သိုၵ်းမၢၼ်ႈၸႂ်ႉၵူၼ်းပၢႆႈၽေးသိုၵ်းတၢင်းဝဵင်းလွႆၶေႃ ပွၵ်ႈၶိုၼ်းႁိူၼ်း သမ်ႈမိူဝ်း ထူပ်းၽေးၼမ်ႉထူမ်ႈထႅင်ႈလႄႈ ၶိုၼ်းလႆႈပၢႆႈထႅင်ႈ ပဵၼ်ၵူၼ်းမိူင်းၼႂ်းၸႄႈဝဵင်း ပၢင်လွင်း ၊ သီႇသႅင်ႇ ၊ ယွင်ႁူၺ်ႈ ၸိူဝ်းၼႆႉ။

မီးၶၢဝ်ႇၼႂ်းပိုၼ်ႉတီႈဝႃႈ  ႁၢင်လိူၼ် သႅပ်ႉထႅမ်ႊပိူဝ်ႊ ၼႆႉမႃး ၾူၼ်တူၵ်းဢမ်ႇထၢတ်ႇ။  ၾၢႆႇၼိုင်ႈ သိုၵ်းမၢၼ်ႈသမ်ႉပိုတ်ႇၾၢႆၼမ်ႉမိူင်းပၢႆးလႄႈႁဵတ်းႁႂ်ႉၼမ်ႉမႄႈၽီလူး ၼွင်းလူၼ်ႉၾင်ႇ ။ ၶဝ်ႈထူမ်ႈၼႂ်းဝဵင်းလွႆၶေႃ ႁဵတ်းႁႂ်ႈၵူၼ်းပၢႆႈၽေးသိုၵ်း ၸိူဝ်းပွၵ်ႈမိူဝ်းယူႇၶိုၼ်းၼၼ်ႉ လႆႈထူပ်းၽေးၼမ်ႉထႅင်ႈၼႆယဝ်ႉ ။

ၼၢင်းယိင်းဢႃယု 40 လၢတ်ႈၽူႈတွႆႇႁွၵ်ႈဝႃႈ -“ ယွၼ်ႉၼမ်ႉၶိုၼ်ႈလႄႈ  ၵူၼ်းပၢႆႈၽေးသိုၵ်း ၸိူဝ်းမႃးယူႇၶိုၼ်းႁိူၼ်းၵေႃႈ ဢမ်ႇလႆႈယူႇတီႈႁိူၼ်း လႆႈမႃးၶၢတ်ႈႁွင်ႈၶၢတ်ႈႁိူၼ်းယူႇဢဝ် ၊ ၼမ်ႉၼႆႉ မၢင်ႇပွၵ်ႉမီးပဵင်းဢႅဝ် ၊ မၢင်ပွၵ်ႉၵေႃႈၼမ်ႉထူမ်ႈထၢပ်ႈတႂ်ႈလႆႈ ငိူင်ႉပၢႆႈယူႇဝႆႉတီႈသုင် ၊ မၢင်ၸိူဝ်းၵေႃႈဢမ်ႇပၢႆႈ ၊ ၼႂ်းလိူၼ်ၼႆႉၵူၺ်း မီးပႃးၵူၼ်းၸူမ်ၼမ်ႉလူႉတၢႆ ယဝ်ႉ 3 ၵေႃႉ ပႃးတင်းလုၵ်ႈဢွၼ်ႇ ဢႃယု 12 ပီႁေ  ”- ဝႃႈၼႆ ။  

ၼႂ်းဝၼ်းတီႈ1/10/1025 လုၵ်ႈဢွၼ် ဢႃယု 12 ၶူပ်ႇယူႇပွၵ်ႉ ၼမ်ႉၵူတ်ႉ ၸူမ်ၼမ်ႉတၢႆၵေႃႉၼိုင်ႈ ၊  ၼႂ်းဝၼ်းတီႈ 7/10/2025 ၵူၼ်းၸၢႆး ဢႃယု 30 မဝ်းလဝ်ႈၸူမ်ႇၼမ်ႉတၢႆထႅင်ႈၵေႃႉၼိုင်ႈသေ ၼႂ်းဝၼ်းတီႈ  18 /10 /2025 ၼၼ်ႉ ၵူၼ်းၸၢႆးဢႃယု 30 ပၢႆ ယူႇပွၵ်ႉတေႃးဢူးၶူ မဝ်းလဝ်ႈ ၸူမ်ႇၼမ်ႉတၢႆ ၸုမ်းၸွႆႈထႅမ် ၼႂ်းပိုၼ်ႉတီႈလၢတ်ႈ ၼင်ႇၼႆ။

 “ၼႂ်းလိူၼ်ၼႆႉၵူၺ်း မီးၵူၼ်းၸူမ်ၼမ်ႉတၢႆ 3 ၵေႃႉ ၊ မဝ်းလဝ်ႈသေၵျွၵ်းတူၵ်းၼမ်ႉတၢႆ ၊ ထႅင်ႈၵေႃႉၼိုင်ႈ တႄႉ ပဵၼ်လုၵ်ႈဢွၼ်ႇ ဢႃယု -12 ၸူမ်ၼမ်ႉသေတၢႆ ၊ ပေႃႈမႄႈလုၵ်ႈဢွၼ်ႇ ၸိူဝ်းယူႇၸွမ်းႁိမ်းၾၢင်ၼမ်ႉ ၊ ၼႂ်းပွၵ်ႉၼမ်ႉထူမ်ႈၸိူဝ်းၼၼ်ႉ ၵိုင်ႇလီ တူၺ်းလုၵ်ႈလၢင်း ၸဝ်ႈၵဝ်ႇလီလီပႃး ပေႃးပဵၼ်မႃးယၢပ်ႇၼႃႇ ”- ဝႃႈၼႆ ။

ပွၵ်ႉဢၼ် ၼမ်ႉထူမ်ႈ ယူႇယၢမ်းလဵဝ် ပဵၼ်ပွၵ်ႉ တေႃးၼၶူႇ ၊ ၼမ်ႉၵူတ်ႉ ၊ တေႃးဢူႉၶူႇ ၊ သူၺ်ႇတွင်ႇ ၊ မိၼ်းသူႉ ၸိူဝ်းၼႆႉသေ ၊ ၵူၼ်းပၢႆႈၽေးသိုၵ်း ၸိူဝ်းပွၵ်ႈမႃးယူႇၶိုၼ်းဝဵင်းလွႆၶေႃသမ်ႉၵမ်ႈၼမ် ပဵၼ်ၵူၼ်းထဝ်ႈ ၊ ၼမ်ႉထူမ်ႈၸိူင်ႉၼႆ ဢမ်ႇၸၢင်ႈပၢႆႈၵႂႃႇတၢင်းလႂ် လႄႈ လႆႈယူႇဝႆႉၼိူဝ်ႁိူၼ်းမီးတၢင်းၼမ်ဝႃႈၼႆ။