လုင်းသူၺ်ႇပုၼ်း ၵူၼ်းၵေးသီး ထုၵ်ႇသိုၵ်းမၢၼ်ႈၽၼ်းသႂ်ႇ  မၢတ်ႇၸဵပ်းႁၢဝ်ႈႁႅင်း လႆႈယဵပ်ႉဢမ်ႇယွမ်း 40 ႁွႆးၼၼ်ႉ ယူတ်းယႃတူဝ်သဵင်ႈငိုၼ်းဝႆႉၼပ်ႉႁူဝ်သႅၼ်ပျႃး ၵူၺ်းၵႃႈတေႃႇထိုင်ယၢမ်းလဵဝ် သိုၵ်းမၢၼ်ႈ တိုၵ်ႉမႃးၸွႆႈ 5 မိုၼ်ႇပျႃးၵူၺ်း။

လုင်းသူၺ်ႇပုၼ်း ဢႃယု 67 ပီ ၵူၼ်း ဝၢၼ်ႈၼွင်ယူမ်း ဢိူင်ႇမိူင်းၼိမ် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဢၼ်ထုၵ်ႇသိုၵ်းမၢၼ်ႈၽၼ်း    တီႈတၢင်းၾၢႆႇဢွၵ်ႇဝၢၼ်ႈၼၼ်ႉ လႆႈတိူဝ်ႉမၢတ်ႇ ၸဵပ်းႁၢဝ်ႈႁႅင်း၊ ယူတ်းယႃတူဝ်ဝႆႉ တင်ႈတႄႇ ဝၼ်းတီႈ 31/8/2022  မႃး တေႃႇထိုင် ယၢမ်းလဵဝ်  ၶၢဝ်းတၢင်း 4-5 ဝၼ်း ၊ သိုၵ်းမၢၼ်ႈၸင်ႇႁႃမႃးသူႇၸႂ်းမိူဝ်ႈဝၼ်းတီႈ 3/9/2022 သေ ၸွႆႈၵႃႈယူတ်းယႃ ၶႄႈၶဝ်ႈမုၼ်း ၶဝ်ႈပွင်းဢိတ်းဢွတ်းၵူၺ်း ၵူၼ်းႁိူၼ်းယၢပ်ႇၸႂ်။  

ၵူၼ်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် လုင်းသူၺ်ႇပုၼ်းတႄႉ တေလႆႈဝႃႈ ၶႅၼ်းမႃးၽွင်ႈ ယဝ်ႉ။ ၵူၺ်းတိုၵ်ႉသိုပ်ႇယူတ်းယႃတူဝ်ဝႆႉ တီႈႁူင်းယႃယူႇ။ မၢတ်ႇလိုၵ်ႉၼႃႇလႄႈ လႆႈယဵပ်ႉၸၼ်ႉၼႂ်း ထိုင်ၸၼ်ႉၼွၵ်ႈတင်းမူတ်းမွၵ်ႈ 40 ႁွႆးၼႆႉယူႇၶႃႈ။   ယၢမ်းလဵဝ် ယၢပ်ႇၽိုတ်ႇၵႃႈယူတ်းယႃၶႃႈဢေႃႈ။ ယူတ်းယႃသဵင်ႈငိုၼ်းတွင်းဢမ်ႇယွမ်း 2-3 သႅၼ်ယဝ်ႉၶႃႈ။ သိုၵ်းမၢၼ်ႈမႃးၸွႆႈၶဝ်ႈမုၼ်းၶဝ်ႈပွင်းၵူၺ်း။ မိူဝ်ႈဝႃးဝၼ်းသိုၼ်းၸင်ႇႁႃမႃးၸွႆႈငိုၼ်း 5 မိုၼ်ႇပျႃး ၵူၺ်းဢေႃႈ”- ဝႃႈၼႆ။

သိုၵ်းမၢၼ်ႈ ဢၼ်ၽၼ်း လုင်းသူၺ်ႇပုၼ်းၼၼ်ႉ  ပဵၼ်ၵူၼ်းသိုၵ်းတပ်ႉ 131 ။ ၶဝ်ဝႃႈ ဝူဝ်းလုင်းသူၺ်ႇပုၼ်း ၶဝ်ႈမႃးၼႂ်းၼႃႈလိၼ်တပ်ႉၶဝ်ၼႆသေၶိုင်ယိုဝ်းဝူဝ်း။ သမ်ႉပဵၼ်ၽွင်း  လုင်းသူၺ်ႇပုၼ်း ၵႂႃႇႁႃဝူဝ်းမၼ်းလႄႈ ႁၼ်မႅၼ်ႈၶိုတ်းတၼ်းသေ ၼႅတ်ႈၵႂႃႇႁၢမ်ႈ။ သွင်ၾၢႆႇလႆႈထဵင်မေႃးၵၼ်၊ သိုၵ်းမၢၼ်ႈလၢၵ်ႈၾႃႉၽၼ်းသႂ်ႇလုင်းသူၺ်ႇပုၼ်း ၵူၼ်းၵေးသီးလၢတ်ႈ။

“ဢွင်ႈတီႈလိၼ်ဢၼ်သိုၵ်းမၢၼ်ႈယိုတ်းဝႆႉၼၼ်ႉ ပဵၼ်လိၼ်ၵူၼ်းမိူင်းဢဝ်ၶႄႈဢဝ်ၽိုၼ်း၊ ပဵၼ်ပၢင်ႇ လဵင်ႉဝူဝ်းၵႂၢႆးၵူၼ်းမိူင်း။ ယူႇတီႈတပ်ႉၶဝ်သေၶႂၢၵ်ႈၼႃႈလိၼ်မႃးၵမ်းဢိတ်းဢိတ်း ယၢမ်းလဵဝ်ၼႆႉၸမ်ထိုင် လႅၼ်ဝၢၼ်ႈႁဝ်းယဝ်ႉ ၼပ်ႉႁူဝ်ပၢၵ်ႇဢေႊၶိူဝ်ႊမၼ်းဝႆႉယဝ်ႉ။  ႁူဝ်ႉၶဝ်ၵေႃႈ ပႆႇလွမ်ႉမူတ်း ၊ ဝူဝ်းၵႂၢႆးၼႆႉၶဝ်ပဵၼ် သတ်းၶႃႈလူး ၶဝ်တေ ႁဵတ်းႁိုဝ်ႁူႉဝႃႈပဵၼ်ပိုၼ်ႉတီႈႁၢမ်ႈၶဝ်ႈၼႆ။   ”- ၵူၼ်းၵေးသီး သိုပ်ႇလၢတ်ႈၼႄၼင်ႇၼႆ။

လုင်းသူၺ်ႇပုၼ်းၼႆႉ ပဵၼ်ၵူၼ်းဝၢၼ်ႈၼွင်ယူမ်း ဢိူင်ႇမိူင်းၼိမ် ပဵၼ်ၵူၼ်းမိူင်းဝၢၼ်ႈၽၵ်းၵႃ မီးလုၵ်ႈ 2 ၵေႃႉ။ ယၢမ်းလဵဝ် ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇႁႅင်း၊ ၵၢၼ်ငၢၼ်းဢမ်ႇပဵၼ်၊ ၶူဝ်းၵုၼ်ႇၶွင်ၵိၼ်ယႅမ်ႉ ၶိုၼ်ႈႁႅင်း တႃႇၵႃႈယူတ်းယႃတႄႉ မီးဝႆႉ လွင်ႈယၢပ်ႇၽိုတ်ႇယူႇ ဝႃႈၼႆ။