ဝဵင်းမိူင်းလႃး ၼႃႈလိၼ်ၶိုၵ်ႉတွၼ်း မၢႆ 4 တေသိုပ်ႇပိၵ်ႉဢိုတ်း လွၵ်ႊတွင်ႊထႅင်ႈ ပွၵ်ႈၼႆႉ တေဢမ်ႇပၼ်ၵူၼ်းပိုၼ်ႉတီႈ ဢွၵ်ႇ ႁိူၼ်း ႁႂ်ႈၵၵ်းတူဝ်ယူႇၼႂ်းႁိူၼ်းယေးၽႂ်မၼ်း ဝႃႈၼႆ။
ပေႃးထိုင်မႃး ဝၼ်းတီႈ 1/10/2022 ၼႆႉၸိုင် တီႈဝဵင်းမိူင်းလႃး ၼႃႈလိၼ်ၶိုၵ်ႉတွၼ်း မၢႆ 4 (NDAA) ၼႂ်းၸိုင်ႈတႆး ပွတ်းဢွၵ်ႇ ၶူင်း တေသိုပ်ႇပိၵ်ႉဢိုတ်း လွၵ်ႊတွင်ႊၵႂႃႇထႅင်ႈ ၸွမ်းသဵၼ်ႈတႃႈသၢႆတၢင်းလူင် လႄႈပွၵ်ႉယွမ်ႇ၊ ႁၢမ်ႈၵူၼ်းပိုၼ်ႉတီႈ ဢွၵ်ႇႁိူၼ်း၊ ႁႂ်ႈၵၵ်းတူဝ်ယူႇၼႂ်းႁိူၼ်းယေး တႃႇႁႂ်ႈၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉလႆႈဝႃႈၼႆ ။
ၵူၼ်းဝဵင်းမိူင်းလႃး လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် တီႈမိူင်းလႃးၼႆႉ လွၵ်ႊတွင်ႊ ဝႆႉယူႇ ၵူၺ်းၵႃႈ ပဵၼ်ၶၢဝ်းဢဝ် ၶဝ်ႈဢဝ်ၼမ်ႉလႄႈ ဢွၵ်ႇဝၢၼ်ႈဢွၵ်ႇၶူင်ႇ လႆႈယူႇ ။ ပေႃးထိုင် ဝၼ်းတီႈ 1 ၼႆႉ ၵူၺ်းဢေႃႈ တေပိၵ်ႉဢိုတ်းသဵၼ်ႈတၢင်း ထႅင်ႈ။ တႄႇၼၼ်ႉၵႂႃႇတႄႉ ႁၢမ်ႈဢွၵ်ႇ ႁိူၼ်းယေးၽႂ်မၼ်း ၽူႈမီးပုၼ်ႈၽွၼ်းၶဝ် ပိုၼ်ၽၢဝ်ႇဢွၵ်ႇမႃး မိူဝ်ႈဝႃး ဝၼ်းတီႈ 28 ၼႆႉ ၶႃႈဢေႃႈ”- ဝႃႈၼႆ။
ယၢမ်းလဵဝ် ဢွင်ႈတီႈ ၵၵ်းတူဝ် တီႈသိူဝ်လိုဝ်းလႄႈ မိူင်းလႃးတႄႉ ၵူၼ်းတဵမ်သတ်ႉဝႆႉ တင်းသွင်တီႈယဝ်ႉ။
“မိူဝ်ႈလဵဝ် တီႈၵၵ်းတူဝ် သိူဝ်လိုဝ်းလႄႈ မိူင်းလႃး ၸိူဝ်းၼႆႉ တဵမ်ဝႆႉမူတ်းယဝ်ႉ။ ဢၼ်ပဵၼ်ၶူဝ်ႊဝိတ်ႉၵမ်းၼႆႉတႄႉ တီႈ မိူင်းလႃးၼႆႉ ပႆႇမီးလွင်ႈလူႉတၢႆ။ ၵူၺ်းၵႃႈ သဵၼ်ႈမၢႆၵူၼ်းၸပ်းတႄႉၵေႃႈ ပႆႇႁူႉတႅတ်ႈ တေႃး ။ တီႈၼႂ်းဝၢၼ်ႈၶႃႈၶဝ်ၼႆႉ ပဵၼ်ပဵၼ်ႁၢႆႁၢႆ ၸိူဝ်းၼႆႉ တေမီးမွၵ်ႈ 20 လင်ႁိူၼ်းၼႆႉယဝ်ႉ”- ဝႃႈၼႆ။
ယၢမ်းလဵဝ် ၸွမ်းတၢင်းလူင် ၼႂ်းဝဵင်းမိူင်းလႃး ၸိူဝ်းၼႆႉ ယဵၼ်သီႇဝႆႉမူတ်းယဝ်ႉ။ ရူတ်ႉၵႃးၵႂႃႇမႃးၵိုၼ်းမိူၼ်မိူဝ်ႈၵူႈပွၵ်ႈၼၼ်ႉတႄႉ ဢမ်ႇမီးယဝ်ႉ။ ယဝ်ႉၵေႃႈ ၵူၼ်းႁဵတ်းၵၢၼ် ၸိူဝ်းၼႆႉၵေႃႈ ႁဵတ်းတီႈလႂ် ၼွၼ်းတီႈၼၼ်ႈ တၵ်းတေလႆႈၵၵ်းတူဝ်ယူႇဝႆႉ တီႈ ၼၼ်ႈၵူၺ်း ဝႃႈၼႆ။
ၸဝ်ႈၼႃႈတီႈၾၢႆႇၽွင်းငမ်းလႄႈၾၢႆႇပၢႆးယူႇလီ မိူင်းလႃး သင်ႇပိၵ်ႉ Lockdown ဝဵင်းမိူင်းလႃးမႃး တင်ႈတႄႇ ဝၼ်းတီႈ 16/9/2022 ယၢမ်းၵၢင်ၶိုၼ်း 10:30 မူင်း ၼင်ႇႁိုဝ်တၢင်းပဵၼ်ၶူဝ်ႊဝိတ်ႉ တေဢမ်ႇၽႄႈလၢမ်းႁၢဝ်ႈႁႅင်းၼၼ်ႉ တေၵူတ်ႇ ထတ်းၵူၼ်းၼႂ်းဝဵင်းၵူႈၵေႃႉ NDAA ပိုၼ်ၽၢဝ်ႇဝႆႉၼင်ႇၼႆ။
