ဝဵင်းမိူင်းမၢဝ်း ၼႃႈလိၼ်ၽွင်းငမ်းတူဝ်ၵဝ်ႇ တႂ်ႈၶူင်း ၼႂ်းမိူင်းၶႄႇ ၵူတ်ႇ ထတ်းႁၼ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 ၼႆသေပိၵ်ႉဢိုတ်း Lockdown ထႅင်ႈၵမ်းၼိုင်ႈ ။
တႄႇဢဝ် ဝၼ်းတီႈ 16/9/2022 တေႃႇထိုင် 21/9/2022 ၼႆႉ လူင်ပွင်ၸိုင်ႈၶႄႇ သင်ႇပိၵ်ႉဢိုတ်း ဝဵင်းမိူင်းမၢဝ်း ၼႃႈလိၼ် ၽွင်းငမ်းတူဝ်ၵဝ်ႇ တႂ်ႈၶူင်း ၼႂ်းၸိုင်ႈမိူင်းၶႄႇ ထႅင်ႈၵမ်းၼိုင်ႈ ယွၼ်ႉၵူတ်ႇထတ်းႁၼ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၼမ်မႃးထႅင်ႈ ၼႆယဝ်ႉ။
ၵူၼ်းပိုၼ်ႉတီႈ မိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈမိူင်းမၢဝ်းၼႆႉ ဢိုတ်းဝႆႉမူတ်းယဝ်ႉ ပလိၵ်ႈ/ ယေးၶႄႇ ၶဝ် မႃးပႂ်ႉၸွမ်းၵိဝ်ႇ ၸွမ်းတၢင်း။ ဢမ်ႇပၼ်ၵႂႃႇတၢင်းလႂ် ႁႂ်ႈယူႇၼႂ်းႁိူၼ်းယေးၽႂ်မၼ်း ၵူၺ်းၶႃႈ။ ၾၢႆႇပၢႆးယူႇလီၶဝ်ၵေႃႈ မႃးၵူတ်ႇထတ်း ပၼ် ယူႇၵူႈဝၼ်း။ ၶူၼင်ပေႃးၸဵပ်းမူတ်းယဝ်ႉၶႃႈဢေႃႈ ၼႆႉ။ တၢင်းပဵၼ်ၼႆႉ တႄႇႁၼ်မႃး တီႈတၢင်းဝၼ်းတဵင်ႈ ယဝ်ႉၵေႃႈ ၸေႊၵဝ်ႇ တေႃႈလဵဝ် ႁၼ်ပႃးတၢင်း ၼွင်တဝ်ႈ ၸိူဝ်းၼႆႉပႃးထႅင်ႈယဝ်ႉ။ တင်းမူတ်းဢၼ် ၵူတ်ႇထတ်းႁၼ် ၸၢႆးလၢႆၵေႃႉ ယိင်းလၢႆၵေႃႉ တႄႉ ဢမ်ႇလႆႈႁူႉၸွမ်းၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ၵူၼ်းပိုၼ်ႉတီႈ မိူင်းမၢဝ်း ၵမ်ႈၼမ် ဢွၼ်ၵၼ်ၶၢင်း ၵဵဝ်ႇလူၺ်ႈ တၢင်းပဵၼ်ၶူဝ်ႊဝိတ်ႉ 19 ၼႆႉသေ ထုၵ်ႇလူင် ပွင်ၸိုင်ႈၶႄႇ သင်ႇပိၵ်ႉဢိုတ်း Lockdown မႃး မီးၶၢဝ်းတၢင်း 6-7 လိူၼ် ၸိူဝ်ၼႆႉၵေႃႈ ယၢမ်ႈမီးမႃးယဝ်ႉ ထိုင်တီႈ ၵူၼ်းဝၢၼ်ႈ ပေႃးလႆႈ ႁူမ်ႈၵၼ် ဢွၵ်ႇၼႄၵၢင်ၸႂ်တေႃႇ ယွၼ်ႉၵၢၼ်ႁႃ လဵင်ႉတွင်ႉယၢပ်ႇၽိုတ်ႇႁႅင်း။
“သင်ဝႃႈ ၶဝ်ပိၵ်ႉဢိုတ်းၸိူင်ႉၼႆတႄႉ တေယၢပ်ႇၽိုတ်ႇလုၵ်ႈဢွၼ်ႇ တႃႇၵၢၼ်သွၼ်ႁဵၼ်းၶဝ်။ တေလႆႈၶၢတ်ႇယင်ႉၵၢၼ်ႁဵၼ်း ထႅင်ႈ။ ယဝ်ႉၵေႃႈ တႃႇၵူၼ်းမိူင်း တေယၢပ်ႇၽိုတ်ႇ ၵၢၼ်ႁႃၵိၼ်လဵင်ႉတွင်ႉ ၸိူဝ်းၼႆႉထႅင်ႈ”- ၵူၼ်းမိူင်းမၢဝ်း သိုပ်ႇလၢတ်ႈၼႄ ၼင်ႇၼႆ။
ၵဵဝ်ႇလူၺ်ႈတၢင်းပဵၼ် ၶူဝ်ႊဝိတ်ႉ 19 ၼႆႉသေ တေပိၵ်ႉဢိုတ်း Lockdown ထိုင်ဝၼ်းတီႈလႂ်ပႆႇႁူႉ ။ ဢွၼ်တၢင်းသုတ်းတႄႉ တေပိၵ်ႉဢိုတ်းၶၢဝ်းတၢင်းႁိုင် 7-10 ဝၼ်း သင်ဝႃႈ ဢမ်ႇထူပ်းႁၼ် ၸိူဝ်ႉမႅင်းတၢင်းပဵၼ်ယဝ်ႉၼႆ တေပိုတ်ႇ Lockdown ၶိုၼ်း။ သင်ဝႃႈ တိုၵ်ႉထူပ်းႁၼ် ၵူၼ်းတိတ်ႉၸပ်းတၢင်းပဵၼ်ၶူဝ်ႊဝိတ်ႉ ထႅင်ႈယူႇၸိုင် တေသိုပ်ႇပိၵ်ႉဢိုတ်းၵႂႃႇထႅင်ႈ ၵူၼ်းမိူင်း မၢဝ်းလၢတ်ႈ။
ယဝ်ႉၵေႃႈ မိူင်းၶႄႇ တႄႇပိၵ်ႉလႅၼ်လိၼ် မိူဝ်ႈပီ 2020 လိူၼ်မၢတ်ႉၶျ် ၊ ႁူဝ်ပီ 2021 ပိုတ်ႇမိူင်းၵမ်းၼိုင်ႈ သေတႃႉ ယွၼ်ႉ တၢင်းပဵၼ် ၶူဝ်ႊဝိတ်ႉၽႄႈလၢမ်းၶိုၼ်း ၵမ်းထူၼ်ႈသၢမ်ၼႆႉ ၵူၼ်းမိူင်းႁူမ်ႈတုမ် ၽႄႈၸပ်း လူႉယႂ်ႇတၢႆၼမ်လႄႈ ၾၢႆႇတၢင်း မိူင်းၶႄႇ ပိၵ်ႈလႅၼ်လိၼ်ထႅင်ႈ၊ ၵူၼ်းမိူင်းမၢဝ်းၵေႃႈ ၸပ်းတၢင်းပဵၼ်လႄႈ ထုၵ်ႇပိၵ်ႉမိူင်းပႃး ႁိုင်မႃးၸမ် 7 လိူၼ်။ ၸိူဝ်းၼႆႉ တုမ်ႉယွၼ်ႈ ၵူၼ်းယူႇၸွမ်းလႅၼ်လိၼ် တၢင်းသွင်ၾင်ႇၸိုင်ႈမိူင်း၊ ၵႂႃႇမႃး ၵႃႉၶၢႆ ႁႃၵိၼ်လဵင်ႉတွင်ႉယၢပ်ႇ။
