ပီႈၼွင်ႉတႆး ၸိူဝ်းႁွတ်ႈၽႅဝ် မိူင်းဢမေႊရိၵၼ်ႊ ၵဵပ်းငိုၼ်းႁူမ်ႈၵၼ်သေ ၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် တႃႇငိုၼ်း US 1,400 တေႃႇလႃႇ (မႅၼ်ႈငိုၼ်းမၢၼ်ႈ 40 သႅၼ်ပျႃး)။
မိူဝ်ႈဝႃး ဝၼ်းတီႈ 8/9/2022 ယူႇတီႈ သင်ၶၸဝ်ႈ ဢွၼ်ႁူဝ်ၼမ်းၼႃႈ ဢဝ်ပုၼ်ႈၽွၼ်းသေ သိုဝ်ႉၶဝ်ႈၼမ်ႉတၢင်းၵိၼ် ၶူဝ်းၶွင်ၵိၼ်ယႅမ်ႉ ၸွႆႈထႅမ်ပၼ် ၵူၼ်းပၢႆႈၽေးသိုၵ်း ဢၼ်မႃးမီးတီႈဝတ်ႉၶိူဝ်းၼိမ်း ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ တႃႇႁူဝ်ၵူၼ်းမွၵ်ႈ 400 ၵေႃႉ ၼႆယဝ်ႉ။
ၸၢႆးၼေႃႇ ၽူႈတၢင်တူဝ် မူႇၸုမ်းၸၢဝ်းၶိူဝ်းတႆး မိူင်းဢမေႊရိၵၼ်ႊ လၢတ်ႈၼႄၽူႈတွႆႇႁွၵ်ႈဝႃႈ – “ၶႃႈႁဝ်းၶဝ် ယူႇတၢင်းၼႆႉ ႁူၺ်းပီႈၼွင်ႉတႆးႁဝ်းၶဝ် မၢင်ၵေႃႉ 50 US ၊ မၢင်ၵေႃႉ 100 US ၸူႉတုမ်ၵၼ်သေ လူႇၵႂႃႇ မိူဝ်ႈသိုၼ်း ဝၼ်းတီႈ 7 ၼၼ်ႉ တႃႇငိုၼ်း 1,400 US ယူႇတီႈသင်ၶၸဝ်ႈ တီႈဝတ်ႉၶိူဝ်းၼိမ်းႁဝ်းၶႃႈ ဢဝ်ပုၼ်ႈၽွၼ်းသေ သိုဝ်ႉၶဝ်ႈၼမ်ႉတၢင်းၵိၼ် ၶူဝ်းၶွင် ၵိၼ်ယႅမ်ႉ ၸွႆႈထႅမ်ပၼ်”- ဝႃႈၼႆ။
သဵၼ်ႈမၢႆ ၵူၼ်းပၢႆႈၽေးသိုၵ်း ဢၼ်ႁွတ်ႈထိုင်ဝႆႉ တီႈဝတ်ႉၶိူဝ်းၼိမ်း ႁၢၼ်ႉတေႃႇထိုင် ဝၼ်းတီႈ 8/9/2022 ၼႆႉပဵၼ် ၵူၼ်းဝၢၼ်ႈလူင်ၶၢၼ် မုင်ႉႁေႃႁိူၼ်း 72 လင် ( ၸၢႆး 48 ၵေႃႉ ယိင်း 87 ၵေႃႉ)။ ဝၢၼ်ႈပဵင်းဢွႆႈ မုင်ႉႁေႃႁိူၼ်း 25 လင် ( ၸၢႆး 18 ၵေႃႉ ယိင်း 53 ၵေႃႉ)။ ဝၢၼ်ႈၼႃးၶႃး မုင်ႉႁေႃႁိူၼ်း 28 လင် (ၸၢႆး 60 ၵေႃႉ ယိင်း 50 ၵေႃႉ)။ ဝၢၼ်ႈရတၼႃႇတဵင်ႇၵီႇ မုင်ႉႁေႃႁိူၼ်း 16 လင် (ၸၢႆး 19 ၵေႃႉ ယိင်း 44 ၵေႃႉ) ႁူမ်ႈၵၼ် တင်းမူတ်း 379 ၵေႃႉ ၼႆယဝ်ႉ။
ၼႂ်းၼၼ်ႉ မီးမႄႈမၢၼ်ႈ ၵူၼ်းဝၢၼ်ႈလူင်ၶၢၼ် တႃႇ 9 ၵေႃႉ။ ၼႂ်း 9 ၵေႃႉၼၼ်ႉ တႃႇ 2 ၵေႃႉတႄႉ ၵိူတ်ႇလုၵ်ႈယဝ်ႉ။ တၢင်းဝတ်ႉႁူဝ်ၶူဝ်လႄႈ ဝတ်ႉၵလၵွႆး ၸိူဝ်းၼႆႉၵေႃႈ မီးၵူၼ်းပၢႆႈၽေးသိုၵ်းဝႆႉ ၵမ်ႈၽွင်ႈ။
သိုၵ်းမၢၼ်ႈ ယိုတ်းမိူင်းတင်း ၸုမ်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း တႄႇဢဝ် ဝၼ်းတီႈ 27/8/2022 မႃးတေႃႇထိုင် ယၢမ်းလဵဝ် တင်းသွင်ၾၢႆႇ တိုၵ်ႉထႅမ်ႁႅင်းသိုၵ်းလႄႈ ၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ၼႂ်းၸႄႈဝဵင်းၼွင်ၶဵဝ် ၼႆယဝ်ႉ။