ၾူၼ်တူၵ်း ႁၢဝ်ႈႁႅင်းလၢႆဝၼ်းထပ်းၵၼ် ၼမ်ႉလုပ်ႇထူမ်ႈ ၼႃးၵူၼ်းမိူင်း ၼႂ်းထုင်ႉပူင်း လူႉသုမ်း ဢမ်ႇယွမ်း 2 မိုၼ်ႇ ဢေႊၵ။

တႄႇဢဝ် ႁူဝ်လိူၼ်ဢေႃႊၵတ်ႊသ်ၼႆႉမႃး ၾူၼ်တူၵ်းထပ်းၵၼ်ႁၢဝ်ႈႁႅင်း ၼမ်ႉလုပ်ႇထူမ်ႈၼႃးၵူၼ်းမိူင်း ၼႂ်းထုင်ႉပူင်း ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၼႃးလူႉသုမ်း 2 မိုၼ်ႇဢေႊၵပၢႆ ႁဵတ်းႁႂ်ႈၵူၼ်းမိူင်းထူပ်း တၢင်းယၢပ်ႇႁႅင်း တႃႇၵိၼ် ၼႂ်းပီတေမႃး ၸိူဝ်းၼႆႉ။

ၸဝ်ႈၼႃးထုင်ႉပူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၼႂ်းထုင်ႉပူင်းၼႆႉ ပဵၼ်ၶၢဝ်းဢဝ်ၶဝ်ႈၸဝ်ႉလႄႈ သွမ်ႈၵႃႈ ၶဝ်ႈႁိုဝ်ႉ။ ၶဝ်ႈၸဝ်ႉၸိူဝ်းပၢတ်ႇယဝ်ႉသေ ယင်ဝႆႉတီႈႁၢဝ်းၼၼ်ႉ ၼမ်ႉထူမ်ႈထိုင်ပႃးလႄႈ ယၢမ်းလဵဝ် ၶဝ်ႈၶိုၼ်းဢွၵ်ႇငွင်ႉဢွၵ်ႇငူင်း မႃးမူတ်းယဝ်ႉ။ တီႈထုင်ႉပူင်းၼႆႉ ၼႃးတင်းမူတ်းမီး 3 မိုၼ်ႇဢေႊၵပၢႆ။ ယၢမ်းလဵဝ် ၼမ်ႉထူမ်ႈလႄႈမၢၵ်ႇၶဝ်ႈတဝ်ႈၼမ်ႉ လူႉ သုမ်းၵႂႃႇ တႃႇ 2 မိုၼ်ႇဢေႊၵပၢႆ”- ဝႃႈၼႆ။

ၶဝ်ႈထုင်ႉပူင်းၼႆႉ လဵင်ႉလႆႈၵူၼ်းမိူင်းတႆး ပွတ်းၸၢၼ်းတင်းမူတ်းသေဢမ်ႇၵႃး တၢင်ႇၶၢႆပႃးထိုင်မိူင်းမၢၼ်ႈ တူင်ႈပဵင်း ၸိူဝ်းၼႆႉ ထႅင်ႈ။ ၶဝ်ႈထုင်ႉပူင်းပဵၼ်ၼႆႉ ပဵၼ်ၶဝ်ႈဢၼ်ၵိၼ်ဝၢၼ်သုတ်းၼႂ်းမိူင်းႁူမ်ႈတုမ်။ ယၢမ်းလဵဝ် ယွၼ်ႉၵၢၼ်မိူင်း၊ ၽႄႈတၢင်းပဵၼ် ၵႃႇလလႄႈ ၺႃးၽေးသၽႃႇဝထႅင်ႈ ၸိူင်ႉၼႆသေ ၵူၼ်းမိူင်းထုင်ႉပူင်း ဢွၼ်ၵၼ်ယၢပ်ႇၽိုတ်ႇၶဝ်ႈတႃႇၵိၼ်။ ႁႃသိုဝ်ႉယၢပ်ႇ။

ၶဝ်ႈသၢၼ် ဢၼ်ၶၢႆယူႇၼႂ်းၵၢတ်ႇ ၼႂ်းမိူင်းတႆးဝၼ်းမိူဝ်ႈၼႆႉ ထူင်ယႂ်ႇ ၼိုင်ႈထူင်မီး 2 တၢင်၊ ပေႃးပဵၼ်ၶဝ်ႈဝၢၼ်ဢၼ်ဢွၵ်ႇထုင်ႉပူင်း ယၢမ်း လဵဝ် သိုဝ်ႉၶၢႆၵၼ်ၼႂ်းၵၢတ်ႇ ၶႂၢႆး 3 မိုၼ်ႇထိုင် 4 မိုၼ်ႇပျႃး။ ပေႃးပဵၼ်ထူင်ၼိုင်ႈတၢင်ၼႆ မီးၵႃႈၶၼ်ထိုင် 60000 ပျႃး ထိုင် 70000 ပျႃးၼႆယဝ်ႉ။

ယၢမ်းလဵဝ် ၼမ်ႉသမ်ႉမႃးထူမ်ႈ ၼႂ်းပူင်းထႅင်ႈ တေႃႇထိုင်ဝၼ်းမိူဝ်ႈၼႆႉ ၼမ်ႉပႆႇယွမ်း။ ၸဝ်ႈၼႃးထုင်ႉပူင်းတႄႉ လွမ်မႆႈၸႂ်ဝႆႉဝႃႈ ၼႂ်းပီတေမႃး ၵူၼ်းမိူင်းတႆးပွတ်းၸၢၼ်း တေယၢပ်ႇၽိုတ်ႇၶဝ်ႈၵိၼ် ၼႆယဝ်ႉ။

တင်ႈဢဝ်ႁူဝ်လိူၼ်ဢေႃႊၵတ်ႉသ်ၼႆႉမႃး ၾူၼ်တူၵ်းဢမ်ႇထၢတ်ႇ ၼမ်ႉထူမ်ႈၼႂ်းၸိူင်ႈတႆးလၢႆလၢႆဝဵင်း။ ၼႂ်းထုင်ႉပူင်း ဢၼ်ယူႇ ၼႂ်းၸႄႈဝဵင်းသီႇသႅင်ႇ ႁူဝ်ပူင်း တူၼ်ႈတီးၼၼ်ႉ ၼမ်ႉထူမ်ႈၼႃး  တၢင်းသုင်မီးထိုင် 6 ပေႇ။ ထူမ်ႈပႃးမၢၵ်ႇၶဝ်ႈတဝ်ႈၼမ်ႉၼႂ်း သူၼ်မူတ်းလႄႈ ၶဝ်ႈတႃႇၶၢႆ တႃႇၵိၼ်ၼႂ်းပီ ၼႆယဝ်ႉ။