ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေယေႃးမုၼ် ပွၼ်ႈထမ်းသူင်ႇမဵတ်ႉတႃႇပၼ် တၵ်ႉၵႃႇသတ်းထႃး မိူင်းတႆး – မိူင်းမၢၼ်ႈ ၸွမ်းပိုၼ်ႉတီႈ ထူပ်းၽေးၽႅၼ်ႇလိၼ်ဝႆ (ဢိင်ႇသၼ်ႇ) ၸိူဝ်းၼၼ်ႉ။
ပေႃးထိုင်မႃး ဝၼ်းတီႈ 19/04/2025 ၼႆႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေလုၵ်ႉတီႈမိူင်းၽူင်း ၸႄႈဝဵင်းတႃႈၶီႈလဵၵ်းသေ ဢွၵ်ႇၶၢဝ်းတၢင်းပွၼ်ႈထမ်း ၼႂ်းၸိုင်ႈတႆးပွတ်းဢွၵ်ႇ၊ ပွတ်းၸၢၼ်း လၢႆလၢႆတီႈသေ တေသိုပ်ႇၵႂႃႇတၢင်းမိူင်းမၢၼ်ႈ ၸွမ်းပိုၼ်ႉတီႈ ထူပ်းၽေးၽႅၼ်ႇလိၼ်ဝႆ ၸိူဝ်းၼၼ်ႉ။
ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈတႆး ပွတ်းဢွၵ်ႇၶူင်း လၢတ်ႈၽူႈတွႆႇႁွၵ်ႈဝႃႈ -“တီႈတၢင်းဝဵင်းလိူဝ်ႇ (မၼ်းတလေး) ၸိူဝ်းၼႆႉ ၵူၼ်းမိူင်းထူပ်း ၽေးဢိင်ႇသၼ်ႇႁႅင်းဝႆႉ ၼႂ်းၸႂ်ႁၼ်ဢရူင်ႇၶူးဝႃးပေႃႈ မိူဝ်ႈၽွင်းမႃးၶဝ်ႈထမ်ႈ မိူင်းငဝ်း ၸိုင်ႈထႆးၼၼ်ႉ ၽီၵေႃႈမႃးပၢင်းထႅင်ႈလႄႈ ပဵၼ်ႁိုဝ်ၵေႃႈ ၶႂ်ႈႁႂ်ႈၶူးဝႃးပေႃႈသိလ်ထမ်း ဝုၼ်းၸုမ်ႉ မိူဝ်းယၢတ်ႇၼမ်ႉ မိူဝ်းမဵတ်ႉတႃႇတြႃးပၼ်ၽွင်ႈၼႆလႄႈ ၶူးဝႃးၸင်ႇမႃးတႅပ်းတတ်းသေ မွၵ်ႇလၢတ်ႈဝႃႈ ဝၼ်းတီႈ 19 ၼႆႉ တေတႄႇဢွၵ်ႇၶၢဝ်းတၢင်းပွၼ်ႈထမ်းၼႆ တူဝ်ၶူးဝႃးပေႃႈလၢတ်ႈဝႆႉဢိူဝ်ႈ”- ဝႃႈၼႆ။
ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေလုၵ်ႉတီႈမိူင်းၽူင်း တႃႈၶီႈလဵၵ်းသေ ဢွၵ်ႇၶၢဝ်းတၢင်းၵႂႃႇတင်း မိူင်းသၢတ်ႇ – မိူင်းတူၼ် ယဝ်ႉၵေႃႈ တေသိုပ်ႇၵႂႃႇပွၼ်ႈထမ်းပၼ် တင်းဝဵင်းလိူဝ်ႇ (မၼ်းတလေး) လႄႈ တႃႈၵုင်ႈ ၸိူဝ်းၼၼ်ႉပႃး ဝႃႈၼႆ။
ၼွၵ်ႈလိူဝ် တေဢွၵ်ႇၶၢဝ်းတၢင်းပွၼ်ႈထမ်းတြႃးယဝ်ႉ ၸဝ်ႈၶူးဝႃးဝုၼ်းၸုမ်ႉ ယင်းတူၵ်ႇလၢတ်ႈ တီႈ ဝတ်ႉၽြႃးဢိၼ်းသၢၼ် မိူင်းၽူင်း မိူဝ်ႈဝၼ်းတီႈ 10/04/2025 ၼၼ်ႉဝႃႈ တေၵႂႃႇ ၸွႆႈထႅမ်ပႃးၵူၼ်းမိူင်း ဢၼ်ထူပ်းၽေးၽႅၼ်ႇလိၼ်ဝႆ ၸိူဝ်းၼႆႉပႃးသေ တေမိူဝ်းပွၼ်ႈထမ်းထိုင် တိူင်းတႃႈၵုင်ႈယဝ်ႉ ၸင်ႇတေပွၵ်ႈမႃးၶိုၼ်းမိူင်းတႆး သိုပ်ႇႁေႃးတြႃးယဝ်ႉ ၸင်ႇပွၵ်ႈ ၽႅဝ်ၶိုၼ်း မိူင်းၽူင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ