28/9/2022 ယၢမ်းၵၢင်ၼႂ် ၸၢႆးဢၢႆႈႁူမ်ႈ ဢႃယု 42 ပီလႄႈ ၼၢင်းၸိင်ႇ ဢႃယု 39 ပီ သွၼ်ႉရူတ်ႉၶိူင်ႈၵၼ် လုၵ်ႉမၢၼ်ႈပိုၼ်ႉမႃး တႃႇမိူဝ်းတေႃႉၶဝ်ႈၼမ်ႉတၢင်းၵိၼ် တီႈဝၢၼ်ႈ၊ လႆႈပဵၼ် ၽေး ၵိုင်ႉၵၢင်ႉ တမ်ၽႃႇၵၼ် တင်းၵူၼ်းဝၢၼ်ႈ တီႈႁိမ်းဝၢၼ်ႈၵုၼ်ၵွၵ်ႇ ၼႂ်းၵႄႈသဵၼ်ႈတၢင်းလူင် ၵျွၵ်ႉမႄး – မိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်း ႁွင်ႇ ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸၢႆးဢၢႆႈႁူမ်ႈတင်း ၼၢင်းၸိင်ႇ ၶႃသွင်ၵေႃႉ သွၼ်ႉမႃးၸွမ်းၵၼ် တႃႇမႃးဢဝ်ၶဝ်ႈၼမ်ႉတၢင်းၵိၼ် တီႈၵေႃလိၵ်ႈလၢႆး မိူင်းငေႃႉသေ မႃးပဵၼ်ၽေးၵိုင်ႉၵၢင်ႉ ရူတ်ႉၽႃႇၵၼ် တင်းၵူၼ်းဝၢၼ်ႈ။ ၸၢႆးဢၢႆႈႁူမ်ႈတႄႉ လႆႈတိူဝ်ႉမၢတ်ႇၸဵပ်း တီႈၵွၵ်းႁူဝ်ႁႅင်းဝႆႉလႄႈ လႆႈသူင်ႇယူတ်းယႃတူဝ် တီႈႁူင်းယႃ လႃႈ သဵဝ်ႈ မိူဝ်ႈဝႃး ၵၢင်ၶမ်ႈ။ ၼၢင်းၸိင်ႇတႄႉ လႆႈတိူဝ်ႉမၢတ်ႇၸဵပ်း ဢမ်ႇပေႃးထိုင်တီႈလႆႈမႆႈၸႂ်လႄႈ ယူတ်းယႃတူဝ် ဝႆႉတီႈၵျွၵ်ႉ မႄးၼႆႉ”- ဝႃႈၼႆ။

ရူတ်ႉၶိူင်ႈ တင်းသွင်ၾၢႆႇ ဢၼ်တမ်ၽႃႇၵၼ်ၼႆႉ ၾၢႆႇၼိုင်ႈ ပဵၼ်ၵူၼ်းပၢႆႈၽေးသိုၵ်း ထႅင်ႈၾၢႆႇၼိုင်ႈ ပဵၼ်ၵူၼ်းဝၢၼ်ႈႁူၺ်ႈ။ လွင်ႈၼႆႉ ၽႂ်ၽိတ်းၽႂ်ထုၵ်ႇၼႆၵေႃႈ ပႆႇႁူႉ တိုၵ်ႉၼႄးၵၼ်ဝႃႈ ၾၢႆႇၼႆႉၽိတ်း၊ ၾၢႆႇပုၼ်ႉၽိတ်းယူႇ ၼႆၸိူဝ်းၼႆႉယူႇ ဝႃႈၼႆ။

ၸၢႆးဢၢႆႈႁူမ်ႈတင်း ၼၢင်းၸိင်ႇၼႆႉ ပဵၼ်ၵူၼ်းၸႃတိ မၢၼ်ႈပွၵ်း (မန် ပေါက်) ပၢႆႈၽေးသိုၵ်းမႃးယူႇတီႈမိူင်းငေႃႉ ၸဵမ်မိူဝ်ႈပီၵၢႆ 2021  ယွၼ်ႉ  SSPP လႄႈ RCSS ယိုဝ်းၵၼ်  ။