PDF ဝဵင်းလိူဝ်ႇတင်း ၶွင်ႇသီႇသိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်းၵၼ် ၼႂ်းၶၢဝ်းတၢင်းလိူၼ်ၼႆႉ ဢမ်ႇယွမ်း 7 ပွၵ်ႈ၊ သွင်ၾၢႆႇ မီးလွင်ႈမၢတ်ႇၸဵပ်းလူႉတၢႆ  ။

ၼႂ်းလိူၼ်ဢေႃႊၵတ်ႊသ်ၼႆႉ ၸုမ်းၵႅတ်ႇၶႄၵူၼ်းမိူင်း PDF တၢင်းဝဵင်းတပဵၵ်ႉၵျိၼ်း တွၼ်ႈၼိူဝ် တိူင်းဝဵင်းလိူဝ်ႇတင်း ၶွင်ႇသီႇ သိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ဢမ်ႇယွမ်း 7 ပွၵ်ႈ တင်းၾၢႆႇ PDF မၢတ်ႇ/ တၢႆ 10 ပၢႆ၊ ၾၢႆႇသိုၵ်းမၢၼ်ႈသမ်ႉ တၢႆ/မၢတ်ႇ မွၵ်ႈ 20 ၵေႃႉ  ။

ၵူၼ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၽွင်း PDF ဝဵင်းလိူဝ်ႇ မႃးတူင်ႉၼိုင် တီႈမိူင်းမိတ်ႈၼႆႉ ၶဝ်ပဵၼ်ပၢင်တိုၵ်း ၵၼ် တင်းသိုၵ်းမၢၼ်ႈၼႆႉ မွၵ်ႈ 7 ပွၵ်ႈ။ ၾၢႆႇ PDF မၢတ်ႇတၢႆ 10 ပၢႆ ၊ သိုၵ်းမၢၼ်ႈသမ်ႉ ဢမ်ႇယွမ်း 17 ၵေႃႉ။ ယၢမ်းလဵဝ် PDF ၼႆႉ ၶၢႆႉၵႂႃႇတူင်ႉၼိုင် တၢင်းၾၢႆႇၸၢၼ်းဝၼ်းတူၵ်း မိူင်းၵုတ်ႈဝႆႉယဝ်ႉ။”- ဝႃႈၼႆ။

ၸုမ်း PDF တွၼ်ႈၼိူဝ် ဝဵင်းလိူဝ်ႇ ဢၼ်ၶိုၼ်ႈမႃးတူင်ႉၼိုင် ၼႂ်းမိူင်းတႆးပွတ်းႁွင်ႇၼႆႉ ဢဵၼ်ႁႅင်းတေမီး 260 ၵေႃႉ။   ၸုမ်း PDF ၼႂ်းပိုၼ်ႉတီႈမိူင်းမိတ်ႈ ဢၼ်မီးဝႆႉၾၢႆႇတႂ်ႈသိုၵ်းၶၢင် KIA ၵုမ်းၵမ်ဝႆႉၼၼ်ႉတႄႉ တိုၵ်ႉတူင်ႉၼိုင်ယူႇဝႆႉ မိူၼ်ၵဝ်ႇၵူၺ်း ပႆႇၶဝ်ႈႁူမ်ႈ ပဵၼ်ဢၼ်လဵဝ်ၵၼ်။

မိူဝ်ႈဝၼ်းတီႈ 3/8/2022 ပူၼ်ႉမႃးၼႆႉ ၶွင်ႇသီႇသိုၵ်းမၢၼ်ႈ ယိုတ်းမိူင်း တပ်ႉၶလယ 348 တင်း ၸုမ်း PDF ဝဵင်းလိူဝ်ႇ ဢၼ် ၽႄၶိုၼ်ႈမႃးမိူင်းတႆး 3 ငႃး   ပဵၼ်ပၢင်တိုၵ်းၵၼ် တၢင်းၶဝ်ႈဝဵင်းမိူင်းမိတ်ႈ ၸဵင်ႇၸၢၼ်းဝၼ်းတူၵ်း ႁိမ်း ဝၢၼ်ႈၺွင်ႇပၢင်ႇၸွၵ်ႉ ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ။

ၼႂ်းၸႄႈဝဵင်းမိူင်းမိတ်ႈၼႆႉ တပ်ႉသိုၵ်းမၢၼ်ႈ တူင်ႉၼိုင်ပၵ်းယူႇဝႆႉ တင်းမူတ်း 3 တပ်ႉၵွင် တေပဵၼ်တပ်ႉၵွင် 276, 348 လႄႈ 223 ၸိူဝ်းၼႆႉ။

ယၢမ်းလဵဝ် ၼႂ်းၸႄႈဝဵင်းမိူင်းမိတ်ႈၼႆႉ မီးဝႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တူင်ႉၼိုင်ယူႇဝႆႉ မိူၼ်ၼင်ႇ သိုၵ်းမၢၼ်ႈ ယိုတ်းမိူင်း၊ သိုၵ်းၶၢင် KIA ၊ သိုၵ်းတဢၢင်း TNLA ၊ PDF (ၵဝ်ႇ) တင်း သိုၵ်းတႆး SSPP ၸိူဝ်းၼႆႉ။