ၵဵၵ်ႉ

တီႈဝဵင်းႁူဝ်ပူင်းၸိုင်ႈတႆးပွတ်းၸၢၼ်း သိုၵ်းမၢၼ်ႈလႄႈသိုၵ်းပျီႇတူႉၸိတ်ႉႁူမ်ႈၵၼ်ပႂ်ႉၵဵပ်းငိုၼ်းတီႈၸဝ်ႈၵႃးလႄႈၵူၼ်းဢွၵ်ႇၶၢဝ်းတၢင်း ၸိူဝ်းလတ်းၵႂႃႇမႃးၼႂ်းဝဵင်းဢမ်ႇထၢတ်ႇ။ ၸိူဝ်းၶဝ်ႁဵတ်းသုမ်ႉသေပႂ်ႉၵဵပ်းတီႈတၢင်းလုၵ်ႉႁူဝ်ပူင်းဢွၵ်ႇၵႂႃႇၸူးဝဵင်းသီႇသႅင်ႇ။ ပၼ်ႇပုတ်ႈၵၼ်ပႂ်ႉၵဵပ်းငိုၼ်းတင်းဝၼ်းတင်းၶိုၼ်း ၵူၼ်းမိူင်းႁူဝ်ပူင်းၵေႃႉၼိုင်ႈလၢတ်ႈၼင်ႇၼႆ။ “ဝၢႆးလင်သိုၵ်းမၢၼ်ႈယိုတ်းမိူင်းယဝ်ႉဢမ်ႇပေႃးႁိုင်ၶဝ်ၵေႃႈမႃးတင်ႈသုမ်ႉသေ ပႂ်ႉၵဵပ်းငိုၼ်းတင်းဝၼ်းတင်းၶိုၼ်းၶႃႈဢေႃႈ။ ပေႃးပဵၼ်ၵူၼ်းၼႂ်းဝဵင်း လႄႈႁိမ်းႁွမ်းဝဵင်း ၸိူဝ်းမိုတ်ႈၵိုဝ်းႁူႉၸၵ်းၵၼ်တင်းၶဝ်ၼႆတႄႉ ၵဵပ်း ၵႃး လမ်း 4000 ပျႃးၸိူဝ်းၼႆႉၵူၺ်း ။ ပေႃးပဵၼ်လုၵ်ႉတၢင်ႇတီႈမႃးတႄႉ ၼိုင်ႈလမ်း ၼိုင်ႈမိုၼ်ႇပျႃးၶိုၼ်ႈၼိူဝ်ဢေႃႈၶဝ်ၵဵပ်း” ၵူၼ်းမိူင်းႁူဝ်ပူင်းလၢတ်ႈဝႃႈ ပဵၼ်သိုၵ်းပျီႇတူႉၸိတ်ႉပဢူဝ်း PNO လႄႈသိုၵ်းမၢၼ်ႈႁူမ်ႈၵၼ်ပႂ်ႉၵဵပ်းငိုၼ်း။ ပေႃးဢမ်ႇလမ်ႇလွင်ႈႁႅင်းဢႃးလႃး ၵူၼ်းပိုၼ်ႉတီႈ ယင်းဢမ်ႇၶႂ်ႈၶဝ်ႈ/ဢွၵ်ႇဝဵင်းဝႃႈၼႆ။ “မၢင်ပွၵ်ႈၶဝ်ႁိုတ်းႁၢတ်ႇၸၢတ်ႇသႂ်ႇသေၵဵပ်းငိုၼ်းလႄႈၵူၼ်းဝၢၼ်ႈ...