ထဝ်ႈၸၢႆးၵူၼ်း ၵေးသီး ၵေႃႉၼိုင်ႈ ထုၵ်ႇသိုၵ်းမၢၼ်ႈ ဢဝ်ၽႃႉၽၼ်းသႂ်ႇ လႆႈမၢတ်ႇၸဵပ်းႁၢဝ်ႈႁႅင်း လႆႈယဵပ်ႇဢမ်ႇယွမ်း 40 ႁွႆး ယၢမ်းလဵဝ် လႆႈယူတ်းယႃတူဝ်ဝႆႉတီႈႁူင်းယႃ ဝႃႈၼႆ။
မိူဝ်ႈဝႃး ဝၼ်းတီႈ 31/8/2022 ယၢမ်းဝၢႆးဝၼ်း 1 မူင်းၶိုင်ႈ လုင်းသူၺ်ႇပုၼ်း ဢႃယုမွၵ်ႈ 60 ပီ ထုၵ်ႇသိုၵ်းမၢၼ်ႈ တပ်ႉ 131 ၽၼ်းသႂ်ႇ တီႈၶေႃးမၼ်းၸၢႆး ။ ၵူၼ်းၵေးသီးၵေႃႉၼိုင်ႈလၢတ်ႈဝႃႈ သိုၵ်းမၢၼ်ႈလႄႈလုင်းသူၺ်ႇပုၼ်း ထဵင်ၵၼ်လွင်ႈသိုၵ်းမၢၼ်ႈလၵ်ႉၵိၼ်ဝူဝ်းမၼ်းတီႈ ၾၢႆႇဢွၵ်ႇ ဝၢၼ်ႈၼွင်ယူမ်း ဢိူင်ႇမိူင်းၼိမ် ၸႄႈဝဵင်းၵေးသီး ။
ၵူၼ်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းၼၼ်ႉ လုင်းၵႂႃႇႁႃဝူဝ်း။ ႁၼ်သိုၵ်းမၢၼ်ႈ ယိုဝ်းၵိၼ်ဝူဝ်းမၼ်းသေ ၵႂႃႇ လၢတ်ႈၶဝ် လွင်ႈဝႃႈၼၼ်ႉပဵၼ်ဝူဝ်းမၼ်း။ ၵမ်းၼႆႉလႆႈမီးလွင်ႈထဵင်မေႃးၵၼ် သိုၵ်းမၢၼ်ႈ လၢၵ်ႈၽႃႉၼႂ်းပႅမ်းလုင်းႁဝ်းၼၼ်ႉ ၶိုၼ်းၽၼ်းသႂ်ႇတီႈၶေႃးမၼ်း လႆႈတိူဝ်ႉမၢတ်ႇ ၸဵပ်းႁၢဝ်ႈႁႅင်းထိုင်ဢဵၼ်၊ လႆႈဢဝ်လုင်းႁဝ်းသူင်ႇႁူင်းယႃ လႆႈယဵပ်ႉၸၼ်ႉၼႂ်းဢမ်ႇယွမ်း 40 ႁွႆး တင်းၼွၵ်ႈသမ်ႉ 7 ႁွႆး”- ဝႃႈၼႆ။
သိုၵ်းမၢၼ်ႈ ဢၼ် ၽၼ်းသႂ်ႇ တီႈၶေႃးလုင်းသူၺ်ႇပုၼ်းၼၼ်ႉ ပဵၼ်ၵူၼ်းသိုၵ်း ၼႂ်းတပ်ႉ 131 တင်းမူတ်း 3 ၵေႃႉ ပႃး ၵွင်ႈလဝ်းၼိုင်ႈ။
“ဝၢႆးၶဝ် ၽၼ်းသႂ်ႇ လုင်းသူၺ်ႇပုၼ်းယဝ်ႉ ၶဝ်မႃးယွမ်းၼွမ်းတၢင်းၽိတ်းသေဝႃႈ ၵူၼ်းၵေႃႉၽၼ်းၼၼ်ႉ ၶဝ်ၺွပ်းဝႆႉ ယဝ်ႉၼႆဝႃႇ။ ၺွပ်းတႄႉႁႃႉ ဢမ်ႇၺွပ်းတႄႉႁႃႉဢၼ်ဝႃႈၼၼ်ႉ ႁဝ်းၶႃႈဢမ်ႇႁူႉ။ ယွၼ်ႉဢမ်ႇ လႆႈ ႁၼ် ၶႃႈလူး ။ ယဝ်ႉၵေႃႈ ၶဝ် လၢတ်ႈဝႃႈ တေမႃးၸွႆႈၵႃႈယူတ်းယႃ ၼႆၶႃႈဝႃႇ တေမႃးၸွႆႈၵႃႈႁိုဝ် မိူဝ်ႈလႂ်တႄႉ ပႆႇႁူႉ”- ၵူၼ်းၵေးသီး သိုပ်ႇလၢတ်ႈၼႄၼင်ႇ ၼႆ။
လုင်းသူၺ်ႇပုၼ်းၼႆႉ ပဵၼ်ၵူၼ်းဝၢၼ်ႈၼွင်ယူမ်း ဢိူင်ႇမိူင်းၼိမ် ပဵၼ်ၵူၼ်းမိူင်းဝၢၼ်ႈၽၵ်းၵႃ မီးလုၵ်ႈ 2 ၵေႃႉ။ ယၢမ်းလဵဝ် ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇႁႅင်း၊ ၵၢၼ်ငၢၼ်းဢမ်ႇပဵၼ်၊ ၶူဝ်းၵုၼ်ႇၶွင်ၵိၼ်ယႅမ်ႉ ၶိုၼ်ႈႁႅင်း တႃႇၵႃႈယူတ်းယႃတႄႉ မီးဝႆႉ လွင်ႈယၢပ်ႇၽိုတ်ႇယူႇ ဝႃႈၼႆ။
