ၵူၼ်းၼွင်ၶဵဝ် ၽူႈၸၢႆးၵေႃႉၼိုင်ႈ ၺႃးသိုၵ်းမၢၼ်ႈၶၢၼ်းၸႂ်ႉၶျေႃးရူတ်ႉၵႃးဢဝ်ၵႂႃႇၼႂ်းပိုၼ်ႉတီႈပၢင်တိုၵ်း ၺႃးၸၢၵ်ႇမၢၵ်ႇၼႂ်းပၢင်တိုၵ်း သိုၵ်းမၢၼ်ႈတင်း PDF လႆႈမၢတ်ႇၸဵပ်းႁႅင်း ဝႃႈၼႆ။
မိူဝ်ႈဝၼ်းတီႈ 28/7/2022 ယၢမ်းၵၢင်ဝၼ်း ၶွင်ႇသီႇသိုၵ်းမၢၼ်ႈ ၶၢၼ်းရူတ်ႉၵႃး ဢူးတေႇၸ ဢႃယု 45 ပီ ၵူၼ်းဝၢၼ်ႈၶိူဝ်းၼိမ်း ႁႂ်ႈတေႃႉသူင်ႇၶဝ်၊ ၽွင်းႁွတ်ႈတီႈသဵၼ်ႈတၢင်း ဝၢၼ်ႈလူင်ၶၢၼ် – ပဵင်းဢွႆႈလႄႈ ၵုင်းတေႃႇမေႃႈ ၼႂ်းၸႄႈဝဵင်းၼွင်ၶဵဝ် ထုၵ်ႇသိုၵ်း PDF ပိုတ်းယိုဝ်း တိူဝ်ႉမၢတ်ႇမၢၵ်ႇၵွင်ႈလုၵ်ႈၼိုင်ႈ တီႈပုမ်ၾၢႆႇ သၢႆႉ ။
ၵူၼ်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ မႃးၸႂ်ႉမၼ်း ဢဝ်ၵႃးၵႂႃႇသူင်ႇၶဝ်ၼႆသေ ထုၵ်ႇၸုမ်းလုၵ်ႉၽိုၼ်ႉ PDF ၶဝ်ယိုဝ်းသႂ်ႇ ၸွမ်းတၢင်း တိူဝ်ႉၺႃးမၢၵ်ႇၵွင်ႈ တီႈပုမ်ႁွႆးၼိုင်ႈ။ လႆႈသူင်ႇယူတ်းယႃ တီႈႁူင်းယႃလူင်ပၢင်ႇဢူႈလူင်သေ လႆႈ ၽႃႈဢွၵ်ႇပႃးႁူင်းၶဝ်ႈမၼ်းၸၢႆး။ ယၢမ်းလဵဝ် မၼ်းၸၢႆး လႆႈမႃးလိုဝ်ႈဝႆႉတီႈႁိူၼ်းလႆႈၽၢၵ်ႇလိူၼ်ယဝ်ႉ။ တေၵႂႃႇၵူတ်ႇ ထတ်းသႆႈလႄႈ ႁူင်းၶဝ်ႈၶိုၼ်း တီႈႁူင်းယႃ ပၢင်ႇဢူႈလူင်ၼႆၶႃႈဢေႃႈ”- ဝႃႈၼႆ။
ဢိင်ၼိူဝ်ငဝ်းလၢႆးပၢင်တိုၵ်းသိုၵ်းသိူဝ်တိုၵ်ႉၶဵင်ႈၶႅင်ၵၼ်ယူႇလႄႈၵူၼ်းပိုၼ်ႉတီႈ ဢမ်ႇၸၢင်ႈႁဵတ်း ၵၢၼ်ႁႃၵိၼ်လဵင်ႉတွင်ႉ။ ပၢႆးမၢၵ်ႈမီးတူၵ်း၊ ၵႃႈၶၼ်ၶူဝ်းၶွင်ၵိၼ်ယမ်ႉၶိုၼ်ႈသုင်လႄႈ ဢူးတေႇၸ ယၢပ်ႇၽိုတ်ႇငိုၼ်းတွင်းတႃႇၸႂ်ႉၸၢႆႇၵႃႈယူတ်းယႃ။
“မၼ်းၸၢႆးတႄႉ ယၢပ်ႇၽိုတ်ႇဝႆႉၶႃႈဢေႃႈ လူဝ်ႇတၢင်းၸွႆႈထႅမ် တႃႇၵႃႈယူတ်းယႃ ယွၼ်ႉယၢပ်ႇၽိုတ်ႇၵႃႈယူတ်းယႃလႄႈ မၼ်း ၸၢႆးဢမ်ႇလႆႈၶိုၼ်ႈႁူင်းယႃ လႆႈမႃးလိုဝ်ႈဝႆႉ တီႈႁိူၼ်းၵမ်ႉၼိုင်ႈ ၸိူင်ႉၼၼ်ၶႃႈဢေႃႈ”- ၵူၼ်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈၸႄႈဝဵင်းၼွင်ၶဵဝ်ၼႆႉ တင်းမူတ်းမီး 300 ပၢႆ ၼႂ်းၼၼ်ႉ တီႈဝတ်ႉၶိူဝ်းၼိမ်းမီး 200 ပၢႆ၊ ဝတ်ႉ ၵလၵွႆး 100 ပၢႆလႄႈ ဝတ်ႉႁူဝ်ၶူဝ်မွၵ်ႈ 30 ။ ယွၼ်ႉသိုၵ်းမၢၼ်ႈတင်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႆယဝ်ႉ။
မိူဝ်ႈဝႃး ဝၼ်းတီႈ 31/8/2022 ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ် တၢင်းဝၢၼ်ႈပၢင်ၸလွပ်ႈ ၼႂ်းၸႄႈဝဵင်းၵျွၵ်ႉမႄး ၵူၼ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ