ၵူၼ်းမိူင်းယၢင်းလႅင် ဢၼ်ပၢႆႈမႃးသွၼ်ႈဝႆႉ မီးတီႈဝဵင်းပၢင်လွင်း ႁူဝ်ၵူၼ်း 3 ႁဵင်ပၢႆ ပႆႇၸၢင်ႈပွၵ်ႈၶိုၼ်းႁိူၼ်းယေးဝၢၼ်ႈဢိူင်ႇယၢမ်းလဵဝ် လူဝ်ႇတၢင်း ၸွႆႈထႅမ်ၶဝ်ႈၼမ်ႉတၢင်း ၵိၼ် ယၢပ်ႇၽိုတ်ႇၵိၼ်းၸႂ်ႁႅင်း ၵမ်ႈၼမ် ပဵၼ်လုၵ်ႈဢွၼ်ႇ၊ ၼၢင်းယိင်းလႄႈ ၵူၼ်းထဝ်ႈ ။
ပဵၼ်ၵူၼ်းမိူင်း ၼႂ်းၸႄႈဝဵင်းတီးမေႃးသူဝ်ႇ ၸႄႈမိူင်းယၢင်းလႅင် ၵမ်ႈၼမ် ၵူၼ်းဝၢၼ်ႈၸၢဝ်းတႆးလႄႈ ယၢင်းလႅင် ၊ ပၢႆႈၽေးပၢင်တိုၵ်းၼႂ်းၵႄႈသိုၵ်းမၢၼ်ႈလႄႈသိုၵ်းၵႅတ်ႇၶႄ ၵူၼ်းမိူင်းႁူမ်ႈတင်းသိုၵ်း ယၢင်းလႅင်သေ မႃးသွၼ်ႈဝႆႉၸွမ်းႁိူၼ်းယေးပီႈၼွင်ႉၽႂ်မၼ်း ၼႂ်းၸႄႈဝဵင်းပၢင်လွင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ။
ၸဝ်ႈတႃႇၼ ၵႂႃႇမႃးသူႇၸႂ်းၸွႆႈထႅမ်ယၢပ်ႇၼႃႇယဝ်ႉလႄႈယၢမ်းလဵဝ် ၵူၼ်းပၢႆႈၽေးသိုၵ်း လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းပဵၼ် ႁၢဝ်ႈႁႅင်း – ဝႃႈၼႆ ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေး ဢၼ်မႃးမီးတီႈဝဵင်းပၢင်လွင်းၼႆႉ ၶဝ်ဢွၼ်ၵၼ်ပွၵ်ႈၶိုၼ်းႁိူၼ်း ယင်းပႆႇလႆႈလိူၼ်ၶဝ်ပေႃးမႃး ၶိုၼ်းယဝ်ႉဢေႃႈ။ ပွၵ်ႈၼႆႉ ပဵၼ်ၵူၼ်းတုၵ်ႉၶိတ၊ လုၵ်ႈဢွၼ်ႇ၊ ၼၢင်းယိင်းလႄႈ ၵူၼ်းထဝ်ႈ။ ၵူၼ်းၼုမ်ႇၽူႈၸၢႆး ၸိူဝ်းၼႆႉတႄႉ ပႂ်ႉႁိူၼ်းပႂ်ႉဝၢၼ်ႈဢေႃႈ။ ပေႃးဢမ်ႇမီးၵူၼ်းပႂ်ႉသမ်ႈ ၺႃးယႃႉ ၺႃးၽဝ်ၼၼ်ႉၶႃႈၼႃႇ။ ”- ဝႃႈၼႆ။
ၵူၼ်းပၢႆႈၽေးၸိူဝ်းၼႆႉၵမ်ႈၽွင်ႈမႃးသွၼ်ႈယူႇၸွမ်းႁိူၼ်းပီႈၼွင်ႉၵမ်ႈၽွင်ႈမႃးၶၢတ်ႈႁွင်ႈၶၢတ်ႈႁိူၼ်းသေယူႇၸွမ်းၵၼ်ဝႆႉ။ ယၢမ်းလဵဝ် ၵႃႈၶၼ်ၵုၼ်ႇၵိၼ်ယမ်ႉသမ်ႉၵႃႈယႂ်ႇၵူႈၸိူဝ်ႉၵူႈလွင်ႈလႄႈတွၼ်ႈတႃႇၵူၼ်းပၢႆႈၽေးသိုၵ်း ပဵၼ်ဢၼ်ယၢပ်ႇၽိုတ်ႇၵိၼ်းၸႂ်လိူဝ်ႁႅင်း ။ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် ။
“ယၢမ်းလဵဝ် ႁဝ်းၶႃႈ လူဝ်ႇၽူႈမီးၼမ်ႉၸႂ်ၸေႇတၼႃႇၶဝ်ၶႃႈဢေႃႈ လူဝ်ႇတၢင်းၸွႆႈထႅမ် ၶဝ်ႈသၢၼ်၊ ၼမ်ႉမၼ်း၊ ယႃႈယႃ၊ ၵိူဝ် တၢင်းၵိၼ်တၢင်းယႅမ်ႉၸိူဝ်းၼႆႉ။ မၢင်ၵေႃႉ ႁိူၼ်းယေးၶဝ်ၺႃးၽဝ်ယဝ်ႉ၊ မၢင်ၵေႃႉၵႃႈႁိူၼ်းၶဝ်ၺႃးယႃႉဢေႃႈ။ သင်ဝႃႈပွၵ်ႈၶိုၼ်းၵေႃႈဢမ်ႇၸၢင်ႈ ႁဵတ်းႁိုဝ်ႁႃၵိၼ်လဵင်ႉတွင်ႉယဝ်ႉလႄႈ ဢွၼ်ၵၼ်ပၢႆႈၵႂႃႇမိူင်းထႆးၵေႃႈၼမ်ၼႃႇယဝ်ႉၶႃႈ”- ၽူႈၸွႆႈထႅမ် ၵူၼ်းပၢႆႈၽေး သိုပ်ႇလၢတ်ႈ ၼင်ႇၼႆ။
လိူဝ်ၼၼ်ႉ ဢၼ်လူဝ်ႇတၢင်းၸွႆႈထႅမ် ႁႅင်းထႅင်ႈတႄႉ ၾၢႆႇပၢႆးယူႇလီ ယႃႈယႃ ၸိူဝ်းၼႆႉ။ ယႃႁႅင်းလႄႈ ဢႁႃႇရလုၵ်ႈ ဢွၼ်ႇ ၵေႃႈႁႃသိုဝ်ႉယၢပ်ႇ။ ယႃႈယႃ ပႃႊရႃႊသီႊတမေႃႉ ၵူႈပွၵ်ႈ 1 ဢႅပ်ႇ 1,000 ပျႃး တေႃႇလဵဝ်ၶိုၼ်ႈပဵၼ် 2,000 ပျႃး ။
ၵူၼ်းပၢႆႈၽေးသိုၵ်းဢၼ်မႃးမီး တီႈဝဵင်းပၢင်လွင်းၼႆႉ ၼွၵ်ႈလိူဝ်သေ ၵူၼ်းၼႂ်းၸႄႈဝဵင်းတီးမေႃးသူဝ်ႇယဝ်ႉ ဢၼ်လုၵ်ႉၼႂ်းၸႄႈဝဵင်းလွႆၶေႃ ၊မိူင်းပၢႆး – ၾၢႆၶုၼ် ၸိူဝ်းၼႆႉမႃးၵေႃႈမီး။
တႄႇဢဝ် ႁူဝ်ပီၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း လၢႆပိုၼ်ႉတီႈ ၼႂ်းၸႄႈမိူင်းယၢင်းလႅင်။ ၾၢႆၶုၼ်လႄႈ မိူင်းပၢႆး ၸိူဝ်းၼႆႉ ႁဵတ်းႁႂ်ႈၵူၼ်းမိူင်း ဢွၼ်ၵၼ်ပၢႆႈ ႁွတ်ႈထိုင် မိူင်းတႆး ပွတ်းၸၢၼ်း လၢႆၸႄႈဝဵင်း ႁူဝ်ၵူၼ်းၼပ်ႉႁူဝ်မိုၼ်ႇ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ