သိုၵ်းမၢၼ်ႈ မႃးသွၼ်ႈယူႇၼႂ်းၸလွပ်ႈ ပူႇသိၼ်တီႈ ဝတ်ႉၵိဝ်ႇဢၢင်း ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၊ ဝၼ်းသိၼ်လိူၼ် 10 မူၼ်းၼၼ်ႉ သိုၵ်းၵႅတ်ႇၶႄၵူၼ်းမိူင်း PDF ယိုဝ်းၵွင်ႈလူင် တူၵ်းတႅၵ်ႇသႂ်ႇႁိမ်းဝတ်ႉၵိဝ်ႇဢၢင်း 3 လုၵ်ႈ ပူႇသိၼ်/ ၼၢႆးသိၼ် တူၵ်းၸႂ် တိုၼ်ႇသၢၼ်ႈ ၽူင်ႉပၢႆႈ။
ဝၼ်းတီႈ 9/9/2022 ယၢမ်းဝၢႆးဝၼ်း ၸုမ်းၵႅတ်ႇၶႄၵူၼ်းမိူင်း PDF ယိုဝ်းသႂ်ႇလႄႈ မၢၵ်ႇတူၵ်းတႅၵ်ႇ တီႈႁိမ်းဝတ်ႉၵိဝ်ႇဢၢင်း။
ၵူၼ်းၼႂ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ဝၼ်းသိၼ်လႄႈ ပူႇ သိၼ်/ ၼၢႆးသိၼ် တိုၵ်ႉမီးတီႈၵျွင်း မွၵ်ႈ 300-400 ၵေႃႉ။ ပေႃးမၢၵ်ႇတႅၵ်ႇၵေႃႈ ဢွၼ်ၵၼ်တိုၼ်ႇသၢၼ်ႈ တူၵ်းၸႂ် ၽူင်ႉပၢႆႈ၊ ပူႇသိၼ် မၢင်ၵေႃႉ ဢမ်ႇတၼ်းလႆႈၶႅပ်းတိၼ်။ မၢင်ၵေႃႉ လႅၼ်ႈ ၽႅဝ်ႁိူၼ်း ၵမ်ႈသိုဝ်ႈ ၸိူဝ်းႁိူၼ်းယေးယူႇၸမ် ၸိူဝ်းၼၼ်ႉ။ ၸိူဝ်းယူႇၵႆၵေႃႈၼႅတ်ႈၸၼ်ၵၼ် ဢဝ်ၵၼ်ပၢႆႈၶႃႈဢေႃႈ ”- ဝႃႈၼႆ။
မၢၵ်ႇတူၵ်းတႅၵ်ႇ ႁိမ်းဝတ်ႉၵိဝ်ႇဢၢင်း 3 လုၵ်ႈၼႆႉ ၼွၵ်ႈလိူဝ်ႁဵတ်းႁႂ်ႈ ၸဝ်ႈသိၼ် ၸဝ်ႈၸၢင်းၶဝ်တူၵ်းၸႂ်ယဝ်ႉ လွင်ႈမၢတ်ႇၸဵပ်းလူႉတၢႆတႄႉဢမ်ႇမီး။
သိုၵ်းမၢၼ်ႈတႄႉထႅမ်ႁႅင်းသိုၵ်းၶိုၼ်ႈယူႇဝၼ်းဝၼ်းၶိုၼ်းၶိုၼ်း ဝႃႈၼႆ။
သိုၵ်းမၢၼ်ႈ ယိုတ်းမိူင်းတင်း ၸုမ်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း တႄႇဢဝ် ဝၼ်းတီႈ 27/8/2022 မႃးတေႃႇထိုင် ယၢမ်းလဵဝ်။ တင်းသွင်ၾၢႆႇ တိုၵ်ႉထႅမ်ႁႅင်းသိုၵ်းလႄႈ ၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ၼႂ်းၸႄႈဝဵင်းၼွင်ၶဵဝ်။ ၵူၼ်းပိုၼ်ႉ တီႈဢွၼ်ၵၼ်ပၢႆႈၽေးသိုၵ်း ၼပ်ႉႁူဝ်ပၢၵ်ႇ ။