ပၢင်တေႃႇလွင်း တီႈဝဵင်းၵျွၵ်ႉမႄး လိူင်ႇၼမ် ၶၢဝ်းယၢဝ်း ၵူၼ်းၵႂႃႇလွင်းသုမ်းၼမ် ထိုင်တီႈလႆႈဢဝ်ရူတ်ႉၵႃး ၊ ထူဝ်ႈ၊ ၾူၼ်း ၵႂႃႇၵမ်ႉလႅၵ်ႈငိုၼ်း ၼိုင်ႈဝၼ်းဢမ်ႇယွမ်း 4-5 ၵေႃႉ၊ ပဵၼ်ၼီႈပဵၼ်ၶွတ်ႇသေ ပွၵ်ႈႁိူၼ်း ။
ယၢမ်းလဵဝ် ပၢင်တေႃႇလွင်း တီႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ပိုတ်ႇလဵၼ်ႈတေႃႇလွင်းၵၼ် ၵိုၼ်းၶွၼ်ႈ တင်းဝၼ်း/ ၶိုၼ်း ၊ ပၢင်လွင်းမီးတီႈပွၵ်ႉ 8 တီႈၼိုင်ႈ၊ ႁိမ်းၵၢတ်ႇလူင် တီႈၼိုင်ႈလႄႈ ပွၵ်ႉ 9 တီႈၼိုင်ႈ ။
ၵူၼ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “တီႈပွၵ်ႉ 8 ၼႆႉ ၼိုင်ႈဝၼ်းလႂ် ၶဝ်မႃးထၢမ်ပွင်ႇ/ၵမ်ႉ ၵႃး၊ ထူဝ်ႈ၊ ၾူၼ်း၊ ရူတ်ႉၶိူင်ႈ ၸိူဝ်းၼႆႉ မီးမွၵ်ႈ 4-5 ၵေႃႉ။ ၸႂ်ႉဢူႈမႄႈၶဝ်မႃးထုတ်ႇဢဝ်ၶိုၼ်း ၊ ဢူႈမႄႈၶဝ် ပေႃးႁွင်ႉ/ ပေႃးႁႆႈၶႃႈဢေႃႈ”- ဝႃႈၼႆ။
ပၢင်တေႃႇလွင်း ၵဵမ်းပႃ တီႈပွၵ်ႉ 8 ၼႆႉ ၶဝ်ပိုတ်ႇမႃး ၸမ်ပီယဝ်ႉ၊ ၵူၼ်းၵႂႃႇတေႃႇလွင်းလဵၼ်ႈၵၼ် ၵိုၼ်းၶွၼ်ႈ သဵင်ပေႃးပၼ်း တင်းဝၼ်း/ ၶိုၼ်း။ ပၢင်တေႃႇလွင်းတီႈၼၼ်ႈ မီးမွၵ်ႈ 7 ပၢင် 1 ပၢင်တေမီးၵူၼ်းလဵၼ်ႈ 8 ၵေႃႉ ထိုင် 10 ၵေႃႉ။
တီႈႁိမ်းၵၢတ်ႇလူင်ၼၼ်ႉတီႈၼိုင်ႈ တေႃႇလွင်းၵဵမ်းပႃ မီးၵူၼ်းလဵၼ်ႈၼမ်၊ တီႈ ပွၵ်ႉ 9 သမ်ႉ ပိုတ်ႇပၢင်တေႃႇလွင်း/ ပၢင်ၽၢႆႉ တေႃႇၵၼ် ၵမ်းသိုဝ်ႈ ။ ၵူၼ်းၵိုၼ်းယူႇဝၼ်းဝၼ်းၶိုၼ်းၶိုၼ်း။
“ဢၼ်ၶႃႈႁၼ်တႄႉ မၢင်ၵေႃႉ မိူဝ်ႈပႆႇၵႂႃႇလဵၼ်ႈ မီးရူတ်ႉၶိူင်ႈ၊ ၽူင်း ဢၼ်ၶႅမ်ႉ ဢၼ်လီ။ ၽိူဝ်ႇလဵၼ်ႈယဝ်ႉသေ ဢွၵ်ႇမႃးၵေႃႈ ဢမ်ႇ မီးသင်ယဝ်ႉ ။ ပဵၼ်ၼီႈပဵၼ်ၶွတ်ႇသေ ပွၵ်ႈႁိူၼ်းၶိုၼ်းၵူၺ်းၵေႃႈ။ ဢဝ်ရူတ်ႉၵႃး ရူတ်ႉၶိူင်ႈၵႂႃႇၵမ်ႉသေမႃးလဵၼ်ႈၼၼ်ႉၶႃႈၼႃႇ။ ”- ၵူၼ်း ၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 30/6/2022 ၼၼ်ႉ ၵေႃႈ သွင်ပေႃႈလုၵ်ႈ ၵူၼ်းၵျွၵ်ႉမႄး ၽိတ်းမေႃးၵၼ် ယွၼ်ႉပၢင်တေႃႇလွင်း၊ ၵေႃႉပဵၼ်လုၵ်ႈယိင်း လွင်းသုမ်းမႃးၽိတ်းပေႃႈ၊ ၽၼ်းပေႃႈၸဝ်ႈၵဝ်ႇတၢႆ ၼႆယဝ်ႉ။
ၽွင်းပၢၼ်လူင်ပွင်ၸိုင်ႈၵူၼ်းမိူင်းလိူၵ်ႈတင်ႈ၊ မီးၽူႈတႅၼ်းသၽႃးၼၼ်ႉ ၵူၼ်းမိူင်းလႄႈၽူႈတႅၼ်းႁူမ်ႈၵၼ်သၢၼ်ၶတ်း ႁၢမ်ႈႁႄႉလႄႈ ၸွမ်းၼင်ႇမၢႆမီႈၸိုင်ႈမိူင်းၼၼ်ႉ ဢမ်ႇမီးၶႂၢင်ႉတႃႇပိုတ်ႇပၢင်လွင်း။ ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉတႄႉ ၸဝ်ႈဢႃႇၼႃႇလႄႈၸဝ်ႈငိုၼ်းသႃး ဢမ်ႇတူၺ်းၼႃႈၵူၼ်းမိူင်း၊ ဢမ်ႇထွမ်ႇသဵင်ၵူၼ်းမိူင်းသေ ပိုတ်ႇပၢင်တေႃႇလွင်းမႃးဢမ်ႇထၢတ်ႇ။
ဢိင်ၼိူဝ်ပၢင်တေႃႇလွင်းသေ ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄးၼႆႉ ၵူၼ်းသူႇသမ်းၵိၼ်ယႃႈၵေႃႈ လိူင်ႇၼမ်ႁႅင်း ၽူႈလၵ်ႉၸၵ်ႉၶုတ်ႈ ယိုင်ႈၶႅၼ်းၼမ်လိူဝ်ၵဝ်ႇ ထႅင်ႈ ရူတ်ႉၶိူင်ႈ၊ ၵႃး ၸိူဝ်းၼႆႉ ၵႆႉႁၢႆမႃးၶိူဝ်းယႂ်း ယွၼ်ႉပၢင်တေႃႇလွင်း ၸိူဝ်းၼႆႉ လိူင်ႇၼမ်ၵေႃႈပႃး။ ၵူၼ်းၶၢႆယႃႈမဝ်းၵမ် ၸိူဝ်းၼႆႉ ၵေႃႈ ၶႂ်ႈဝႃႈမီး ၵူႈပွၵ်ႉ ႁႃသိုဝ်ႉသူႇသမ်းၵိၼ်ငၢႆႈ ယူႇတီႈပလိၵ်ႈ/ သိုၵ်းမၢၼ်ႈ ႁၼ်ယူႇၵေႃႈ ဢမ်ႇႁဵတ်းပၼ်သင် တင်ႈၸႂ် ပွႆႇႁႂ်ႈ မၼ်း လိူင်ႇၽႄႈၵူၺ်း ၵူၼ်းၼုမ်ႇၵျွၵ်ႉမႄးလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ