ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ၸမ် 40 ၵေႃႉ ၼႂ်းၼၼ်ႉ လူႉတၢႆ 1 ၵေႃႉ သိုဝ်ႇၶၢဝ်ႇပိုၼ်ႉတီႈ ဢွၵ်ႇဝႆႉၼင်ႇၼႆ။
တႄႇဢဝ် ဝၼ်းတီႈ 1/8/2022 တေႃႇထိုင် ဝၼ်းတီႈ 4/9/2022 ၶၢဝ်းတၢင်း လိူၼ်ပၢႆၼႆႉ ၼႂ်းၸႄႈဝဵင်း ၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 မီး 37 ၵေႃႉ ၼႂ်းၼၼ်ႉ လူႉတၢႆ 1 ၵေႃႉ ပဵၼ်ထဝ်ႈယိင်း ဢႃယု 71 ပီ ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းၵဵင်းတုင် ဢွၼ်ၵၼ်ပဵၼ်တၢင်းပဵၼ် ၼမ်တႄႉ တေပဵၼ်ၶႆႈၼၢဝ်ဝတ်းဢႆၵၼ် ၸိူဝ်းၼႆႉ တေလႆႈဝႃႈ တၢင်းပဵၼ်ၸွမ်းၾိင်ႈၾႃႉရႃႇသီႇ မိူၼ်မိူဝ်ႈၵူႈပွၵ်ႈၼၼ်ႉၵူၺ်း ပဵၼ်တင်းႁိူၼ်းတင်းယေး။ မၢင်ၵေႃႉ မႆႈၸႂ် ၵူဝ်ပဵၼ်ၶူဝ်ႊဝိတ်ႉၼႆသေ ၵႂႃႇၸႅတ်ႈတူၺ်း ဢမ်ႇပဵၼ်။ ဢၼ်တေပဵၼ်တႄႉၵေႃႈ မီး ယူႇၶႃႈယဝ်ႉ ထၢင်ႇတႄႉ။ ၵမ်ႈၼမ် ႁဝ်းၶႃႈတႄႉ တေလႆႈဝႃႈ တၢင်းပဵၼ်ၸွမ်းၾိင်ႈၾႃႉရႃႇသီႇၵူၺ်းၶႃႈဢေႃႈ”- ဝႃႈၼႆ။
မိူၼ်ၼႆ ၼင်ႇၵဝ်ႇ တီႈသိုဝ်ႉၶၢဝ်ႇ ၵၢမ်ႇပေႃးၸတၢႆး တႅမ်ႈဝႆႉဝႃႈ မိူဝ်ႈဝၼ်းတီႈ 3/9/2022 ယၢမ်းၵၢင်ၼႂ် ထဝ်ႈၸၢႆး ဢႃယု 52 ပီ ၵေႃႉၼိုင်ႈ ပဵၼ်ၶူဝ်ႊဝိတ်ႉ 19 သေ လူႉတၢႆ တီႈၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။
ၸွမ်းၼင်ႇ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ် တႂ်ႈသိုၵ်းမၢၼ်ႈ ၵုမ်းၵမ် ဢွၵ်ႇဝႆႉတႄႉ ၼႂ်းဝၼ်းတီႈ 5/9/2022 ယၢမ်းဝၢႆးဝၼ်း 4 မူင်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တင်းမူတ်း 70 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ