သိုၵ်း PNO/PNA ယႃႉမၢၵ်ႇၶဝ်ႈတဝ်ႈၼမ်ႉၼႂ်းသူၼ်သေ ယိုတ်းတီႈလိၼ်ၵူၼ်းမိူင်း ၼႂ်းဢိူင်ႇတၢမ်ၽၢၵ်ႇ ၸႄႈဝဵင်းသီႇသႅင်ႇ ႁွင်ႉဢဝ်ၸဝ်ႈၶွင် လွၵ်ႇငိုတ်ႈထိုင်သၢႆၸႂ်။
သိုၵ်း PNO ယိုတ်းတီႈလိၼ်ၵူၼ်းမိူင်း ဝၢၼ်ႈၼွင်ပႃယဵၼ်ႇ ၊ ၽိူဝ်ႇၸဝ်ႈၶွင်သူၼ်တီႈလိၼ်ၵႂႃႇတူၺ်း လႆႈႁၼ် တူၼ်ႈမၢၵ်ႇၶဝ်ႈတဝ်ႈၼမ်ႉဢၼ်ၽုၵ်ႇဝႆႉၼၼ်ႉထုၵ်ႇယႃႉ လူႉၵွႆဝႆႉမူတ်း။
ၵူၼ်းဝၢၼ်ႈၼွင်ပႃယဵၼ်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၽိူဝ်ႇႁဝ်းၶႃႈၵႂႃႇတူၺ်းသူၼ် တူၼ်ႈထူဝ်ႇ တူၼ်ႈငႃးႁဝ်းပေႃးၺႃးယႃႉတၢႆၵွႆဝႆႉမူတ်းယဝ်ႉ။ ၶဝ်ႁၼ်သေၶဝ်လွၵ်ႇငိုတ်ႈဝႃႈ တေၶႃႈႁႅမ်ႁဝ်းၶႃႈတၢႆၼႆဢေႃႈ ။ ယဝ်ႉၵေႃႈႁဝ်းၶႃႈယွၼ်းၼွမ်းႁႂ်ႈလႆႈၽုၵ်ႇၵိၼ် ၊ ဢဝ်မၢၵ်ႇၶဝ်ႈတဝ်ႈၼမ်ႉၵွၼ်ႇၼႆ ၶဝ်ဝႃႈ တီႈလိၼ်ၼႆႉ မွပ်ႈပၼ်သိုၵ်းမၢၼ်ႈယဝ်ႉၼႆၶႃႈဝႃႇ” ဝႃႈၼႆ။
သိုၵ်း PNO/PNA ၼႆႉ တႄႇယိုတ်းလိၼ်ၵူၼ်းမိူင်းမိူဝ်ႈႁူဝ်လိူၼ်ၵျူႊလၢႆႊသေ ထိုင်ၼႂ်းလိူၼ်ဢေႃႊၵတ်ႉသ် ၽိူဝ်ႇၸဝ်ႈသူၼ်ၵႂႃႇတူၺ်း မၢၵ်ႇၶဝ်ႈတဝ်ႈၼမ်ႉပေႃးယႃႉၵွႆမူတ်းယဝ်ႉ ၸဝ်ႈသူၼ်လၢတ်ႈၼင်ႇၼႆ။
သိုၵ်း PNO/PNA ၼႆႉ တီႈဝဵင်းလွၵ်ႉၸွၵ်ႇၵေႃႈ ၼႄၶေႃႈဢၢင်ႈဝႃႈ ၽဵဝ်ႈမူၺ်ႉယႃႈမဝ်းၵမ်ၼႆသေ ၵဵပ်းငိုၼ်း ၊ ၵဵပ်းၶဝ်ႈ ၵဵပ်းၵူၼ်း ၵူၼ်းဝၢၼ်ႈ ထႅင်ႈ ၵူၼ်းဝၢၼ်ႈလၢတ်ႈၼင်ႇၼႆ။
လွင်ႈၼႆႉ ၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတီႈသိုၵ်း PNO/PNA ယူႇၵေႃႈၵပ်းဢမ်ႇလႆႈ။
