ၾူၼ်တူၵ်းႁၢဝ်ႈႁႅင်း တီႈၼႂ်းမိူင်းဝႅတ်ႊၼၢမ်း၊ မၢင်ပိုၼ်ႉတီႈ ၾူၼ်တူၵ်းထပ်းၵၼ်ဢမ်ႇထၢတ်ႇ 3-4 ဝၼ်း။ တႄႇဢဝ်ႁၢင်လိူၼ် ဢွၵ်ႉထူဝ်ႊပိူဝ်ႊပူၼ်ႉမႃး တေႃႇထိုင်ၼႂ်းဝၼ်းတီႈ 23/11/2025 ၼႆႉ ယွၼ်ႉၾူၼ်တူၵ်းႁၢဝ်ႈႁႅင်း ၼႂ်းမိူင်းဝႅတ်ႊၼၢမ်းပွတ်းၸၢၼ်း တင်း ပွတ်းဢွၵ်ႇသေ ႁဵတ်းႁႂ်ႈၼမ်ႉၼွင်းထူမ်ႈ၊ လိၼ်ၵူၼ်ႇပင်း မီးၵူၼ်းလူႉတၢႆ 90 ပၢႆ။
ယွၼ်ႉၾူၼ်တူၵ်းႁၢဝ်ႈႁႅင်းသေ ပိုၼ်ႉတီႈၶႅၵ်ႇၼွၵ်ႈမိူင်းၶဝ် ၵႂႃႇဢႅဝ်ႇလႄႇတွင်ႈတဵဝ်းလႄႈ ဢွင်ႈတီႈဢႅဝ်ႇလႄႇ လိုဝ်ႈႁိူဝ်ႉၵမ်ႈၼမ်ၵေႃႈ ၺႃးၽေးၼမ်ႉၼွင်းထူမ်ႈ၊ လိၼ်ၵူၼ်ႇပင်း။ ၼႂ်းဝၢၼ်ႈဝဵင်းမၢင်တီႈ ၼမ်ႉၵိုင်ႉၵၢင်ႉ လႆၼွင်းၶဝ်ႈၼႂ်းႁိူၼ်းယေးလႄႈ လႆႈဢွၼ်ၵၼ်ပၢႆႈယူႇၼိူဝ်လင်ၶႃးႁိူၼ်း ပႂ်ႉၸုမ်းၾၢႆႇၸွႆႈထႅမ်ၶဝ် မႃးၸွႆႈ ၼႆယဝ်ႉ။
ၽူႈမီးပုၼ်ႈၽွၼ်း ၼႂ်းမိူင်းဝႅတ်ႊၼၢမ်းၶဝ် ၶၢတ်ႈလၢမ်းဝႃႈ တီႈၼႂ်း 5 ၸႄႈတွၼ်ႈၼၼ်ႉ ၵႃႈၶၼ်လွင်ႈလူႉသုမ်းယွၼ်ႉၼမ်ႉၼွင်းထူမ်ႈ တေမီးယူႇ မွၵ်ႈ 343 လၢၼ်ႉတေႃႇလႃႇ၊ၼႃႈလိၼ်ၽုၵ်ႇသွမ်ႈလူႉသုမ်း 8 မိုၼ်ႇႁႅၵ်ႊတိူဝ်ႊပၢႆ။ ဝူဝ်းၵႂၢႆးၵႆႇပဵတ်းလူႉတၢႆ 3 လၢၼ်ႉပၢႆ ဝႃႈၼႆ။
ၼႂ်းဝူင်ႈပူၼ်ႉမႃးၼႆႉ မၢင်ပိုၼ်ႉတီႈ ၼမ်ႉယွမ်းလူင်းၵႂႃႇၶိုၼ်းသေတႃႉ ယွၼ်ႉၶီႈၵူမ်ႇဢုင် ၶင်ႉၶမ်ၵိုတ်းဝႆႉလႄႈ ႁဵတ်းႁႂ်ႈၶူဝ်းၵုၼ်ႇမၢၵ်ႇၶဝ်ႈတဝ်ႈၼမ်ႉတၢင်းၵိၼ် လူႉၵွႆၵႂႃႇတၢင်းၼမ်။
ၼႂ်းၶၢဝ်းတၢင်း 10 လိူၼ် ပီ 2025 ၼႆႉ ယွၼ်ႉၽေးသၽႃႇဝသေ တီႈမိူင်းဝႅတ်ႊၼၢမ်း မီးၵူၼ်းလူႉတၢႆ ဢမ်ႇယွမ်း 279 ၵေႃႉ၊ ၵႃႈၶၼ်ၶူဝ်းၶွင်လူႉသုမ်းၵႂႃႇ ၵိုင်ႇငိုၼ်း 2 ပီႊလီႊယၼ်ႊ တေႃႇလႃႇပၢႆ။
ၼႂ်းပိုၼ်ႉတီႈ ၵုၼ်ၶဵဝ်ဢေးသျႃး ၸဵင်ႇၸၢၼ်းဝၼ်းဢွၵ်ႇၼႆႉ မိူင်းဝႅတ်ႊၼၢမ်း ၾူၼ်ၵႆႉတူၵ်းႁၢဝ်ႈႁႅင်း ၼႂ်းလိူၼ်ၵျုၼ်ႊ လႄႈ လိူၼ်သႅပ်ႉထႅမ်ႊပိူဝ်ႊၵူႈပီ။ ၵူၺ်းၵႃႈ ယွၼ်ႉလွင်ႈႁဵတ်းသၢင်ႈၵူၼ်းသေ ၽေးသၽႃႇဝ ဢၼ်ပဵၼ်မႃးယွၼ်ႉၾိင်ႈၾႃႉလႅၵ်ႈလၢႆႈၼၼ်ႉ တိူဝ်းႁၢဝ်ႈႁႅင်းမႃးလိူဝ်သေၵဝ်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ