ၵႃးႁပ်ႉၸၢင်ႈ တၢင်ႇၵူၼ်း 3 လမ်း ၺႃးၸူၼ် ႁိမ်းဝဵင်းတူင်ႈတႃႈ လႆႈၵႂႃႇငိုၼ်းမွၵ်ႈ 30 သႅၼ်လႄႈ ၾူၼ်း 9 ၶိူင်ႈ။

ဝၼ်းတီႈ 23/9/2022 ယၢမ်းၵၢင်ၶိုၼ်း မွၵ်ႈ 10 မူင်း မီးၵူၼ်းၸုမ်းၼိုင်ႈ ဢဵၼ်ႁႅင်းမွၵ်ႈ 7 ၵေႃႉ ပႂ်ႉၸူၼ်ၵႃး    တီႈၼိူဝ်သဵၼ်ႈတၢင်းၵဵင်းတုင် – တူၼ်ႈတီး ႁိမ်းဝဵင်းတူင်ႈတႃႈ ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်း ဢွၵ်ႇၶူင်း ၊ ၵႃးတၢင်ႇၵူၼ်းၺႃးၸူၼ် 3 လမ်း၊ ၸူၼ်လႆႈၵႂႃႇ ငိုၼ်းမၢၼ်ႈ 29 သႅၼ်ပၢႆလႄႈ ၾူၼ်း 9 ၶိူင်ႈ။

ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ၵူၼ်းႁၢႆႉၼၼ်ႉ ဢဝ်တုမ်မႆႉသေ ႁႄႉၼၢင်ဝႆႉၼိူဝ်သဵၼ်ႈတၢင်း။  မိူဝ်ႈၽွင်း ၼၼ်ႉ ၸဝ်ႈၵႃးလူင်းမႃးၶၢႆႉတုမ်မႆႉ ။ ၽွင်းၼၼ်ႉ ၸုမ်းၵူၼ်းၸူၼ်ဢၼ်မူၵ်းဝႆႉႁိမ်းႁွမ်းၼၼ်ႉ ယိပ်းမိတ်ႈ၊ လႅဝ်း၊ ၵွင်ႈသတ်ႉယၢမ်းသေ ဢွၵ်ႇမႃးၸူၼ် ။ လႆႈၵႂႃႇ ငိုၼ်းမွၵ်ႈ 30 သႅၼ်ပျႃး။ ၾူၼ်းၵေႃႈလႆႈၵႂႃႇ 9 ၶိူင်ႈ။  ယၢမ်းလဵဝ်ၼႆႉ လီၵူဝ်ၼႃႇ ဢမ်ႇဝႃႈၵၢင် ဝၼ်းၵၢင်ၶိုၼ်း ပေႃးဢွၵ်ႇတႃႈပႆတၢင်းၸိုင် လူဝ်ႇလႆႈဝႆႉသတိၵၼ်ယႂ်ႇၼမ် ဢမ်ႇလူဝ်ႇပႃးငိုၼ်းၸွမ်းတူဝ်ၼမ်ၶႃႈ။ ၵမ်ႉထုၵ်ႇၶႃႈ ႁႅမ်တၢႆ တၢႆလၢႆလၢႆၵွၼ်ႇဢေႃႈ”- ဝႃႈၼႆ။

ၵႃး 3 လမ်း ဢၼ်ၺႃးၸူၼ်ၼၼ်ႉ တၢင်ႇၵူၼ်းမႃး 19 ၵေႃႉ။ ၵူၼ်းၸူၼ်ၼၼ်ႉသမ်ႉ ဢဵၼ်ႁႅင်း မီး 7 ၵေႃႉ ပဵၼ်ၽူႈၸၢႆး ယိပ်းတၢင်းမိတ်ႈ၊ လႅဝ်းလႄႈ ၵွင်ႈသတ်ႉယမ်း ၸိူဝ်းၼႆႉ ဢွၵ်ႇမႃးၸူၼ်။

ဢိင်ၼိူဝ် လိူင်ႈၼႆႉ ယူႇတီႈၸဝ်ႈၵႃး/ ၵူၼ်းမႃးၸွမ်း ၸိူဝ်းၼၼ်ႉ လႆႈၵႂႃႇပိုတ်ႇလိူင်ႈ တီႈႁူင်းပလိၵ်ႈဝဵင်းတူင်ႈတႃႇဝႆႉယဝ်ႉ  လႆႈႁူႉၼင်ႇၼႆ။

ၽွင်းယၢမ်းဝၢၼ်ႈမိူင်းပဵၼ်ၽိုၼ်းပဵၼ်ၾႆးၼႆႉ ပၢႆးမၢၵ်ႈမီးတူၵ်း ႁႃၵိၼ်လဵင်ႉတွင်ႉယၢပ်ႇလႄႈ  ၽူႈလၵ်ႉၵူၼ်းၸူၼ်လိူင်ႇၼမ်  ၵူႈဝဵင်း၊ မီးၵူႈဝၼ်း။