သင်ၶၸဝ်ႈလႄႈ တၵ်ႉၵႃႇ မိူင်းတူၼ်  ႁၢင်ႈႁႅၼ်းတူဝ်ႈတၼ်းပႂ်ႉႁပ်ႉတွၼ်ႈ ၸဝ်ႈသိလ်ထမ်းၶူး ဝႃးဝုၼ်းၸုမ်ႉ တေမႃးတၢင်ႇထီးၵွင်းမူးပၼ် တီႈၼႂ်းဝၢင်းၶုမ်ၵုတ်း ၸဝ်ႈၼရေးသူၼ်။

ပေႃးထိုင်မႃး ႁူဝ်လိူၼ်ဢေႃႊၵတ်ႊသ် 2022 ၼႆႉ ယူႇတီႈသင်ၶၸဝ်ႈလႄႈ တၵ်ႉၵႃႇ သတ်ႉထႃး တေပၢင်းၸဝ်ႈသိလ် ထမ်း ၶူးဝႃးဝုၼ်းၸုမ်ႉ မႃးတၢင်ႇထီးၵွင်းမူး သပ်ႇပေႇၺုမင်ႇၵလႃႇ ၸုမ်ႈမိူင်း တီႈၶုမ်ၵုတ်းၸဝ်ႈၼရေးသူၼ် ဝၢၼ်ႈႁူၺ်ႈ ဢေႃႈ ဢိူင်ႇမိူင်းႁၢင် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။

ၵူၼ်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ႁဝ်းၶႃႈ ဢွၼ်ၵၼ်ႁၢင်ႈႁႅၼ်း တူဝ်ႈတၼ်း တႃႇတေတၢင်ႇထီး ၵွင်းမူး တီႈၶုမ်ၵုတ်းၽၸဝ်ႈၼရေးသူၼ် ႁဝ်းၶႃႈၼႆႉ ။ တေဢၢၼ်းတၢင်ႇ ၼႂ်းဝၼ်းတီႈ 5-6-7 လိူၼ်ၼႃႈၼႆႉ။ ပေႃးၸဝ်ႈၶူးဝႃး ဝုၼ်း ၸုမ်ႉ ႁဝ်းၶႃႈ ဢွၵ်ႇထမ်ႈမႃး။ ၼႂ်းဝၼ်းတီႈ 27 လိူၼ်ၼႆႉ ယူႇတီႈသင်ၶၸဝ်ႈလႄႈ လုၵ်ႈၼွင်ႉတပေး ၵႂႃႇတီႈထမ်ႈမိူင်းၵႅတ်ႇယဝ်ႉၶႃႈ။ တေၵႂႃႇပၢင်း ၶူးဝႃးဝုၼ်းၸုမ်ႉ တႃႇတေမႃးတၢင်ႇထီး ၵွင်းမူးၶႃႈဢေႃႈ ”- ဝႃႈၼႆ။

ယၢမ်းလဵဝ် တီႈၼႂ်းဝၢင်းၶုမ်ၵုတ်းၸဝ်ႈၼရေးသူၼ်ၼႆႉ လႆႈၵေႃႇဝႆႉ ၵွင်းမူး တင်းမူတ်း 2 သူႇ ။ တႃႇသူႇၼိုင်ႈပဵၼ်သူႇယႂ်ႇ မီးဝႆႉ ႁိမ်းၶၢင်ႈၶုမ်ၵုတ်းၸဝ်ႈၼရေးသူၼ်။ ထႅင်ႈသူႇၼိုင်ႈသမ်ႉ ပဵၼ်သူႇဢွၼ်ႇ ၵေႃႇၵုမ်းဝႆႉ တီႈၶုမ်ၵုတ်းၸဝ်ႈၼရေး သူၼ် ဝႆႉၵမ်းလဵဝ်။ တေႃႈလဵဝ် ၵွင်းမူးသွင်သူႇၼၼ်ႉ ၵေႃႇၵုမ်းဝႆႉမူတ်းယဝ်ႉ ပႂ်ႉၸဝ်ႈသိလ်ထမ်း ၶူးဝႃးဝုၼ်းၸုမ်ႉ မႃးတၢင်ႇထီး ပၼ်ၵူၺ်း ၵူၼ်းမိူင်းတူၼ်လၢတ်ႈ။

ၵွင်းမူး တီႈၶုမ်ၵုတ်း ၸဝ်ႈၼရေးသူၼ်ၼၼ်ႉ ၶူးဝႃးဝုၼ်းၸုမ်ႉ မႃးဢွၼ်ႁူဝ်ၵေႃႇသၢင်ႈ ဝၢင်းမၢၵ်ႇ ဢုတ်ႇဝႆႉ ၵွၼ်ႇၼႃႈတေၶဝ်ႈထမ်ႈ တီႈမိူင်းၵႅတ်ႇ။

ပူၼ်ႉမႃး ဝၼ်းတီႈ 11/12/2018 ၼၼ်ႉ သိုၵ်းဝႃႉ UWSA 775 ယၢင်ၵေႃႇၵျူင်း ဢွၼ်ႁူဝ်ၵူၼ်းသိုၵ်း 20 ၵေႃႉ၊ ၶဝ်ႈ ယႃႉထုပ်ႉလႅဝ် ၵျွင်းႁေႃးတြႃး ၸဝ်ႈသိလ်ထမ်း ၶူးဝႃးဝုၼ်းၸုမ်ႉ၊ သႃလႃးလင်ၼိုင်ႈလႄႈ ၵွင်းမူး/ထၢတ်ႈ တီႈၼႂ်းဝၢင်းၶုမ်ၵုတ်း ၸဝ်ႈၼရေးသူၼ်။

ဝၢႆးၼၼ်ႉ ဢမ်ႇပေႃးႁိုင် ယူႇတီႈသိုၵ်းဝႃႉ UWSA ၼႆႉ ၶိုၼ်းပိုၼ်ၽၢဝ်ႇပဵၼ်တီႈလိၼ်သႃသၼႃ ၶိုၼ်းႁွင်ႉလုၵ်ႈသိုၵ်းၶဝ် မႃး ၸွႆႈၵေႃႇၵုမ်းၵွင်းမူးၶိုၼ်း ၼႆယဝ်ႉ။