သိုၵ်းမၢၼ်ႈလႄႈ SSPP ပိုတ်းယိုဝ်းတိုၵ်းတေႃးၵၼ်ၼႂ်းၸႄႈဝဵင်းမိူင်းမိတ်ႈၶိူဝ်းယႂ်း ၾၢႆႇသိုၵ်းမၢၼ်ႈမၢတ်ႇၸဵပ်းလူႉတၢႆၼမ်လႄႈ ယၢမ်းလဵဝ်ႁၢမ်ႈ SSPP  ၶဝ်ႈယူႇၸမ်ၵူၼ်းမိူင်း ၼႆသေ ထႅမ်ႁႅင်းသိုၵ်းၽိုတ်ႉဢိူမ်ႈၶဝ်ႈၸူးပၢင်သဝ်း သိုၵ်းတႆးယူႇၵူႈဝၼ်း။

ၼႂ်းႁၢင်လိူၼ်သႅပ်ႊထႅမ်ႊပိူဝ်ႊ ၼႆႉ သိုၵ်းမၢၼ်ႈ လႄႈ   SSPP/SSA ယိုဝ်းၵၼ် တီႈလွႆလိူင်လႄႈ ႁူၺ်ႈၶမ်း ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ တၢႆ 7 ၵေႃႉ မၢတ်ႇၸဵပ်းတင်းၼမ်။

ၽူႈမီးၸၼ်ႉ SSPP လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢၼ်ၶဝ်ၸႂ်ႉႁဝ်းထွႆၼႆႉ ယႃႇႁႂ်ႈႁဝ်း ၶဝ်ႈဢွၵ်ႇၼႂ်းၵႄႈၵၢင် ပေႃႈမႄႈၵူၼ်းမိူင်း။ ႁႂ်ႈႁဝ်းယူႇယၢၼ်ပေႃႈမႄႈ ၵူၼ်းမိူင်း။ ႁဝ်းသမ်ႉ သူၼ်းတုမ် ဢဝ်ႁူမ်ႇလူမ်ႈပၼ်ၵူၼ်းမိူင်း ၶဝ်သမ်ႉဝႃႈ ႁဝ်းၶဝ်ႈဝၢၼ်ႈဢွၵ်ႇဝၢၼ်ႈ ယႃႇႁႂ်ႈႁဝ်းပႃးၵွင်ႈတူင်ႉၼိုင်ၵႂႃႇမႃးၸွမ်းသဵၼ်ႈတႃႈသၢႆတၢင်း ၸွမ်းပေႃႈမႄႈၵူၼ်းမိူင်း ယႃႇႁႂ်ႈ ၸမ်ၸႂ်တင်းပေႃႈမႄႈၵူၼ်းမိူင်း ၸိူင်ႉၼႆ။ ၵွပ်ႈၼႆလႄႈ ၶဝ်ႁၢင်းႁႅၼ်း လေႃႇတိုၵ်းႁဝ်းၶႃႈမႃးႁၢဝ်ႈႁႅင်း”- ဝႃႈၼႆ။

သိုၵ်းမၢၼ်ႈ ယိုတ်းမိူင်း ဢၼ်ႁႅၼ်းသိုၵ်းသေ လေႃႇတိုၵ်း SSPP/SSA ၼႆႉ ပဵၼ်တပ်ႉၵွင် 276 ၊ 348 ဢၼ်ပၵ်းဝႆႉ တီႈဝဵင်း မိူင်းမိတ်ႈလႄႈ 223 ဢၼ်ပၵ်းဝႆႉတီႈမၢၼ်ႈပဵင်း ၸိူဝ်းၼႆႉ။

“ဝၢႆးၶဝ် ပဵၼ်ပၢင်တိုၵ်းၸွမ်းႁဝ်းၶႃႈ မိူဝ်ႈဝၼ်းတီႈ 20 ၼၼ်ႉ သိုၵ်းမၢၼ်ႈ ဢဝ်ဢဵၼ်ႁႅင်းတင်းၼမ်သေ ပႂ်ႉၵူတ်ႇထတ်း ၵူၼ်း ၶဝ်ႈဢွၵ်ႇဝဵင်း တင်းသၢမ်တီႈ။ ၶဝ်ၵူတ်ႇထတ်းၼႂ်းၾူၼ်း၊ ၼႂ်းၵႃး၊ တႂ်ႈရူတ်ႉၶိူင်ႈ၊ ၸႅတ်ႈထၢမ် လုၵ်ႉလႂ်မႃး တေၵႂႃႇတီႈလႂ် တေ ၵႂႃႇႁဵတ်းသင် ၸိူဝ်းၼႆႉ။ မီးမိူဝ်ႈဝႃးတင်းမိူဝ်ႈၼႆႉၵူၺ်း ၶဝ်လူတ်းယွမ်း ၵၢၼ်ၵူတ်ႇထတ်းၶဝ် ပႂ်ႉတႄႉၶဝ်ပႂ်ႉယူႇ ပေႃးႁၼ်ၵူၼ်း ပႅၵ်ႇၼႃႈၵေႃႈ ၸႅတ်ႈထၢမ် ၸိူင်ႉၼၼ်ၵူၺ်း”- ၽူႈမီးၸၼ်ႉ SSPP သိုပ်ႇလၢတ်ႈၼႄၼင်ႇၼႆ။

မိူဝ်ႈဝၼ်းတီႈ 17/9/2022 ၼၼ်ႉ သိုၵ်းမၢၼ်ႈတင်း SSPP ပဵၼ်ပၢင်တိုၵ်းၵၼ် တီႈႁူၺ်ႈၶမ်း ၾၢႆႇသိုၵ်းမၢၼ်ႈတၢႆ 3 ၵေႃႉ မၢတ်ႇ 6 ၵေႃႉ။ မိူဝ်ႈဝၼ်းတီႈ 20 သမ်ႉ ယိုဝ်းၵၼ် တီႈလွႆလိူင် သိုၵ်းမၢၼ်ႈတၢႆ 4 ၵေႃႉ  ။

ယၢမ်းလဵဝ် တူဝ်တႅၼ်း ၽူႈမီးၸၼ်ႉ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA တင်း ၸွမ်ၸိၵ်းသိုၵ်း မိၼ်း ဢွင်ႇလၢႆႇ ႁူဝ်ပဝ်ႈၶွင်ႇသီႇသိုၵ်းမၢၼ်ႈ ယိုတ်းမိူင်းလႄႈ ၸုမ်းပွင်ၵၢၼ်လွင်ႈငမ်းယဵၼ် ႁူပ်ႉဢုပ်ႇၵၼ်ဝႆႉ တီႈၼေႇပျီႇတေႃႇ  ။