သိုၵ်းမၢၼ်ႈတီႉၺွပ်း မေႃသွၼ် CDM တီႈၵဵင်းတုင်  သွင်ၵေႃႉ  ဢဝ်ၵႂႃႇ ၵုမ်းၶင်ဝႆႉ တီႈ လႂ်ပႆႇႁူႉ ပေႃႈမႄႈပီႈၼွင်ႉဢူၺ်းၵေႃႈဢွၼ်ၵၼ်မႆႈၸႂ်။

မိူဝ်ႈဝႃး ဝၼ်းတီႈ 17/7/2022 မေႃသွၼ် သေႃႇထႅၵ်ႉ (ႁွင်ႉ) သူၺ်ႇမၢၼ်းလႄႈ ၼေႇလိၼ်း ဢၼ်ႁဵတ်းဝႆႉ CDM တီႈဝဵင်း ၵဵင်းတုင် ၸိုင်ႈတႆးပွတ်းဢွၵ်ႇၶူင်းၼၼ်ႉ ထုၵ်ႇၶွင်ႇသီႇသိုၵ်းမၢၼ်ႈ ယိုတ်းမိူင်း တီႉၺွပ်းၵုမ်းတူဝ်ၵႂႃႇ  ။  

ၵူၼ်းၵဵင်းတုင် ၼၢင်းယိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဵတ်းသင်လႄႈ ၺႃးတီႉၵႂႃႇဢၼ်ဝႃႈၼၼ်ႉ ႁဝ်းၶႃႈ ဢမ်ႇ ႁူႉၶႃႈ။ ၵူၺ်းၵႃႈ လႆႈငိၼ်းၶဝ် ထဵင်ၵၼ်တႄႉ   မေႃသွၼ် 2 ၵေႃႉ   ႁဵတ်း CDM ဝႆႉ ၼၼ်ႉပိုတ်ႇပူင်သွၼ်လိၵ်ႈဢိင်းၵလဵတ်ႈတၢင်းၼွၵ်ႈလႄႈၺႃးၺွပ်းၼႆဢေႃႈ။ ၶွင်ပိူဝ်ႈၶဝ်ဢွၵ်ႇမၢႆမီႈဝႆႉဝႃႈ ၵူၼ်းႁဵတ်း CDM ၸိူဝ်းၼႆႉဢမ်ႇမီးၶႂၢင်ႉပိုတ်ႇပၢင်သွၼ်သင်ၼႆၶႃႈၼေႈ”- ဝႃႈၼႆ။

ဢိင်ၼိူဝ်  သိုၵ်းမၢၼ်ႈ  တီႉၺွပ်း ၵုမ်းၶင်  မေႃသွၼ် CDM ဝႆႉၸိူင်ႉၼႆၼႆႉသေ မေႃသွၼ်ၸိူဝ်း   ႁဵတ်း CDM ဝႆႉ တီႈဝဵင်းၵဵင်းတုင်ၼႆႉ  မႆႈၸႂ် လွင်ႈႁူမ်ႇလူမ်ႈၸဝ်ႈၵဝ်ႇတႄႉတႄႉ ဝႃႈၼႆ။

 ၼႂ်းဝူင်ႈဝၢင်ႈၼႆႉ သိုၵ်းမၢၼ်ႈလိုပ်ႈလမ်းတီႉၺွပ်းမေႃသွၼ်CDM ဢမ်ႇထၢတ်ႇ။  မိူဝ်ႈဝၼ်းတီႈ 13/7/2022 ၼၼ်ႉၵေႃႈ သိုၵ်းမၢၼ်ႈ  တီႉၺွပ်း မေႃသွၼ်ယိင်း CDM တီႈဝဵင်းၵၢတ်ႇလေႃႉ 1 ၵေႃႉ၊ ဝၼ်းတီႈ 14/7/2022 ယၢမ်းၵၢင်ၶမ်ႈ တီႉၺွပ်းထႅင်ႈ မေႃသွၼ်ယိင်း 5 ၵေႃႉ တီႈဝဵင်းႁၢႆးဝူဝ်း။ မေႃသွၼ်ယိင်း တီႈဝဵင်းဢေး သႃႇယႃႇ ၸႄႈတွၼ်ႈတူၼ်ႈတီး 2 ၵေႃႉလႄႈ ဝဵင်းယွင်ႁူၺ်ႈ 1 ၵေႃႉ ႁူမ်ႈၵၼ် တင်းမူတ်း 9 ၵေႃႉ။