ၸုမ်းၵပ်းသၢၼ် လွင်ႈၼၢင်းယိင်းတႆး ပိုၼ်ၽၢဝ်ႇဝႃႈ ၼႂ်းၶၢဝ်းတၢင်း 2 လိူၼ်မႃးၼႆႉ ၼၢင်းယိင်းၼႂ်းမိူင်းတႆး ၺႃးပူၼ်ႉပႅၼ်တၢဝ်းၵမ်းလူၺ်ႈတူဝ်ႁဵတ်း သူပ်းဝႃႈတင်းမူတ်းမီး 30 လိူင်ႈပၢႆဝႃႈၼႆ။
ဝၼ်းတီႈ 1/8/2022 ယူႇတီႈၸုမ်းၵပ်းသၢၼ် လွင်ႈၼၢင်းယိင်းတႆး (SWAN) ပိုၼ်ၽၢဝ်ႇ ၶေႃႈမုလ်း ငဝ်းလၢႆးၵၢၼ်မိူင်းၸိုင်ႈတႆး ၼႂ်းၶၢဝ်းတၢင်း 2 လိူၼ် မေႊလႄႈၵျုၼ်ႊပူၼ်ႉမႃး။ ႁူမ်ႈပႃး ငဝ်းလၢႆး ၵူၼ်းပၢႆႈၽေးသိုၵ်း ဢိၵ်ႇ လွင်ႈပူၼ်ႉပႅၼ် ႁဵတ်းႁၢႆႉၸႃႉ တၢင်းၵႃႇမလႄႈ ဢိင်ၼိူဝ် လွင်ႈပႅၵ်ႇပိူင်ႈ ယိင်းၸၢႆး ၸိူဝ်းၼႆႉ။
ၽူႈမီးပုၼ်ႈၽွၼ်း ၼႂ်းၸုမ်းၵပ်းသၢၼ် လွင်ႈၼၢင်းယိင်းတႆး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ –“ၸွမ်းၼင်ႇ ၶေႃႈမုလ်းႁဝ်း ၶႃႈ ဢွၵ်ႇဝႆႉတႄႉ တင်းမူတ်း 33 လွင်ႈ ၼႂ်းၼၼ်ႉ လွင်ႈတဵၵ်းတဵင်ပေႉၵိၼ် ႁႂ်ႈႁူမ်ႈၵႃႇမၸွမ်း ၸႂ်ႉဢဵၼ်ႁႅင်းလႄႈ ၵႂၢမ်းလၢတ်ႈ တေမီး 10 လွင်ႈ။ ၼႂ်း 10 လွင်ႈၼၼ်ႉ တေပဵၼ်ၽူႈၵဵဝ်ႇၶွင်ႈၸွမ်းၸုမ်းယိပ်းၵွင်ႈၵၢင်ႇ 3 လွင်ႈ၊ လွင်ႈႁဵတ်းႁၢႆႉၸႃႉ တၢင်းၵႃႇ မ 8 လွင်ႈ”- ဝႃႈၼႆ။
လိူဝ်ၼၼ်ႉ လွင်ႈႁဵတ်းႁၢႆႉၸႃႉ ၼႂ်းႁိူၼ်းယေးသမ်ႉ မီး 15 လွင်ႈ။ ၵေႃႉဢၼ်ထုၵ်ႇတဵၵ်းတဵင်လူလၢႆ ပဵၼ် ၼၢင်းယိင်း ဢႃယု ၼႂ်းၵႄႈ 10 ၶူပ်ႇ ထိုင် 50 ပီ ။ ၵူၼ်းၼႂ်းပိုၼ်ႉတီႈသူင်ႇၶၢဝ်ႇတိူင်ႇလၢတ်ႈမႃးတီႈ ၸုမ်းၵပ်းသၢၼ်လွင်ႈၼၢင်းယိင်းတႆးၵမ်းသိုဝ်ႈ။ ပဵၼ် ၼႂ်းမိူင်းတႆးပွတ်းႁွင်ႇ 5 ၸႄႈဝဵင်း၊ ပွတ်းၸၢၼ်း 4 ၸႄႈဝဵင်းလႄႈ ပွတ်းဢွၵ်ႇၶူင်း 1 ၸႄႈဝဵင်း ဝႃႈၼႆ။
လွင်ႈၼႆႉ ၸုမ်း SWAN တိုၵ်းသူၼ်း ထိုင်ၸုမ်းယိပ်းၵွင်ႈၵၢင်ႇၵူႈမူႇၵူႈၸုမ်းၼႂ်းမိူင်းတႆး ႁႂ်ႈပၼ်တူတ်ႈတၢမ်ႇၵေႃႉ ႁဵတ်းပူၼ်ႉပႅၼ်ႁဵတ်းၽိတ်းလႄႈ ၵေႃႉဢၼ်ပူၼ်ႉပႅၼ်သုၼ်ႇလႆႈ ၵၼ်ႉၸၼ် ၼၢင်းယိင်း ဢၼ်ပဵၼ်ယူႇ မီးယူႇ ၼႂ်းၼႃႈလိၼ် ဢၼ်မုၵ်ႉၸုမ်းၸဝ်ႈၵဝ်ႇ ၵုမ်းၵမ်ဝႆႉၼၼ်ႉ။
ယဝ်ႉၵေႃႈ တိုၵ်းသူၼ်းထႅင်ႈဝႃႈ ႁႂ်ႈၸုမ်းယိပ်းၵွင်ႈၵၢင်ႇၵူႈမူႇ/ ၸုမ်း ၵိုတ်းယိုတ်းပႅတ်ႈ လွင်ႈႁဵတ်းႁၢႆႉၸႃႉတၢင်းၵႃႇမလႄႈ ၸွႆႈ ႁႄႉၵင်ႈၼၢင်းယိင်း ၸိူဝ်းယူႇ ၼႂ်းၼႃႈလိၼ် ဢၼ်ၸုမ်းၸဝ်ႈၵဝ်ႇ ၵုမ်းၵမ်ဝႆႉၼၼ်ႉ ယႃႇႁႂ်ႈၶဝ်လႆႈ ၶၢမ်ႇတၢမ်ႇ လွင်ႈႁဵတ်းႁၢႆႉ ၸႃႉ ဝႃႈၼႆ။
