မိူဝ်ႈၼႆႉ ဝၼ်းတီႈ 26/9/2022 ယၢမ်းၵၢင်ၼႂ်မွၵ်ႈ 10:00 မူင်းပၢႆ မီးၶၢဝ်ႇလိုဝ်း ဝႃႈ မီးၸုမ်းယိပ်းၵွင်ႈၵၢင်ႇ ၸၢဝ်း ၶိူဝ်း ၶဝ်ႈတူင်ႉၼိုင်ၼႂ်းၵၢတ်ႇလူင် ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ထႅင်ႈသေ ႁဵတ်းႁႂ်ႈၵူၼ်းၶၢႆ ၵၢတ်ႇ ဢွၼ်ၵၼ် တိုၼ်ႇသၢၼ်ႈတူၵ်းၸႂ် ၼႅတ်ႈၵဵပ်းၶူဝ်း ပိၵ်ႉၽၵ်းတူႁၢၼ်ႉၶၢႆ ပွၵ်ႈႁိူၼ်း ၽႂ်မၼ်း။
ၵူၼ်းၶၢႆၵၢတ်ႇ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၸုမ်းယိပ်း ၵွင်ႈၵၢင်ႇၶဝ်ႈမႃးထႅင်ႈၶႃႈ။ မႃးလၢႆ ၵေႃႉတႄႉ ပႆႇႁူႉ။ ၵူၼ်းၶၢႆၵၢတ်ႇ ဢွၼ်ၵၼ်တိုၼ်ႇသၢၼ်ႈသေ ၼႅတ်ႈသိမ်းၶူဝ်း ပိၵ်ႉဢိုတ်းႁၢၼ်ႉၶၢႆပွၵ်ႈႁိူၼ်းမူတ်းယဝ်ႉ။ မိူဝ်ႈၵႆႈ ယၢမ်း 10:15 မူင်းၼႆႉ။ သိုၵ်းဢၼ်ၶဝ်ႈမႃးၼႆႉ ပဵၼ်သိုၵ်းတဢၢင်း TNLA ၼႆၶႃႈဢေႃႈ”- ဝႃႈၼႆ။
ဢိင်ၼိူဝ် လွင်ႈပိူင်ပဵၼ်မိူဝ်ႈဝႃး ဝၼ်းတီႈ 25/9/2022 မီးလွင်ႈယိုဝ်းၵွင်ႈ လွၵ်ႇငိုတ်ႈ ၼႂ်းၵၢင်ၵၢတ်ႇဝဵင်းၼမ်ႉၶမ်းၼႆႉသေ မိူဝ်ႈ ၼႆႉ ၵူၼ်းၶၢႆၵၢတ်ႇ ဢမ်ႇမႃးပိုတ်ႇႁၢၼ်ႉၶၢႆမီးမွၵ်ႈၼိုင်ႈၶိုင်ႈ ။
“မိူဝ်ႈၼႆႉ ၵူၼ်းသိုၵ်းတဢၢင်း ၸႅၵ်ႇၵၼ် ပဵၼ်လၢႆၸုမ်း၊ ၸုမ်း 2 -3 ၵေႃႉသေ ဢႅဝ်ႇတူၵ်းလိၵ်ႈၵဵပ်းၶွၼ်ႇ ၸွမ်း ႁၢၼ်ႉၶၢႆၶူဝ်း ၼႂ်းၵၢတ်ႇ ၸိူဝ်းၼၼ်ႉထႅင်ႈ ၵူၼ်းၶၢႆၵၢတ်ႇ ဢွၼ်ၵၼ်တူၵ်းၸႂ် တိုၼ်ႇသၢၼ်ႈ ၼႅတ်ႈသိမ်းၶူဝ်းပွၵ်ႈၵၼ်ၸဵမ်ၸဝ်ႉ ၶႃႈ။ မိူဝ်းဝႃးၼႆႉ ၶဝ်ဢဝ်ၵွင်ႈယၢဝ်းသႂ်ႇၼႂ်းထူင်ၸၢၼ်ႈသေ ၶဝ်ႈၵၢတ်ႇမႃးယိုဝ်းလွၵ်ႇ တေသဵင်ႈမၢၵ်ႇၵွင်ႈ 1 မႅၵ်ႉၼႆႉ။ ၶဝ်မႃးတူၵ်း လိၵ်ႈၵဵပ်းၶွၼ်ႇ ၼႂ်းႁၢၼ်ႉၶၢႆၵၢတ်ႇမိူဝ်ႈဝႃးၼႆႉ ပဵၼ်လၢႆႁၢၼ်ႉၶႃႈဢေႃႈ”- ၵူၼ်းၶၢႆၵၢတ်ႇ ဝဵင်းၼမ်ႉၶမ်း သိုပ်ႇလၢတ်ႈၼႄ ၼင်ႇ ၼႆ။
ၵဵဝ်ႇၵပ်းလွင်ႈၼႆႉ ၵူၼ်းမိူင်းၵူၼ်းၶၢႆၵၢတ်ႇ ဢွၼ်ၵၼ်ၶၢင်းဝႃႈ ယွၼ်ႉပဵၼ်ၵၢၼ်ႁႃၵိၼ်လဵင်ႉတွင်ႉလႄႈ သင်ဝႃႈ ၼႂ်းၵၢတ်ႇ ဢမ်ႇ မီးလွင်ႈႁူမ်ႇလူမ်ႈ ၸိူင်ႉၼႆၼႆႉ ပဵၼ်ဢၼ်မႆႈၸႂ်ၵူဝ်ၵၼ်ဝႆႉယူႇသေတႃႉၵေႃႈ ယၢပ်ႇၵေႃႈၵႃႈလႆႈၵႂႃႇပိုတ်ႇႁၢၼ်ႉသေၶၢႆ ဝႃႈၼႆ။
မိူဝ်ႈဝၼ်းတီႈ 4/1/2022 ပူၼ်ႉမႃးၼႆႉ ၵူၼ်းၵဵပ်းၶွၼ်ႇ သိုၵ်း TNLA မႃးၵဵပ်းၶွၼ်ႇၼႂ်းၵၢတ်ႇလူင် ဝဵင်းၼမ်ႉၶမ်းယူႇၼၼ်ႉ ထုၵ်ႇၵူၼ်းဢမ်ႇႁူႉၾၢႆႇ မႃးယိုဝ်းတၢႆထင်တီႈ 2 ၵေႃႉ။ဝၢႆးၼၼ်ႉဝၼ်းၼိုင်ႈ သိုၵ်းTNLA ဢဝ်ဢဵၼ်ႁႅင်းၶဝ်ႈဝဵင်း။ သိုၵ်းမၢၼ်ႈ ပႂ်ႉငွႆးယိုဝ်းလႄႈပဵၼ်ၵၢင်တိုၵ်းၵၼ်။ ႁိူၼ်းယေးၵူၼ်းဝၢၼ်ႈၵွႆ၊ ၵူၼ်းဝၢၼ်ႈလႆႈလူႉတၢႆၸွမ်းတင်းၼမ်။
