မႄႈမၢၼ်း ဢႃယု 30 ပၢႆ ၵေႃႉၼိုင်ႈ ၵူၼ်းဝဵင်းတၢင်ႉယၢၼ်း ၺႃးၵူၼ်းၸုမ်းၼိုင်ႈႁႄႉၸူၼ် ၶူဝ်းၶွင်ငိုၼ်း ၶမ်း ပႃးၸဵမ်ရူတ်ႉၵႃးဢၼ်မၼ်းၼၢင်းႁေႃႈမႃး ပဵၼ်ရူတ်ႉၵႃးToyota Wish ၊ ၸူၼ်ၼၼ်ႉပိတ်ႉပေႃႉမၼ်းၼၢင်းပႃးထႅင်ႈ။
မိူဝ်ႈဝႃး ဝၼ်းတီႈ 16/8/2022 ယၢမ်းၵၢင်ဝၼ်းမွၵ်ႈ 11 မူင်း မႄႈမၢၼ်းၵေႃႉၼိုင်ႈ ဢႃယု 30 ပၢႆ ဢၢၼ်း ၵႂႃႇ ႁႃမေႃယႃ ၾၢႆႇလုမ်းလႃးမႄႈလႄႈလုၵ်ႈဢွၼ်ႇ (OG) တီႈႁွင်ႈယႃ (ဆေးခန်း) ။ ၽွင်းၼၼ်ႉ ၽူႈၸၢႆး 2 ၵေႃႉ သွၼ်ႉရူတ်ႉၶိူင်ႈၸွမ်းၵၼ်မႃးၵိုတ်းၼႃႈရူတ်ႉၵႃးမၼ်းၼၢင်းသေ ၸူၼ်ဢဝ်ငိုၼ်းတွင်း ရူတ်ႉၵႃးမၼ်းၼၢင်း တီႈပွၵ်ႉ 2 ဝဵင်းတၢင်ႉယၢၼ်း တီႈသဵၼ်ႈတၢင်း ပျီႇတေႃႇသႃႇ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ။
ၵူၼ်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်း တေၵႂႃႇ သေးၶၢၼ်းသေ ထုၵ်ႇၵူၼ်းႁၢႆႉသွၼ်ႉရူတ်ႉ ၶိူင်ႈ click သွင်ၵေႃႉ လမ်းၼိုင်ႈ မႃးတတ်းၼႃႈၵႃးမၼ်းၼၢင်း။ ၵႃး Mark 2 သီၶၢဝ် လမ်းၼိုင်ႈသမ်ႉ ၵိုတ်းပိၵ်ႉၵူၼ်ႈၵႃး မၼ်း။ ၵူၼ်းႁၢႆႉၼၼ်ႉ ဢဝ်မိတ်ႈငႃမၼ်းၼၢင်း ၸူၼ်ဢဝ်ၵႂႃႇ ၵႃး၊ ငိုၼ်းသႅၼ်ပၢႆလႄႈ ၾူၼ်း။ ယဝ်ႉၵေႃႈ ၵူၼ်းႁၢႆႉၼၼ်ႉ ပၢႆ ပိတ်ႉသႂ်ႇမၼ်းၼၢင်း တီႈဢႅဝ်တၢင်းလင် ၵမ်းၼိုင်ႈသေ လူမ်ႉၵႂႃႇ ၼိူဝ်တၢင်းၼၼ်ႉ။ ၵတ်းၵႃႈ ဢမ်ႇ တုမ်ႉတိူဝ်ႉပႃးလုၵ်ႈဢွၼ်ႇၼႂ်းတွင်ႉၵွၼ်ႇၶႃႈဢေႃႈ”- ဝႃႈၼႆ။
ၵူၼ်းၸူၼ် 2 ၵေႃႉၼၼ်ႉပဵၼ်ၽႂ်လုၵ်ႉလႂ်မႃးဢမ်ႇပႆႇႁူႉ။ ၵူၺ်းၵႃႈၵူၼ်းႁိူၼ်းမၼ်းၼၢင်းတႄႉ ၵႂႃႇတိူင်ႇလၢတ်ႈဝႆႉ တီႈႁူင်းပလိၵ်ႈ ႁႂ်ႈၸွႆႈႁႃပၼ်ၶိုၼ်းရူတ်ႉၵႃး။
“ယၢမ်းလဵဝ် ၼႂ်းတၢင်ႉယၢၼ်းႁဝ်းၶႃႈၼႆႉ ဢမ်ႇမီးလွင်ႈႁူမ်ႇလူမ်ႈသင်ယဝ်ႉ။ တေႃႈၼင်ႇ ႁေႃႈၵႃးၵႂႃႇ မႃးၵေႃႈ ယင်းၺႃးၸူၼ်။ ပဵၼ်ဢၼ်လီမႆႈၸႂ်တႄႉ ၽူႈမီးပုၼ်ႈၽွၼ်းၶဝ် ဢမ်ႇဢဝ်ႁူမ်ႇလူမ်ႈ ဢဝ်ပုၼ်ႈၽွၼ်းတူၺ်းထိုင်ၵူၼ်းမိူင်းသင်”- ၵူၼ်းတၢင်ႉ ယၢၼ်းသိုပ်ႇလၢတ်ၼႄၼင်ႇၼႆ။
တေႃႇထိုင်ယၢမ်းလဵဝ် တိုၵ်ႉႁူမ်ႈၵၼ်ၸွမ်းႁႃရူတ်ႉၵႃးၼၼ်ႉယူႇတိၵ်းတိၵ်း။ ရူတ်ႉၵႃးၼႆႉ ၵႂႃႇႁၢႆဝႆႉတီႈ ၼႂ်းၵႄႈဝၢၼ်ႈႁူဝ်ယ လႄႈ ၼမ်ႉမ ၼမ်ႉပွင်ႈ ၊ လႅၼ်လိၼ်လႃႈသဵဝ်ႈ မိူင်းယႆ သီႇပေႃႉ ၵူၼ်းတၢင်ႉယၢၼ်းလၢတ်ႈၼင်ႇၼႆ ။
ပူၼ်ႉမႃး မိူဝ်ႈလိူၼ်ဢေႊပရိူဝ်ႊၼၼ်ႉၵေႃႈ ၽူႈၸၢႆးၵေႃႉၼိုင်ႈ ၵႂႃႇပၢင်ၶႅၵ်ႇပွၵ်ႈမႃး ၺႃးၸူၼ် ၸွမ်းတၢင်း တီႈပွၵ်ႉ 5 ဝဵင်းတၢင်ႉ ယၢၼ်း ၼင်ႇၵဝ်ႇ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၼႂ်းၸႄႈဝဵင်းတၢင်ႉယၢၼ်းၼႆႉ မီးပၢင်တေႃႇလွင်းလိူင်ႇၼမ် ၽူႈလၵ်ႉၸၵ်ႉၶုတ်ႈ ယိုင်ႈၶႅၼ်းၼမ် ႁႅင်း ယူႇတီႈ ပလိၵ်ႈ/ သိုၵ်းမၢၼ်ႈၵေႃႈၶဝ်ၵေႃႈ ဢမ်ႇဢဝ်ႁူမ်ႇလူမ်ႈ၊ ဢမ်ႇလိုပ်ႈလမ်းတီႈၺွပ်းၵူၼ်းႁၢႆႉ၊ ဢမ်ႇၸွႆႈထႅမ်ပၼ်ၵူၼ်းမိူင်းသင် ။
