တႄႇဢဝ် ႁူဝ်လိူၼ်ဢေႃႊၵတ်ႊသ် ၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်း ဢႅဝ်ႇတီႉ ၸဝ်ႈၶွင်လၢၼ်ႉ ၶၢႆၶဝ်ႈၽၵ်း၊ ပမ်ႉၼမ်ႉ မၼ်းၸၢၵ်ႈလႄႈ ၸဝ်ႈၶွင်ၶူင်းၵၢၼ်လဵင်ႉမူ/ၵႆ ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ။
မိူဝ်ႈဝၼ်းတီႈ 7/8/2022 ယၢမ်းၵၢင်ၶိုၼ်း ၸဝ်ႈၶွင်လၢၼ်ႉၶၢႆၶဝ်ႈၽၵ်း ၽူႈၸၢႆး 2 ၵေႃႉ ဢႃယု 50 ပၢႆ ဢၼ်ပိုတ်ႇၶၢႆဝႆႉ တၢင်း လူင်းၵႂႃႇ ႁူၺ်ႈၵိုတ်ႈ ႁိမ်းပွၵ်ႉပၢင်ႁၵ်ႉ ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ထုၵ်ႇၶွင်ႇသီႇသိုၵ်းမၢၼ်ႈ ယိုတ်းမိူင်း မၢပ်ႇၼႄးဝႃႈ ၵွင်ႉၵၢႆႇၸွႆႈထႅမ် ၸုမ်း PDF ၼႆသေ ၶဝ်ႈတီႉၼႂ်းလၢၼ်ႉၵႂႃႇ ၼႆယဝ်ႉ။
ၵူၼ်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ပူၼ်ႉမႃး 3 ဝၼ်းၼႆႉ သိုၵ်းမၢၼ်ႈ တီႉၸဝ်ႈၶွင်လၢၼ်ႉ ၶၢႆၶဝ်ႈၽၵ်း ၵႂႃႇသွင်ၵေႃႉ တေႃႇထိုင်ယၢမ်းလဵဝ် ပႆႇပွႆႇမႃး။ တၢႆႁိုဝ် လိပ်းႁိုဝ် ပႆႇႁူႉ။ ၶဝ်မၢပ်ႇၼႄးဝႃႈ ၸွႆႈၸုမ်း PDF ၼႆၶႃႈဝႃႇ”- ဝႃႈၼႆ။
ၼႂ်းဝဵင်းၼွင်ၶဵဝ်ၼႆႉ မၢၵ်ႇၵႆႉတႅၵ်ႇ၊ ဢၼ်မၢၵ်ႇတႅၵ်ႇၼႆႉ ၾၢႆႇသိုၵ်းမၢၼ်ႈ ၼႄးဝႃႈ ပဵၼ် PDF သိုၵ်းၵႅတ်ႇ ၶႄၵူၼ်းမိူင်း ဢၼ် ၵူၼ်းမၢၵ်ႈမီးၵမ်ႉထႅမ်ဝႆႉ ၸိူဝ်းၼၼ်ႉႁဵတ်းၼႆလႄႈ သိုၵ်းမၢၼ်ႈ ၸင်ႇလႆႈ ဢႅဝ်ႇႁႃလမ်း တီႉၶဝ်ၼႆ ၵူၼ်းပိုၼ်ႉတီႈလၢတ်ႈၼင်ႇ ၼႆ။
“တၢင်းၼႃႈႁိူၼ်းၶႃႈႁဝ်းယူႇၼႆႉ သိုၵ်းမၢၼ်ႈ မႃးပၼ်ႇလဵပ်ႈ တိၵ်းတိၵ်း ။ ၵူႈၼႂ်ၶႃႈယဝ်ႉ ႁဝ်းၶႃႈ ဢမ်ႇႁတ်းပိုတ်ႇၽၵ်း တူႁိူၼ်းၸဝ်ႉ ။ ပေႃးဢမ်ႇလႃႈၼႆ ဢမ်ႇႁတ်းပိုတ်ႇၽၵ်းတူႁိူၼ်းၵၼ်ၶႃႈ”- ၵူၼ်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။
ဝၼ်းတီႈ 1/6/2022 ၼၼ်ႉ မၢၵ်ႇတႅၵ်ႇၼႂ်းဝၢင်းႁိူၼ်းလင်ၼိုင်ႈ ၾၢႆႇလင်ၵၢတ်ႇလူင် ဝဵင်းၼွင်ၶဵဝ် တိူဝ်ႉသႂ်ႇ ဢွၼ်ႇယိင်း 2 ၵေႃႉ လႆႈမၢတ်ႇၸဵပ်းႁႅင်း။ 31/5/2022 ၼၼ်ႉၵေႃႈ မၢၵ်ႇတႅၵ်ႇ တီႈလုမ်းပၢႆးပၺ်ႇၺႃႇ တိူဝ်ႉသႂ်ႇ မေႃသွၼ်မၢတ်ႇၸဵပ်း 9 ၵေႃႉ ။ ၼႂ်းၼၼ်ႉ လူႉတၢႆ 1 ၵေႃႉ ၼႆယဝ်ႉ။
ၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၼႆႉ မီးၶၢဝ်းတၢင်း 555 ဝၼ်း 1 ပီ 6 လိူၼ်ပၢႆယဝ်ႉ သိုၵ်းမၢၼ်ႈ ၶႃႈႁႅမ်တၢႆ ၵူၼ်းမိူင်း မီးၵႂႃႇ 2,171 ၵေႃႉ၊ တီႉၺွပ်းၵႂႃႇ 11,977 ၵေႃႉ ယူႇတီႈ ၸုမ်းၸွႆႈထႅမ် ၵူၼ်းတူၵ်းၶွၵ်ႈၵၢၼ်မိူင်း မိူင်းမၢၼ်ႈ AAPP ပိုၼ်ၽၢဝ်ႇ ဢွၵ်ႇဝႆႉ ၼႂ်းဝၼ်းတီႈ 9/8/2022 ၼႆႉ ဝႃႈၼႆ။
