တႄႇဢဝ် ဝၼ်းတီႈ 19/04/2025 ၼၼ်ႉမႃး ၸဝ်ႈသိလ်ထမ်း ၶူးဝႃးဝုၼ်းၸုမ်ႉတင်းလုၵ်ႈၼွင်ႉပွင်ႈပၢႆ ဢိၵ်ႇပႃး ပေႃႈဢွၵ်ႇမႄႈယေႃးတၵ်ႉၵႃႇလူင်ၸဝ်ႈ ဢွၵ်ႇၶၢဝ်းတၢင်းႁွတ်ႈထိုင် မိူင်းတႆးမိူင်းမၢၼ်ႈ ဝဵင်း ၸိူဝ်းထူပ်းၽေး ၽႅၼ်ႇလိၼ်ဝႆသေ မဵတ်ႉတႃႇတြႃးလႄႈ ၸွႆႈထႅမ်ၵူၼ်းမိူင်းၸိူဝ်းတိုၵ်ႉလိူတ်ႇတိုၵ်ႉမႆႈ။ 

ၶၢဝ်းတၢင်း သိလ်ထမ်းၸဝ်ႈၶူးဝႃးဝုၼ်းၸုမ်ႉပွၵ်ႈၼႆႉ လုၵ်ႉဢဝ်မိူင်းတႆးပွတ်းဢွၵ်ႇသေ ယေႃးၶိင်း ႁွတ်ႈထိုင်ပွတ်းၸၢၼ်း တႄႇဢဝ်မိူင်းပၼ်ႇ – တူၼ်ႈတီး ဝၢႆးၼၼ်ႉ ယေႃးမုၼ်ထိုင် ပၢင်ႁူႈ (ပၢင်ႇဢူႈလူင်) ဝဵင်းလိူဝ်ႇ ၸႄႈၵႅင်း ၸဵမ်ၸိူဝ်းၼႆႉ။ 

ဝၼ်းတီႈ 22/04/2025 ၵၢင်ဝၼ်းၼႆႉၵေႃႈ ၸဝ်ႈသိလ်ထမ်း သိုပ်ႇမဵတ်ႉတႃႇတြႃး တီႈဝတ်ႉတႆးဢွင်ႇ ၶျၢမ်းသႃႇ တီႈဝဵင်းပၢင်ႁူႈသေ သိုပ်ႇၶၢဝ်းတၢင်းၵႂႃႇၼေႇပျီႇတေႃႇ။ ဝၢႆးလင် ပၢင်တြႃးတီႈၼေႇပျီႇတေႃႇယဝ်ႉ တေယေႃးမုၼ်ၵႂႃႇ ဝဵင်းလူင်တႃႈၵုင်ႈသေ ၸင်ႇတေပွၵ်ႈၶိုၼ်းမိူင်းတႆး – လႆႈႁူႉၸွမ်းၶၢဝ်းတၢင်း ၸဝ်ႈၼင်ႇၼႆ။

ၶၢဝ်းတၢင်းမိူင်းတႆး မိူင်းမၢၼ်ႈ ၵမ်းၼႆႉၵေႃႈ ပိူင်လူင်တႄႉ ၸဝ်ႈသိလ်ထမ်းၶူးဝႃးဝုၼ်းၸုမ်ႉ ယိူင်း ဢၢၼ်းၶႂ်ႈၵႂႃႇပၼ်ႁႅင်းၸႂ် ၼိူဝ်ၵူၼ်းဝၢၼ်ႈၵူၼ်းမိူင်း ၸိူဝ်းဢၼ် လႆႈလူႉသုမ်းပေႃႈမႄႈပီႈၼွင်ႉၵႂႃႇ ၸွမ်းၽႅၼ်ႇလိၼ်ဝႆၸိူဝ်းၼၼ်ႉ။ ၼင်ႇႁိုဝ် ၵူၼ်းထူပ်းၽေးၸိူဝ်းလွတ်ႈတၢင်းတၢႆမႃး ၸိူဝ်းၼႆႉ တေမေႃယူႇႁူမ်ႈငဝ်းၽြႃးတြႃးသင်ၶ။ ႁႂ်ႈၵူၼ်းမိူင်း ႁပ်ႉႁူႉဝႃႈ ထူပ်း ၽေးသင်မႃးၵေႃႈ သင်ၶၸဝ်ႈ ဢမ်ႇပွႆႇ ၽႃႈပႅတ်ႈ ဝႃႈၼႆ။

ၸဝ်ႈၶူးလူင် ၺႃႇၼသီႇရိ  ႁူဝ်ပဝ်ႈ ၵိင်ႇၽႄငဝ်ႈငုၼ်း မုၵ်ႉၸုမ်းလူင် သင်ႇၶႃႇၸိုင်ႈတႆး ပွတ်းဢွၵ်ႇၶူင်း လၢတ်ႈၼင်ႇၼႆ –“ပိူင်လူင်တႄႉ တႃႇတေမႃးမဵတ်ႉတႃႇတြႃးပၼ်ၶဝ်သေ ယဝ်ႉၵေႃႈ ၼင်ႇပွင်ပဵၼ်လႆႈ ၶူဝ်းလူႇၶူဝ်း တၢၼ်း ဢၼ်လုၵ်ႈသိတ်ႇ လုၵ်ႈၼွင်ႉၸွႆႈမႃးၸိူဝ်းၼၼ်ႉ ၶိုၼ်းမႃးလူႇပၼ်ၶဝ်ၶိုၼ်း။ ယိူင်းဢၢၼ်းမႃး ၸိူင်ႉၼၼ် ၵူၺ်းၼင်ႇၵဝ်ႇ။ ႁႂ်ႈၵူၼ်းမိူင်းမီးလွင်ႈဢုၼ်ႇၸႂ်ၼၼ်ႉယဝ်ႉ။ မိူဝ်ႈၶူးဝႃးပေႃႈ ယူႇၼႂ်းထမ်ႈၵေႃႈ ၸိူဝ်းမိူဝ်းပၢင်းမၼ်းၸဝ်ႈ ထိုင်ၼႂ်းထမ်ႈၵေႃႈ မီးၼႆလႄႈ ၶူးဝႃးပေႃႈ ၸင်ႇယေႃးမုၼ် ၸႅၵ်ႇဝၢၵ်ႈၵုသူလ် ပၼ်ၽီသၢင်သတ်းၵူၼ်း ႁႂ်ႈပူၼ်ႉလွတ်ႈ တၢင်းမႆႈတၢင်းၶီၼၼ်ႉယဝ်ႉ”- ဝႃႈၼႆ။

ၼႂ်းလိူၼ်ဢေႊပရိူဝ်ႊၼႆႉ ဢိင်ၼိူဝ်တၵ်ႉၵႃႇသတ်းထႃး ၼွၵ်ႈမိူင်းၽိတ်ႈပၢင်းဝႆႉသေ ၸဝ်ႈသိလ်ထမ်း ဝုၼ်းၸုမ်ႉ မီးၽႅၼ်တေဢွၵ်ႇၼွၵ်ႈမိူင်းၵႂႃႇထိုင်မိူင်းသိင်ႊၵပူဝ်ႊ။ ၵူၺ်းၵႃႈ မိူင်းႁူမ်ႈတုမ်သမ်ႉ ၵိုင်ႉ ၵၢင်ႉမႃးထူပ်းၽေး ၽႅၼ်ႇလိၼ်ဝႆလႄႈ ၸင်ႇလႆႈယႃႉပႅတ်ႈၽႅၼ်ၵၢၼ်တႃႇဢွၵ်ႇၼွၵ်ႈမိူင်းၼႆ ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼႄၼင်ႇၼႆ –

“မိူဝ်ႈတႄႇမၼ်း ၶူးဝႃးပေႃႈ မီးၶၢဝ်းတၢင်း သိင်ႊၵပူဝ်ႊဢေႃႈ။ သမ်ႉပဵၼ်ဢိင်ႇသၼ်ႇဝႆႉသေ ၶၢဝ်းတၢင်း သိင်ႊၵပူဝ်ႊၼၼ်ႉယႃႉသေၵေႃႈ ဢမ်ႇၵႂႃႇၼၼ်ႉၼႃႇ။ ၶိုၼ်းမႃးၸွႆႈႁႅင်းၼမ်ႉၸႂ် ၸိူဝ်းၼႆႉ။ သိင်ႊၵ ပူဝ်ႊတႄႉ သင်ၵႂႃႇၵေႃႈ တေဢၢင်ႈယူႇထိုင် 7 -8 ဝၼ်းၼႆႉ”- ဝႃႈၼႆ။  

ဝၼ်းတီႈ 20/04/2025 ၼႆႉၵေႃႈ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ယေႃးမုၼ်ႁွတ်ႈထိုင် ၸၼ်ႉၸွမ် ပုတ်ႉထမိူင်းတႆး ၼႂ်းၸႄႈဝဵင်းတူၼ်ႈတီးသေ သိုပ်ႇၶၢဝ်းတၢင်းၸူး ထၢတ်ႈၵွင်းမူးသူၺ်ႇတွင်ႇဢူး တီႈ ဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း။ ၼၼ်ႉၵေႃႈ ယိူင်းၸူးပႃး ၵူၼ်းမိူင်းထုင်ႉၼွင်ႁၢႆးယႃႈ တင်းသဵင်ႈ ၸိူဝ်းၺႃးၽေးၽႅၼ်ႇလိၼ်ဝႆ မိူၼ်ၵၼ်။

ၸဝ်ႈသိလ်ထမ်း ၶူးဝႃးဝုၼ်ႉၸုမ်ႉၼႆႉ မဵတ်ႉတႃႇတြႃးမိူဝ်ႈလႂ်ၵေႃႈ တိုၼ်းပၼ်ႁႅင်း ႁႂ်ႈၵူၼ်းမိူင်းမေႃယူႇ ၸွမ်းသိလ် ၵိၼ်ၸွမ်းထမ်းမႃးတႃႇသေႇ ၽွင်းၵူၼ်းထူပ်းၽေးၵူႈလွင်ႈလွင်ႈၼႆႉၵေႃႈ ၸဝ်ႈသိလ်ထမ်း ဢမ်ႇပွႆႇဢမ်ႇၽႃႈသေ ၶဝ်ထိုင်ပၼ်ႁႅင်းၵူၼ်းမိူင်း။

လုၵ်ႈသိတ်ႇတပႄး ၸဝ်ႈသိလ်ထမ်းၶူးဝႃးဝုၼ်းၸုမ်ႉ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –“ဢၼ်မၼ်းၸဝ်ႈ ဢွၵ်ႇတၢင်းၼႆႉၵေႃႈ ပိူင်လူင်မၼ်း ႁႂ်ႈၵူႈၵေႃႉ လႆႈၵတ်းယဵၼ်ၶျၢမ်းသႃႇၵူၺ်း။ ၵႂႃႇပၼ်ႁႅင်း ၸိူဝ်းဢၼ်လႆႈထူပ်းၽေးၸိူဝ်းၼႆႉၼၼ်ႉၼႃႇ”- ဝႃႈၼႆ။

ၸဝ်ႈသိလ်ထမ်းၶူးဝႃး ဝုၼ်းၸုမ်ႉၼႆႉ ၸဵမ်မိူဝ်ႈဢတိၵ်ႉထၢၼ်ႇ တိုဝ်းၵမ်သိလ် 3 ပီ 3 လိူၼ် 3 ဝၼ်း သေ ဢွၵ်ႇထမ်ႈမိူင်းၵႅတ်ႇမိူဝ်ႈပီ 2022 ။ ဝၢႆးၼၼ်ႉ ဢမ်ႇလိုဝ်ႈဢမ်ႇသဝ်း ဢွၵ်ႇၶၢဝ်းတၢင်း မဵတ်ႉတႃႇတြႃးပၼ်တၵ်ႉၵႃႇသတ်းထႃးၸေးၸွတ်ႇ ထိုင်တီႈပၢႆးယူႇလီ ယူပ်ႈယွမ်း။

ပၢႆးယူႇလီ ၸဝ်ႈယူပ်ႈယွမ်းသေတႃႉ ဢမ်ႇယင်ႉဢမ်ႇလိုဝ်ႈ တိုၵ်းၶတ်းၸႂ် ယေႃးမုၼ်မဵတ်ႉတႃႇတြႃး ပၼ်ၽီသၢင်သတ်းၵူၼ်းမႃးတႃႇသေႇလႄႈ ၵူၼ်းမိူင်းၼပ်ႉယမ်ဝႆသႃ ၼမ်ၶိုၼ်ႈမႃးၵူႈမိုဝ်ႉၵူႈဝၼ်း။