တီႈဝဵင်းႁူဝ်ပူင်းၸိုင်ႈတႆးပွတ်းၸၢၼ်း သိုၵ်းမၢၼ်ႈလႄႈသိုၵ်းပျီႇတူႉၸိတ်ႉႁူမ်ႈၵၼ်ပႂ်ႉၵဵပ်းငိုၼ်းတီႈၸဝ်ႈၵႃးလႄႈၵူၼ်းဢွၵ်ႇၶၢဝ်းတၢင်း ၸိူဝ်းလတ်းၵႂႃႇမႃးၼႂ်းဝဵင်းဢမ်ႇထၢတ်ႇ။
ၸိူဝ်းၶဝ်ႁဵတ်းသုမ်ႉသေပႂ်ႉၵဵပ်းတီႈတၢင်းလုၵ်ႉႁူဝ်ပူင်းဢွၵ်ႇၵႂႃႇၸူးဝဵင်းသီႇသႅင်ႇ။ ပၼ်ႇပုတ်ႈၵၼ်ပႂ်ႉၵဵပ်းငိုၼ်းတင်းဝၼ်းတင်းၶိုၼ်း ၵူၼ်းမိူင်းႁူဝ်ပူင်းၵေႃႉၼိုင်ႈလၢတ်ႈၼင်ႇၼႆ။
“ဝၢႆးလင်သိုၵ်းမၢၼ်ႈယိုတ်းမိူင်းယဝ်ႉဢမ်ႇပေႃးႁိုင်ၶဝ်ၵေႃႈမႃးတင်ႈသုမ်ႉသေ ပႂ်ႉၵဵပ်းငိုၼ်းတင်းဝၼ်းတင်းၶိုၼ်းၶႃႈဢေႃႈ။ ပေႃးပဵၼ်ၵူၼ်းၼႂ်းဝဵင်း လႄႈႁိမ်းႁွမ်းဝဵင်း ၸိူဝ်းမိုတ်ႈၵိုဝ်းႁူႉၸၵ်းၵၼ်တင်းၶဝ်ၼႆတႄႉ ၵဵပ်း ၵႃး လမ်း 4000 ပျႃးၸိူဝ်းၼႆႉၵူၺ်း ။ ပေႃးပဵၼ်လုၵ်ႉတၢင်ႇတီႈမႃးတႄႉ ၼိုင်ႈလမ်း ၼိုင်ႈမိုၼ်ႇပျႃးၶိုၼ်ႈၼိူဝ်ဢေႃႈၶဝ်ၵဵပ်း”
ၵူၼ်းမိူင်းႁူဝ်ပူင်းလၢတ်ႈဝႃႈ ပဵၼ်သိုၵ်းပျီႇတူႉၸိတ်ႉပဢူဝ်း PNO လႄႈသိုၵ်းမၢၼ်ႈႁူမ်ႈၵၼ်ပႂ်ႉၵဵပ်းငိုၼ်း။ ပေႃးဢမ်ႇလမ်ႇလွင်ႈႁႅင်းဢႃးလႃး ၵူၼ်းပိုၼ်ႉတီႈ ယင်းဢမ်ႇၶႂ်ႈၶဝ်ႈ/ဢွၵ်ႇဝဵင်းဝႃႈၼႆ။
“မၢင်ပွၵ်ႈၶဝ်ႁိုတ်းႁၢတ်ႇၸၢတ်ႇသႂ်ႇသေၵဵပ်းငိုၼ်းလႄႈၵူၼ်းဝၢၼ်ႈ တၢင်းၼိူဝ်လွႆၸိူဝ်းၼႆႉ ဢမ်ႇလႃႈလီႈလူင်းမႃး။ ပိူၼ်ႈၵူဝ်၊ ဢိမ်ႇၸၢၼ်ႈၶဝ်ၶႃႈဢိူဝ်ႈ။ပဵၼ်ႁိုဝ်ၵေႃႈတုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉၵူၼ်းမိူင်းတိၵ်းတိၵ်းၵူၺ်းယဝ်ႉ” ၵူၼ်းပိုၼ်ႉတီႈလၢတ်ႈၼင်ႇၼႆ။
ယၢမ်းလဵဝ် တင်းမိူင်းပတ်းပိုၼ်ႉ ၵႃႈၶၼ်ၵုၼ်ႇသုင်၊ ၶၼ်ၼမ်ႉမၼ်းၸိူဝ်ႉၾႆးသုင်၊ ပၢႆးမၢၵ်ႈမီးတူၵ်း ႁႃၵိၼ်လဵင်ႉတွင်ႉယၢပ်ႇ။ သိုၵ်းမၢၼ်ႈသမ်ႉမႃးပႂ်ႉၵဵပ်းငိုၼ်းတီႈၵူၼ်းဝၢၼ်ႈထႅင်ႈၸိူင်ႉၼႆ ယိင်ႈၶႅၼ်းႁဵတ်းႁႂ်ႈၵူၼ်းဝၢၼ်ႈယၢပ်ႇၵိၼ်းၶၢၼ်ၸႂ် လွင်ႈၵႂႃႇမႃးႁႃၵိၼ်လဵင်ႉတွင်ႉ ၵူၼ်းမိူင်းႁူဝ်ပူင်းလၢတ်ႈၼင်ႇၼႆ။
ၵဵတ်ႉ/လၢၼ်ႇ ၸိူဝ်းပႂ်ႉၵဵပ်းငိုၼ်း ၵူၼ်းမိူင်း ၸဝ်ႈၵႃးၵႂႃႇမႃးၸိူဝ်းၼႆႉ ၽွင်းပၢၼ်လူင်ပွင်ၸိုင်ႈၵူၼ်းမိူင်းလိူၵ်ႈတင်ႈၼၼ်ႉ ၸွမ်ၸိုင်ႈတဵင်းၸဵင်ႇ ယၢမ်ႈပိုၼ်ၽၢဝ်ႇပဵၼ်တၢင်းၵၢၼ်ဝႃႈ ႁႂ်ႈပူတ်းပႅတ်ႈမူတ်းမူတ်း ၼႆလႄႈ ႁၢႆ/ယဵၼ်ၵႂႃႇမွၵ်ႈ 7-8 ပီ။ ၵူၺ်းၵႃႈၽွင်းသိုၵ်းမၢၼ်ႈယိုတ်းမိူင်းမႃးၼႂ်းၶၢဝ်းတၢင်း ပီပၢႆၼႆႉ ၶိုၼ်းမီးမႃး ၵူႈဝဵင်း။
