ၼမ်ႉလုပ်ႇထူမ်ႈ သူၼ်ႁႆႈၼႃး ၵူၼ်းမိူင်းပၼ်ႇ ႁၢဝ်ႈႁႅင်း

ၼမ်ႉႁူၺ်ႈ/ လွႆ ၼွင်းလုပ်ႇထူမ်ႈ ၼႂ်းဝဵင်းမိူင်းပၼ်ႇ ႁၢဝ်ႈႁႅင်း သူၼ်ႁႆႈၼႃး ၵူၼ်းမိူင်း ထုၵ်ႇၼမ်ႉထူမ်ႈ လူႉသုမ်းတင်းၼမ်လၢႆ။

ၾူၼ်တူၵ်းထပ်းၵၼ်လၢႆဝၼ်းလႄႈ တႄႇဢဝ် ဝၼ်းတီႈ 12/8/2022 ယၢမ်းဝၢႆးဝၼ်း 2 မူင်းမႃး ၼမ်ႉႁူၺ်ႈ/ လွႆ လုပ်ႇထူမ်ႈ သူၼ်ႁႆႈၼႃး  ႁိူၼ်းယေး ၵူၼ်း ဝၢၼ်ႈ ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ႁၢဝ်ႈႁႅင်း  ။  

ၸဝ်ႈၼႃး မိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉၼႆႉ လုၵ်ႉတၢင်းၾၢႆႇဢွၵ်ႇဝဵင်း ထူမ်ႈမႃးတၢင်း ၾၢႆႇႁွင်ႇဝဵင်းလႄႈ ၾၢႆႇ တူၵ်းဝဵင်း သူၼ်ၼႃး ၵူၼ်းမိူင်း ဢၼ်ထုၵ်ႇၼမ်ႉထူမ်ႈၵႂႃႇၼႆႉ ႁူဝ်ပၢၵ်ႇၼႆႉၶႂ်ႈဝႃႈမွၵ်ႈ 70 ၼႆႉယဝ်ႉၶႃႈ ။    ၵမ်ႈၼမ် ပဵၼ်သူၼ် ထူဝ်ႇၼဝ်ႈလႄႈ ၶဝ်ႈ ၸိူဝ်းၼႆႉ။ ၸဝ်ႈသူၼ်ၼႃးတႄႉ သုမ်းၵၼ်တင်းၼမ်ၶႃႈဢေႃႈ။ သူၼ်ၼႃး ဢၼ်တီႈႁဝ်းၶႃႈ ဢမ်ႇယၢမ်ႈ ထူမ်ႈၼၼ်ႉ ယၢမ်းလဵဝ် တိုၵ်ႉမီးၼမ်ႉယိုင်ႈဝႆႉယူႇ”- ဝႃႈၼႆ။

လိူဝ်ၼၼ်ႉ ႁိူၼ်းယေး ၵူၼ်းဝၢၼ်ႈ ၸိူဝ်းၼႆႉၵေႃႈ လုပ်ႇထူမ်ႈထႅင်ႈတင်းၼမ်လၢႆ မိူၼ်ၼင်ႇ ဝၢၼ်ႈႁူဝ်ၾၢႆလူင် 59 လင်၊ ပွၵ်ႉ ဝၢၼ်ႈမႂ်ႇ တင်းပွၵ်ႉလႄႈ ဝၢၼ်ႈလွႆၼွႆႉ ၸိူဝ်းၼႆႉ ဢိၵ်ႇထႅင်ႈလၢႆပိုၼ်ႉတီႈ ၼႂ်းဝဵင်းမိူင်းပၼ်ႇ။

“ၵူၼ်းမိူင်းၵမ်ႈၽွင်ႈ  မႆႈၸႂ်  တုၵ်ႉၶၵၼ်ဢေႃႈ။  ၶဝ်ႈဝႃႇ၊ ထူဝ်ႈၼဝ်ႈဝႃႈ ၸိူဝ်းၼႆႉ လႆႈဢဝ်ဢွၵ်ႇတၢတ်ႇ  ဢေႃႈ။  ၼမ်ႉၼႆႉ မိူဝ်ႈဝၼ်းတီႈ 12 ၼၼ်ႉ လုပ်ႇထူမ်ႇတၢင်း ၾၢႆႇဢွၵ်ႇဝဵင်း။ ဝၼ်းတီႈ 13 သမ်ႉ လုပ်ႇထူမ်ႈမႃးတၢင်း ၾၢႆႇ တူၵ်းဝဵင်း”- ၸဝ်ႈၼႃး မိူင်းပၼ်ႇ သိုပ်ႇလၢတ်ႈၼႄ ၼင်ႇၼႆ။

ၼွၵ်ႈလိူဝ်ၼၼ်ႉ ၼမ်ႉလုပ်ႇထူမ်ႈ ၸွမ်းသဵၼ်ႈတၢင်းလူင်၊ ၶူဝ်  ၸိူဝ်းၼႆႉ လူႉၵွႆထႅင်ႈ တင်းၼမ် လၢႆပိုၼ်ႉတီႈ ႁဵတ်းႁႂ်ႈၵူၼ်း မိူင်းၵႂႃႇမႃးယၢပ်ႇၽိုတ်ႇ  ။

ၼႂ်းၸႄႈဝဵင်းလၢင်းၶိူဝ်းၵေႃႈၼမ်ႉတဵင်းၼွင်းလူၼ်ႉၾင်ႇ၊ ၶဝ်ႈသူၼ်ၶဝ်ႈၼႃး၊ ထူမ်ႈႁိူၼ်းယေးၵူၼ်းဝၢၼ်ႈ ၼမ်ႉဢုၼ်ႇ၊ ႁူဝ်တႃႈ၊ ပွၵ်ႉၵၢတ်ႇ၊ ဝၢၼ်ႈပုင်းထုၼ်၊ ၼႃးၵူင်း ၸိူဝ်းယူႇသွင်ၾင်ႇၶၢင်ႈတဵင်း။ ႁိူၼ်းယေးဢမ်ႇလွင်ႈဢမ်ႇၵွႆၸွမ်းၼမ်ႉသေတႃႉ ၶူဝ်းၶွင်တႄႉ လူႉသုမ်းၸွမ်းၽွင်ႈယူႇ ။