မိူဝ်ႈၼႆႉ ဝၼ်းတီႈ 25/8/2022 ယၢမ်းၵၢင်ၼႂ် 8:40 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်း တင်း သိုၵ်းၶၢင် KIA ပဵၼ်ပၢင် တိုၵ်းၵၼ် ႁၢဝ်ႈႁႅင်း ၼႂ်းၵႄႈဝၢၼ်ႈပၢင်ဝႃ (ပန်ဝါကျေးရွာ) လႄႈ ဝၢၼ်ႈၼႃးလိူဝ်ႇ (နားလေကျေးရွာ) ၼႂ်းၸႄႈဝဵင်းမၢၼ်ႈ တူင်ႈ ၸိုင်ႈတႆးပွတ်းႁွင်ႇ။
ၵူၼ်းမၢၼ်ႈတူင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ သိုၵ်းမၢၼ်ႈ လုၵ်ႉတီႈၼႂ်းတပ်ႉၶဝ် 324 ယိုဝ်းၵွင်ႈလူင်ၸွႆႈ ဢမ်ႇယွမ်း 10 လုၵ်ႈယဝ်ႉ။ တေႃႇထိုင်ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ ပႆႇယဵၼ်။ လွင်ႈၵူၼ်းမိူင်းပၢႆႈၽေးသိုၵ်းတႄႉ ပႆႇမီးၶႃႈ ”- ဝႃႈၼႆ။
ပၢင်တိုၵ်းသိုၵ်းမၢၼ်ႈတင်း သိုၵ်းၶၢင် တီႈၸႄႈဝဵင်းမၢၼ်ႈတူင်ႈၼႆႉ တႄႇပဵၼ်မိူဝ်ႈဝၼ်းတီႈ 21 ၼၼ်ႉမႃး တေႃႇထိုင်ယၢမ်း လဵဝ် တင်းသွင်ၾၢႆႇ မီးလွင်ႈမၢတ်ႇၸဵပ်းလူႉတၢႆ ၼင်ႇၵၼ်။
“လွင်ႈမၢတ်ႇၸဵပ်းလူႉတၢႆၶဝ်တင်းသွင်ၾၢႆႇတႄႉ မီးဢေႃႈ ၵူၺ်းၵႃႈ မၢတ်ႇလၢႆၵေႃႉ/ တၢႆလၢႆၵေႃႉတႄႉ ဢမ်ႇႁူႉ။ ႁၼ်သိုၵ်း မၢၼ်ႈ တေႃႉၵူၼ်းမၢတ်ႇၸဵပ်းလူႉတၢႆၶဝ် ၶဝ်ႈယူတ်းယႃတူဝ်တီႈတပ်ႉ 324 ၼၼ်ႉယူႇ”- ၵူၼ်းမၢၼ်ႈတူင်ႈ သိုပ်ႇလၢတ်ႈၼႄ ၼင်ႇၼႆ။
သိုၵ်းၶၢင် KIA ဢၼ်ပဵၼ်ပၢင်တိုၵ်းၵၼ်တင်း သိုၵ်းမၢၼ်ႈၼႆႉ လုၵ်ႉတၢင်းၸႄႈဝဵင်းမိူင်းမွၵ်ႇ ၸႄႈမိူင်းၶၢင်မႃးတူင်ႉၼိုင်။ တပ်ႉ သိုၵ်းမၢၼ်ႈ 324 သမ်ႉ ပၵ်းဝႆႉ တီႈၸႄႈဝဵင်းၼမ်ႉတူႈ ယၢၼ်ၵႆၵၼ် ဢွင်ႈတီႈပၢင်တိုၵ်းၼႆႉ မွၵ်ႈ 10 လၵ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ