လိူၼ်သိပ်းလွင်ႈပီၼႆႉတႄႉ ပီႈၼွင်ႉထုင်ႉပူင်း တေၸတ်းပၢင်ၶေႉၶဵင်ႇႁိူဝ်း ၸွမ်းၼင်ႇၾိင်ႈ ပူႇႁဵတ်းမႃး ယႃႈႁဵတ်းဝႆႉၼၼ်ႉ ဝႃႈၼႆ။

ဢိင်ၼိူဝ်တၢင်းပဵၼ်ၶူဝ်ႊဝိတ်ႉလၢမ်းၽႄႈ၊ ဢိင်ၼိူဝ်သိုၵ်းမၢၼ်ႈယိုတ်းမိူင်းလႄႈမိူင်းသုၵ်ႉယုင်ႈသေ ပီႈၼွင်ႉထုင်ႉပူင်းဢမ်ႇလႆႈၸတ်းပၢင်ၶေႉၶဵင်ႇႁိူဝ်းမႃးၶၢဝ်းတၢင်း 2 ပီယဝ်ႉ။ ပီၼႆႉတႄႉ လိူၼ်သိပ်းလွင်ႈ 9 ၶမ်ႈ – 10 ၶမ်ႈ မႅၼ်ႈ ဝၼ်းတီႈ 18-19/9/2022  တေၸတ်းပၢင်ၶေႉၶဵင်ႇႁိူဝ်း တီႈ ဝၢၼ်ႈႁူဝ်တၢတ်ႇ ထုင်ႉပူင်း ၸႄႈဝဵင်းသီႇ သႅင်ႇ။

ၽူႈပွင်ၵၢၼ် ပွင်ပဵၼ်ပၢင်ပွႆးၶႅင်ႇႁိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ပွႆးၶႅင်ႇႁိူဝ်း တီႈထုင်ႉပူင်းၼႆႉ လႆႈၸတ်း ႁဵတ်းမႃးၵူႈပီပီ။ ပူၼ်ႉမႃး 2 ပီၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 လႄႈ လႆႈလိုဝ်ႈဝႆႉ (ၼႂ်းပီ 2020- 2021)။ ပီၼႆႉ ၸတ်းႁဵတ်းၶိုၼ်း ယိူင်း ဢၢၼ်းတႄႉ တႃႇလုၵ်ႈဢွၼ်ႇသႅၼ်းႁုၼ်ႈမႂ်ႇႁဝ်း ႁူႉၸၵ်းလႄႈ မေႃထိင်း သိမ်းၾိင်ႈငႄႈ/ ထုင်းႁဝ်း။ ၵၢၼ်ၶႄႉႁိူဝ်းၼႆႉ ပဵၼ် ၵၢၼ်လဵၼ်ႈႁႅင်းဢၼ်ၼိုင်ႈ ႁႂ်ႈပေႃးပဵၼ်ၵၢၼ် ၵမ်ႉၸွႆႈလွင်ႈဢဵၼ်ႁႅင်း ၶွင်ပၢႆးယူႇလီ။ ႁႂ်ႈၵူၼ်းၼုမ်ႇႁဝ်း ၵူႈဝၢၼ်ႈမိုတ်ႈၵိုဝ်း ၸမ်ၸႂ်ၵၼ်လႄႈ ၽွမ်ႉႁူမ်ႈၵၼ်”- ဝႃႈၼႆ။

ပၢင်ပွႆးၶႅင်ႇႁိူဝ်း တီႈထုင်ႉပူင်း ဢၼ်ၸတ်းႁဵတ်းတီႈဝၢၼ်ႈႁူဝ်တၢတ်ႇၼႆႉ ၼိုင်ႈပီလႂ် တေမီးႁိူဝ်းၶဝ်ႈၶႅင်ႇ မွၵ်ႈ 80 လမ်း။  ၵၢၼ်ၶေႉၶဵင်ႇၵၼ်မီး 4 သႅၼ်း။ သႅၼ်းၼိုင်ႈ ၼေႃႇတႅၼ်းၶိူဝ်း ဢႃယု 13 ပီလူင်းတႂ်ႈ၊ သႅၼ်းသွင် ၼၢင်းယိင်း 6 ၵေႃႉ ၶႅင်ႇ ၵၼ်၊ သႅၼ်းသၢမ် ၽူႈၸၢႆး 4 ၵေႃႉလႄႈ သႅၼ်းသီႇ ၽူႈၸၢႆး 5 ၵေႃႉ ယဝ်ႉၵေႃႈ တေမီးသူးရၢင်းဝလ်း 1-2-3 ၼႆယဝ်ႉ။

တွၼ်ႈတႃႇ တေၸတ်းႁဵတ်းပၢင်ပွႆးၶႅင်ႇႁိူဝ်း ၾိင်ႈထုင်းတႆး ထုင်ႉပူင်း ပီ 2022 ၼႆႉသေ ပေႃးထိုင်မႃး ဝၼ်းတီႈ 2/9/2022 ယၢမ်းဝၢႆးဝၼ်း 2 မူင်း ယူႇတီႈ ၸုမ်းပွင်ၵၢၼ် ပၢင်ပွႆးၶႅင်ႇႁိူဝ်း တေဢုပ်ႇဢူဝ်းၵုမ်ၵၼ် တီႈဝတ်ႉသၢႆလႅင်းမႂ်ႇ ဝၢၼ်ႈတူၼ်ႈမူင်ႈ ထုင်ႉပူင်းၵႂႃႇ ၼႆယဝ်ႉ။

ပၢင်ပွႆးၶႅင်ႇႁိူဝ်း တီႈထုင်ႉပူင်းၼႆႉ ၸတ်းႁဵတ်းမႃးၵူႈပီ တႃႇၵိုၵ်းပိုၼ်းၼႂ်းထုင်ႈပူင်းမႃး ၸဵမ်မိူဝ်ႈပၢၼ်ရူတ်ႉၵႃး ပႆႇပွင်ႇႁွတ်ႈထိုင်။ မိူဝ်ႈပၢၼ်ၼၼ်ႉ ၼႂ်းထုင်ႉပူင်းၼႆႉ ၸဵမ်ၵႂႃႇၵၢတ်ႇ/ၵႂႃႇပွႆး/ၵႂႃႇဝတ်ႉ/ ၵျွင်း ၸိူင်ႉၼႆႉ ၵမ်ႈၼမ် တေၸႂ်ႉႁိူဝ်းတင်းမူတ်းသေ ၵႂႃႇမႃး ၵၼ် ပဵၼ်ပိူင်လူင်။

မိူဝ်ႈၵူႈပွၵ်ႈတႄႉ ၼႂ်းဝႃႇတင်းသၢမ်လိူၼ်ၼႆႉ ပေႃးဝႃႈ ပဵၼ်ဝၼ်းသိလ်လိူၼ်လပ်းလိူၼ်မူၼ်းၸိုင် တေမီးပွႆးၶႅင်ႇႁိူဝ်း ၵူႈသိလ် ယဝ်ႉၵေႃႈ မီးၾိင်ႈထုင်းပၢင်းသင်ၶၸဝ်ႈၶဝ်ႈသိမ်ႇလႄႈ တင်းၶိုၼ်ႈသိမ်ႇ တင်းပွႆးၶႅင်ႇႁိူဝ်းၼႆႉ ၸတ်းႁဵတ်း ၵိုၵ်းၸွမ်းၵၼ်မႃး ၵူႈသိလ် ၼႆယဝ်ႉ။

ထုင်ႉပူင်းၼႆႉ ပဵၼ်ထုင်ႉဢၼ်ႁၢင်ႈလီ ဢွၵ်ႇမၢၵ်ႇၶဝ်ႈတဝ်ႈၼမ်ႉ ၼႂ်းမိူင်းတႆး ၼမ်လိူဝ်တၢင်ႇတီႈ တၢင်ႇထုင်ႉ။ ယူႇၼႂ်းၼမ်ႉ 6 လိူၼ် ၼိူဝ်ၵွင်း 6 လိူၼ် ။ ၵူၼ်းမိူင်းၼႂ်းထုင်ႉပူင်း ႁဵတ်းၵိၼ်ၵၢၼ်ၼႃး လဵင်ႉတွင်ႉၽုၵ်ႇၶဝ်ႈၼႃးၶဝ်ႈၸဝ်ႉ၊ ၼႃးလူင်ၼႃးလေႃ ၸိူဝ်းၼႆႉ။

ထုင်ႉပူင်းၼႆႉ လႆႈၸႅၵ်ႇဝႆႉပဵၼ် 3 ၾၢႆႇ ။ ၾၢႆႇၼိုင်ႈ တူၵ်းၵႂႃႇၼႂ်းၸႄႈဝဵင်းႁူဝ်ပူင်း ၊ ၾၢႆႇၼိုင်ႈ တူၵ်းၵႂႃႇၼႂ်း ၸႄႈဝဵင်းသီႇသႅင်ႇ ၊ ၾၢႆႇၼိုင်ႈ တူၵ်းတႂ်ႈၸႄႈဝဵင်း တူၼ်ႈတီး ။ ပၢင်ၶႅင်ႇႁိူဝ်း တီႈဝၢၼ်ႈႁူဝ်တၢတ်ႇၼႆႉ တႄႇၸတ်းမႃးမိူဝ်ႈပီ 2015 ၼႆယဝ်ႉ။