ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် မီး 600  ၵမ်ႈၼမ်ပဵၼ်  လုၵ်ႈဢွၼ်ႇလႄႈ ၼၢင်းယိင်း လူဝ်ႇတၢင်းၸွႆႈထႅမ် တႃႇပၢႆးယူႇလီ ယႃႈယႃ ၸိူဝ်းၼႆႉ။

ႁၢင်လိူၼ်ဢေႃႊၵတ်ႊသ်ၼႆႉ ၵူၼ်းမိူင်းပၢႆႈၽေးသိုၵ်း ႁွတ်ႈထိုင်ဝႆႉ တီႈဝတ်ႉၶိူဝ်းၼိမ်း ၸမ် 600 ။ မီးတီႈဝတ်ႉႁူဝ်ၶူဝ် 110 ၵေႃႉ လႄႈ ဝတ်ႉၵလႃးၵွႆး (ကလားကွဲဘုန်းကြီး) ႁူဝ်ၵူၼ်း 150 ပၢႆ ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ႁူမ်ႈၵၼ် ႁူဝ်ၵူၼ်းၸမ် 1,000 ၵေႃႉ ယၢမ်းလဵဝ် ယၢပ်ႇၽိုတ်ႇႁႅင်း လွင်ႈၶဝ်ႈၼမ်ႉတၢင်းၵိၼ်လႄႈ ယႃႈယႃ ၸိူဝ်းၼႆႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် လူဝ်ႇယႃႈယႃၶႃႈဢေႃႈ။ ယဝ်ႉၵေႃႈ ၶဝ်ႈၼမ်ႉတၢင်းၵိၼ် ၸိူဝ်းၼႆႉ ယၢပ်ႇၽိုတ်ႇႁႅင်းၶႃႈ။ ၼၢင်းယိင်းသမ်ႉ လူဝ်ႇၽႃႈႁူဝ်လိူၼ် ၸိူဝ်းၼႆႉ။ မႄႈမၢၼ်းလႄႈ လုၵ်ႈ ဢွၼ်သမ်ႉ လူဝ်ႇယႃႈယႃ ယွၼ်ႉၶၢဝ်းၼႆႉ ပဵၼ်ၶၢဝ်းၾူၼ်လႄႈ တၢင်းပဵၼ်ဝတ်း/ ၶႆႈလိူတ်ႈဢွၵ်ႇ ပဵၼ်ၵၼ်ၼမ်။ ၼႂ်းၼၼ်ႉ ပႃး လုၵ်ႈဢွၼ်ႇ ၵမ်ႈၼမ်”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉၶိူဝ်းၼိမ်းၼႆႉ မီးပႃး မႄႈမၢၼ်း 9 ၵေႃႉ တႃႇ 3 ၵေႃႉသမ်ႉ တေ ၵိူတ်ႇၼႂ်းလိူၼ်ၼႆႉလႄႈ   လူဝ်ႇတၢင်းၸွႆႈထႅမ်  ငိုၼ်းတွင်း ၼႆယဝ်ႉ။

“တီႈဝတ်ႉၶိူဝ်းၼိမ်းၼႆႉ မီးမႄႈမၢၼ်းဝႆႉ 9 ၵေႃႉ ၼႂ်းၼၼ်ႉ တႃႇ 3 ၵေႃႉ တေၵိူတ်ႇလိူၼ်ၼႆႉ ယွၼ်ႉၼၼ်လႄႈ လူဝ်ႇတၢင်းၸွႆႈ ထႅမ် ၵႃႈၸရိတ်ႈတႃႇၵိူတ်ႇလုၵ်ႈ။ တီႈၵူၼ်းပၢႆႈၽေးသိုၵ်း ဝၢၼ်ႈႁူဝ်ၶူဝ်သမ်ႉ လူဝ်ႇတၢင်းၸွႆႈထႅမ် ၼမ်ႉၵိၼ် ယွၼ်ႉလႆႈသိုဝ်ႉ ၵိၼ်လႄႈ ၵွပ်ႈၾူၼ်တူၵ်း ၼမ်ႉၵိၼ်ဢမ်ႇၶႅမ်ႉ”- ၽူႈၸွႆႈထႅမ် ၵူၼ်းပၢႆႈၽေး သိုၵ်း သိုပ်ႇလၢတ်ႈၼႄၼင်ႇၼႆ။

ၵူၼ်းပၢႆႈၽေးသိုၵ်း တီႈၸႄႈဝဵင်းၼွင်ၶဵဝ် ဢၼ်ပၢႆႈမႃးၼႆႉ တင်းမူတ်း ႁူဝ်ၵူၼ်းၸမ် 1,000 မုင်ႉႁေႃႁိူၼ်း 250 လင် ပဵၼ် ၵူၼ်းဝၢၼ်ႈလူင်ၶၢၼ်၊ ဝၢၼ်ႈသူၼ်ဢွႆႈ၊ ဝၢၼ်ႈၼႃးၶၢႆး၊ ဝၢၼ်ႈၼႃးယူၵ်ႇ၊ ဝၢၼ်ႈၵလႃးၵွႆး၊ ဝၢၼ်ႈရတၼႃႇတဵင်ႇၵီႇလႄႈ ဝၢၼ်ႈ ၵုင်းတေႃႇမေႃႈ ဢိၵ်ႇထႅင်ႈလၢႆလၢႆဝၢၼ်ႈ ယွၼ်ႉသိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄၵူၼ်းမိူင်း PDF ယိုဝ်းၵၼ် ဝႃႈ ၼႆ။

မိူဝ်ႈၼႆႉ ဝၼ်းတီႈ 31/8/2022 ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ် တၢင်းဝၢၼ်ႈပၢင်ၸလွပ်ႈ ၼႂ်းၸႄႈဝဵင်းၵျွၵ်ႉမႄး ၵူၼ်းပိုၼ်ႉတီႈလၢတ်ႈ။