ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼႂ်းၸႄႈဝဵင်းၼမ်ႉတူႈ ၵႂၢတ်ႇလၢင်ႉ ၵူၼ်းသူႇသမ်းၵႃႉၶၢႆယႃႈမဝ်းၵမ် ၼႂ်းၸႄႈဝဵင်းၼမ်ႉတူႈ ႁၢဝ်ႈႁႅင်း ယၢမ်းလဵဝ် ၸဵမ်ၵူၼ်း ၵိၼ်/ ၵူၼ်းၶၢႆ လူတ်းယွမ်းလူင်းၼမ် ဝႃႈၼႆ။
ၵူၼ်းပိုၼ်ႉတီႈ ၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ် ၵူၼ်းသူႇသမ်းၵႃႉၶၢႆယႃႈမဝ်းၵမ် တီႈၼမ်ႉတူႈၼႆႉ လူတ်းယွမ်း လူင်းၼမ်ယဝ်ႉဢေႃႈ။ TNLA တင်း SSPP မႃးလေႇႁႃသွၵ်ႈ တီႉ ထိုင်ၼႂ်းဝၢၼ်ႈ။ သိုၵ်းတဢၢင်းၵေႃႈတီႉ ၸၢဝ်းတဢၢင်းၶဝ်။ သိုၵ်းတႆးၵေႃႈ တီႉၸၢဝ်းတႆး ႁဝ်း။ တေဢဝ်ၵႂႃႇမူၼ်ႉမႄးပၼ် တူဝ်ၸႂ်ၶဝ်ဝႃႈၼႆၶႃႈ ဢေႃႈ”- ဝႃႈၼႆ။
ပေႃး ပဵၼ်ၵူၼ်းသူႇသမ်းၵိၼ်ယႃႈမဝ်းၵမ်တႄႉ တေၵုမ်းတူဝ် ဢဝ်ၵႂႃႇမူၼ်းမေးပၼ်။ ပေႃးပဵၼ် ၵူၼ်း ၵႃႉၶၢႆသမ်ႉ ပၼ်တူတ်ႈတၢမ်ႇ ၸွမ်းၼင်ႇ မၢႆမီႈၼႂ်းမုၵ်ႉၸုမ်းၽႂ်မၼ်းမီးဝႆႉၼၼ်ႉ ၵူၼ်းပိုၼ်ႉတီႈ ၼမ်ႉတူႈသိုပ်ႇလၢတ်ႈ ၼင်ႇၼႆ။
“ၵူၼ်းသူႇသမ်းၵိၼ်တႄႉ ၶဝ်တေဢဝ်ၵႂႃႇမူၼ်ႉမႄးတူဝ်ၸႂ်ပၼ်သေယဝ်ႉ တေႁႂ်ႈ လူင်းလၢႆးမိုဝ်းပၼ် ၵႂၢမ်းမၼ်ႈၵႅၼ်ႇသေ ၸင်ႇပွႆႇပၼ်ၶိုၼ်း။ သင်ဝႃႈ ပွၵ်ႈတေမႃးသမ်ႉၵူတ်ႇထတ်းၺႃးထႅင်ႈၸိုင်တေပၼ် တၢမ်ႇၼၵ်းၼႃ။ လွင်ႈၶဝ် ႁဵတ်းသၢင်ႈၵႂၢတ်ႇလၢင်ႉၸိူင်ႉၼႆၼႆႉ ႁဝ်းၶႃႈ ႁၼ်လီၸွမ်းဢေႃႈ။ ၵူၺ်းၵႃႈ သိုၵ်းမၢၼ်ႈလႄႈ ပ လိၵ်ႈတႄႉ ဢမ်ႇႁဵတ်းသင်ပၼ်။ ႁၼ်ၸုမ်းယိပ်းၵွင်ႈၵၢင်ႇၶဝ် ႁဵတ်းၸိူင်ႉၼႆၵေႃႈ သိုၵ်းမၢၼ်ႈၶဝ်ႁဵတ်းၵႅင်ႈဢမ်ႇႁူႉ ဢမ်ႇႁၼ်သေယဝ်ႉဢေႃႈ”- ဝႃႈၼႆ။
ၵူႈပွၵ်ႈတၢင်းထုင်ႉၼမ်ႉတူႈၼႆႉ ၽွင်း RCSS ယူႇသဝ်းတူင်ႉၼိုင်ၼၼ်ႉၵေႃႈ တီႇၽဵဝ်ႈယႃႈမဝ်းၵမ် ၊ တီႉၺွပ်းၵူၼ်းသူႇသမ်းလႄႈပၼ်တူတ်ႈတၢမ်ႇၵူၼ်းၵႃႉၶၢႆယႃႈမဝ်းၵမ်။ ၽွင်းၼၼ်ႉယႃႈမဝ်းၵမ်ၵေႃႈ ဢမ်ႇလိူင်ႇၼမ်။ ဝၢႆးလင်ပၢင်တိုၵ်းသိုၵ်းသိူဝ်မႃးတေႃႇယၢမ်းလဵဝ် ယႃႈမဝ်းၵမ်လိူင်ႇၼမ်ႁႅင်းၶိုၼ်း ၼႂ်းၸႄႈဝဵင်းၼမ်ႉတူႈၵူၼ်းၼမ်ႉတူႈသိုပ်ႇလၢတ်ႈၼင်ႇၼႆ။
“ဝႆၢးသိုၵ်း RCSS ဢမ်ႇယူႇၼႆႉ ယႃႈမဝ်းၵမ်ၼႆႉမၼ်းလိူင်ႇၼမ်မႃးႁႅင်း လိူဝ်ၸႂ်မႃးႁႅင်းဢေႃႈ။ၵွပ်ႈၼႆယၢမ်းလဵဝ် သိုၵ်းဢူၺ်းလီၶဝ် ၶဝ်ႈၽဵဝ်ႈပၼ်လႄႈ ယႃႈမဝ်းၵမ် ႁၢႆၵႂႃႇတင်းၼမ်ၼႆ လႆႈဝႃႈလီတႃႇၵူၼ်းၼမ်ႉတူႈတႄႉတႄႉ ။ ၵၢင်ၸႂ်ႁဝ်းၵူၼ်းမိူင်းတႄႉ ၽိူဝ်ႇတေၽဵဝ်ႈၵၼ်ၼၼ်ႉ ၶႂ်ႈႁႂ်ႈသိုပ်ႇၽဵဝ်ႈယႃႈမဝ်းၵမ်ၵႂႃႇၸိူင်ႉၼႆတိၵ်းတိၵ်းဢေႃႈ။ ” – ၽူႈယိင်းဢႃယု 43 ပီ ဢၼ်ပဵၼ်မႄႈလုၵ်ႈဢွၼ်ႇၸၢႆးဢႃယု 18 ပီၼၼ်ႉလၢတ်ႈၼင်ႇၼႆ။
ယၢမ်းလဵဝ် ၵူၼ်းၸိူဝ်းမူၵ်းၼွၼ်းၸွမ်းၶၢင်ႈတၢင်းတႄႉ ဢမ်ႇလိူင်ႇၼမ်မိူၼ်ၵူႈပွၵ်ႈယဝ်ႉ ။ ၽူႈလၵ်ႉ ၸၵ်ႉၶုတ်ႈၵေႃႈ လူတ်းယွမ်း ၽူႈယိင်း ဢႃယု 30 ပၢႆ ဝဵင်းၼမ်ႉတူႈ ၵေႃႉ ၼိုင်ႈလၢတ်ႈ။
ၾၢႆႇၼိုင်ႈ သင်ၶၸဝ်ႈလႄႈ ၵူၼ်းမိူင်းၼမ်ႉတူႈ ဢမ်ႇၽွမ်ႉဢမ်ႇပၼ်ၶႂၢင်ႉလႄႈ ပၢင်တေႃႇလွင်း ၵေႃႈတိုၼ်းဢမ်ႇပၼ်ႁဵတ်း ၼႂ်းပွၵ်ႉ/ ယွမ်ႇ ၼႂ်းဝဵင်း ၸွမ်းပွႆးလၢမ်း ၶႅၵ်ႇလီပၢင်ၸႃႉ ၸိူဝ်းၼႆႉ။
