သိုၵ်းတဢၢင်း မၢပ်ႇၼႄးၵူၼ်းမိူင်းဝုၺ်း ဝႃႈပဵၼ်ၵူၼ်းၽႄႈၶၢဝ်ႇလွင်ႈတီႉၺွပ်းယႃႈမဝ်းၵမ်ၼႆသေ ဝၢႆးပွႆႇပၼ်ယဝ်ႉၼၼ်ႉၶိုၼ်းတီႉၺွပ်းၵုမ်းၶင်ထႅင်ႈၵမ်းၼိုင်ႈ တေႃႇထိုင်ယၢမ်းလဵဝ်ပႆႇပွႆႇပၼ်ၶိုၼ်း ၵူၼ်းႁိူၼ်းမႆႈၸႂ်။
မိူဝ်ႈဝၼ်းတီႈ 15/7/2022 ယၢမ်းၵၢင်ၶိုၼ်း 11 မူင်း သိုၵ်းတဢၢင်း TNLA တီႉၺွပ်းဢဝ်တူဝ် လုင်းဢၢႆႈသူၺ်ႇ တီႈမၢၼ်ႈမိူင်းဝုၺ်း ၸႄႈဝဵင်းၼမ်ႉၶမ်း မၢပ်ႇၼႄးဝႃႈ ပဵၼ်ၵူၼ်းသူင်ႇၶၢဝ်ႇ ၽႄႈၶၢဝ်ႇ လွင်ႈသိုၵ်းတဢၢင်း ၵူတ်ႇထတ်းတီႉၵူၼ်းသူႇသမ်းၵိၼ်ယႃႈ ဝႃႈၼႆ။
ၵူၼ်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “လုင်းဢၢႆႈသူၺ်ႇၼႆႉ မၼ်းဢမ်ႇၸႂ်ႈၵူၼ်းသူင်ႇၶၢဝ်ႇ ၊ မၼ်းယင်းဢမ်ႇႁူႉလွင်ႈ ၶၢဝ်ႇလွင်ႈငၢဝ်းသင်၊ မၼ်းပဵၼ်ၵူၼ်းဝၢၼ်ႈ ယူဝ်းယူဝ်းၵူၺ်း ၊ မၼ်းယင်း ဢမ်ႇမေႃလဵၼ်ႈမိုဝ်းထိုဝ်။ သိုၵ်းတဢၢင်းၶဝ်သမ်ႉ မၢပ်ႇၼႄးဝႃႈ မၼ်းပဵၼ်ၵူၼ်းသူင်ႇၶၢဝ်ႇ ၼႆသေ တီႉၺွပ်းဢဝ်တူဝ်မၼ်းၵႂႃႇ။ ယၢမ်းလဵဝ် ပဵၼ်ၵၢပ်ႈပၢၼ် Social Media လႄႈ ၶၢဝ်ႇၼႆႉ ၽႂ်ၵေႃႉသူင်ႇ လုၵ်ႉတၢင်းလႂ်ၵႂႃႇ ဢၼ်ဝႃႈၼၼ်ႉ ၽႂ်တေႁူႉ။ ၵွပ်ႈၼႆလႄႈ မၼ်းၸၢႆးၼၼ်ႉ ႁဝ်းၶႃႈ ယုမ်ႇယမ် ႁူဝ်ပၢၵ်ႇၵမ်းလဵဝ်ဝႃႈ မၼ်းဢမ်ႇၸႂ်ႈ ၵူၼ်းသူင်ႇၶၢဝ်ႇ။ ႁဝ်းၶႃႈ တုၵ်းယွၼ်းထိုင်ဝႃႈ ႁႂ်ႈၶဝ်ပွႆႇ ပၼ်ၶိုၼ်းဢေႃႈ”- ဝႃႈၼႆ။
လုင်းဢၢႆႈသူၺ်ႇၼႆႉ မိူဝ်ႈဝၼ်းတီႈ 13/7/2022 ၼၼ်ႉ သိုၵ်းတဢၢင်းၵူတ်ႇထတ်းၵူၼ်းသူႇသမ်း ယႃႈမဝ်း ၵမ် ၼႆသေ တီႉၺွပ်းမၼ်းၸၢႆးၵႂႃႇပႃး။ ဝၢႆးၼၼ်ႉႁႂ်ႈမုင်ႉ ႁိူၼ်းမၼ်းၸၢႆး ဢဝ်ငိုၼ်းၵႂႃႇထုတ်ႇဢဝ်ၶိုၼ်း 5 သႅၼ်ပျႃးလႄႈ မၼ်းၸၢႆးၶိုၼ်းလွတ်ႈမႃးမိူဝ်ႈ ဝၼ်း တီႈ 14/7/2022 ။ ထိုင်မႃး ဝၼ်းတီႈ 15/7/2022 ယၢမ်းၵၢင်ၶိုၼ်း 11 မူင်း ၶိုၼ်းမႃးတီႉဢဝ်တူဝ်မၼ်းၸၢႆးၵႂႃႇၶိုၼ်း မၢပ်ႇၼႄးဝႃႈ မၼ်းၸၢႆးပဵၼ်ၵူၼ်း သူင်ႇၶၢဝ်ႇ၊ ၽႄႈၶၢဝ်ႇ ဝႃႈၼႆ။
မိူဝ်ႈဝၼ်းတီႈ 17/7/2022 ယၢမ်းၵၢင်ၼႂ် 5 မူင်းၼၼ်ႉ သိုၵ်းတဢၢင်း ၼုင်ႈသိူဝ်ႈၵူၼ်းမိူင်းသေ ၸွပ်ႇသွၵ်ႈၵူၼ်းသူႇသမ်း ၵႃႉၶၢႆ ယႃႈမဝ်းၵမ် ႁၢဝ်ႈႁႅင်း တီႈမိူင်းဝုၺ်း တီႉၵႂႃႇထႅင်ႈ မၢႆးဢၢႆႈၼၢႆႇသွမ်ႇ ဢႃယု 38 ပီ၊ ၸၢႆးယီႈဢေး 39 ပီ။ ယၢမ်းၵၢင်ဝၼ်း သမ်ႉ တီႉၵႂႃႇထႅင်ႈ ၸၢႆးတၢၼ်း၊ ၸၢႆးယီႈလႄႈ ၸၢႆးဢၢႆႈလႅင်ႇ ၸိူဝ်းၼႆႉ။ ၵွၼ်ႇၼႃႈၼၼ်ႉၵေႃႈ ၶဝ်တီႉၺွပ်းၵႂႃႇထႅင်ႈတင်း ၼမ် ဢမ်ႇဝႃႈၸၢဝ်းတႆး၊ လွႆ၊ ၶႄႇလႄႈ ၶၢင် ၸိူဝ်းၼႆႉ။
မီးၶၢဝ်ႇဢွၵ်ႇမႃးဝႃႈ ၵူၼ်းသူႇသမ်းၵိၼ်ယႃႈ ဢၼ်သိုၵ်းတဢၢင်း TNLA တီႉၵႂႃႇ ၸိူဝ်းၼၼ်ႉ တေဢဝ်ၵႂႃႇ ႁဵတ်းၼႃးႁၢမ်း တၢင်းဝၢၼ်ႈမိူင်းၶၢၵ်ႇ မိူင်းမူး ၼႂ်းၸႄႈဝဵင်းၼမ်ႉၶမ်း၊ တၢင်းၵႂၢင်ႈၼႃးတႃႇၸိူဝ်ႉၽၼ်းၶဝ်ႈ ႁႃႈသိပ်းဢေႇၶိူဝ်း ၵူၼ်းၼမ်ႉၶမ်းလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ