Tuesday, June 18, 2024

ၸဝ်ႈသိလ်ထမ်းၶူးဝႃးဝုၼ်းၸုမ်ႉဢမ်ႇယူႇလီ မေႃယႃမႃးယူႇၸမ်လုမ်းလႃးၸဝ်ႈတီးမိူင်းၽူင်း

Must read

ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ဢွၵ်ႇထမ်ႈမိူင်းၵႅတ်ႇယဝ်ႉ ဢမ်ႇလိုဝ်ႈဢမ်ႇသဝ်း  ဢွၵ်ႇၶၢဝ်းတၢင်း မဵတ်ႉတႃႇတြႃးပၼ်တၵ်ႉၵႃႇသတ်ႉထႃး ပွင်ၵၢၼ်သႃႇသၼႃႇၼႂ်းၸိုင်ႈတႆးပွတ်းၸၢၼ်းလၢႆလၢႆဝဵင်းလႄႈ ယၢမ်းလဵဝ် ပၢႆးယူႇလီၸဝ်ႈႁဝ်းယုပ်ႈယွမ်း ထိုင်တီႈမေႃယႃ လႆႈမႃးယူႇႁိမ်းၸမ်သေ လုမ်းလႃးပၢႆးယူႇ လီပၼ်ဝႆႉ တီႈမိူင်းၽူင်း၊ တေႃႇထိုင်ဝၼ်းမိူဝ်ႈၼႆႉယင်းပႆႇၸၢင်ႈဢွၵ်ႇႁူပ်ႉတၵ်ႉၵႃႇသတ်ႉထႃး။

ၸဝ်ႈသိလ်ထမ်းၶူးဝႃးဝုၼ်းၸုမ်ႉဢွၵ်ႇထမ်ႈမိူင်းၵႅတ်ႇ ဝၼ်းတီႈ 1/8/2022

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉ ၸုမ်းလူင်သင်ႇၶႃႇ ၸိုင်ႈတႆး ပွတ်းဢွၵ်ႇ ၶူင်း လၢတ်ႈတီႈၽူႈတွႆႇႁွၵ်ႈဝႃႈ – “တင်ႈတႄႇ ဢဝ်ဢွၵ်ႇထမ်ႈမႃး ႁဝ်းၸဝ်ႈၶဝ် လၢမ်းတူၺ်း ၶူးဝႃးပေႃႈႁဝ်း ဢမ်ႇလႆႈလပ်း လႆႈၼွၼ်း ပိူင်လူင်မၼ်း ပဵၼ်ဢၼ်ၼႆႉ ၵၢင်ဝၼ်းၵေႃႈ တင်းဝၼ်းတင်းဝၼ်း။ ၵၢင်ၶိုၼ်းၵေႃႈ တင်းၶိုၼ်းတင်းၶိုၼ်း ဢမ်ႇ ပေႃးလႆႈလပ်း/ ၼွၼ်း။ ၵူၼ်းႁဝ်းၼႆႉ ၼိူဝ်ႉလိူတ်ႈလူမ်းဢမ်ႇၽဵင်ႇယဝ်ႉ။ ပေႃးၼိူဝ်ႉလိူတ်ႈလူမ်းဢမ်ႇၽဵင်ႇၼႆၵေႃႈ ဢဝ်တၢင်း ပဵၼ်ယူပ်ႈယွမ်း ဢမ်ႇယူႇလီ။ မိူဝ်ႈဢွၼ်တၢင်းၵေႃႈ ၸဝ်ႈႁဝ်းယၢမ်ႈပဵၼ်ဢိူဝ်ႈ ဢမ်ႇၸႂ်ႈဝႃႈ ပဵၼ်ပွၵ်ႈၼႆႉၵူၺ်း”- ဝႃႈၼႆ။

- Subscription -

ယၢမ်းလဵဝ် ယူႇတီႈလုၵ်ႉၼွင်ႉတပေးလုၵ်ႈသိတ်ႇ ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ႁွင်ႉဢဝ်မေႃယႃသေ လုမ်းလႃးတူၺ်းထိုင်ဝႆႉ ၸဝ်ႈၶူးဝႃး ၶိုတ်းၶိုတ်းၸမ်ၸမ် ၼႆယဝ်ႉ။

“ယၢမ်းလဵဝ် ၶူးဝႃးပေႃႈ ယူတ်းယႃတူဝ်ဝႆႉ တီႈတႃႈသူပ်းၽူင်း ဢိူင်ႇမိူင်းၽူင်း ယူႇတီႈမေႃယႃၶဝ် လုမ်းလႃးတူၺ်းထိုင်ဝႆႉယဝ်ႉ။ တၵ်ႉၵႃႇ ၸိူဝ်းမႃးပႂ်ႉႁပ်ႉဝႆႈသႃ တီႈမိူင်းၽူင်းၼႆႉ ၵွပ်ႈပိူဝ်ႈဝႃး ၶူးဝႃးပေႃႈႁဝ်း ဢမ်ႇပေႃးယူႇလီယဝ်ႉလႄႈ တႃႇတေမႃး မဵတ်ႉတႃႇထမ်ႇမတြႃးၼၼ်ႉ လႅပ်ႈတေဢမ်ႇပဵၼ်လႆႈယဝ်ႉ။ ၶူးဝႃးႁဝ်း တေဢဝ်ဝႃႇသႃၵႂႃႇ တီႈမိူင်းၽူင်းၼႆႉယဝ်ႉ”- ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼႄၼင်ႇၼႆ။

ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢတိတ်ႉထၢၼ်ႇ တိုဝ်းၵမ်သိလ် တီႈထမ်ႈမိူင်းၵႅတ်ႇ 3 ပီ 3 လိူၼ် 3 ဝၼ်း တဵမ်မိူဝ်ႈဝၼ်းတီႈ 28/4/2019 ၼၼ်ႉသေ   ဝၼ်းတီႈ 1/8/2022 ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၵ်ႇထမ်ႈ ႁူပ်ႉတၵ်ႉၵႃႇသတ်ႉထႃး မဵတ်ႉတႃႇတြႃးမႃး ။ တင်ႈတႄႇဝၼ်းတီႈ 4/8/2022  ဢွၵ်ႇၶၢဝ်းတၢင်း မဵတ်ႉတႃႇတြႃးလႄႈ တၢင်ႇထီးထၢတ်ႈ တၢင်းမိူင်းသၢတ်ႇ၊ မိူင်းတူၼ်၊ မိူင်းပၼ်ႇ၊ လၢင်းၶိူဝ်း၊ မိူင်းၼၢႆး လႄႈ ၵဵင်းတွင်း။

ထိုင်မႃး ဝၼ်းတီႈ 8/8/2022 ယၢမ်းၵၢင်ၼႂ် ၸဝ်ႈသိလ်ထမ်းၶူးဝႃး ဝုၼ်းၸုမ်ႉ လုၵ်ႉတီႈၵဵင်းတွင်း ဢွၵ်ႇၶၢဝ်းတၢင်း မုင်ႈၸူး မိူင်းၽူင်း ဝဵင်းတႃႈၶီႈလဵၵ်းၵမ်ႈသိုဝ်ႈ ႁွတ်ႈထိုင် ၼႂ်းဝၼ်းၼၼ်ႉ ယၢမ်းၵၢင်ၶိုၼ်း 11:50 ပၢႆ  ။

ၽွင်းလုၵ်ႉဢဝ်လၢင်းၶိူဝ်းမႃးထိုင်မိူင်းၽူင်း ၶူးဝႃးၸဝ်ႈမဵတ်ႉတႃႇတြႃးပၼ်ၵေႃႈ ၼႄမိုဝ်းသေ ႁေႃးၵႂႃႇ ။ ၸဝ်ႈၶူးသုၶမ်း မဵတ်ႉတႃႇပိၼ်ႇၽႃႇသႃႇသေ ႁေႃးပၼ်ၸွမ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း