မိူဝ်ႈၼႆႉဝၼ်းတီႈ 14/7/2022 ၸွမ်သိုၵ်းယႃႇပျေႉ ၾၢႆႇငမ်းယဵၼ်သိုၵ်းမၢၼ်ႈ ဢွၼ်ႁူဝ်တူဝ်တႅၼ်းၾၢႆႇသိုၵ်းမၢၼ်ႈ မႃးႁူပ်ႉတူဝ်တႅၼ်း ပႃႇတီႇမႂ်ႇသုင်ၸိုင်ႈတႆး SSPP/SSA တီႈ ငဝ်ႈငုၼ်းၵုမ်းၵမ်ယၼ်ႇသိုၵ်းမၢႆ 2 ဢၼ်မီးတီႈဝဵင်းမိူင်းၼွင် ၸႄႈဝဵင်းၵေးသီး ။

ၾၢႆႇ SSPP ပဵၼ် ၵႅမ်ႁူဝ်ပဝ်ႈ ၸဝ်ႈၶုၼ်သႅင်ဢွၼ်ႁူဝ်မႃးႁူပ်ႉထူပ်း။

ၽူႈတွႆႇႁွၵ်ႈၶတ်းၸႂ်တိတ်းတေႃႇၸူးၽူႈၶၢၼ်ပၢၵ်ႇ SSPP ၵေႃႈတိတ်းတေႃႇပႆႇလႆႈလႄႈ ပၢင်ဢုပ်ႇဢူဝ်းၵၼ်မိူဝ်ႈၼႆႉ ပဵၼ်လွင်ႈသင်လၢႆလၢႆၼႆ ပႆႇႁူႉတႅတ်ႈတေႃး။

ၵူၼ်းပိုၼ်ႉတီႈတႄႉလၢတ်ႈဝႃႈ လႅပ်ႈပဵၼ်လွင်ႈၶဵင်ႈၶႅင် ၵၢၼ်သိုၵ်း ၵၼ်တၢင်းမိူင်းသူႈၼႆႉၵူၺ်း- ဝႃႈၼႆ။

ၸဵမ်မိူဝ်ႈႁၢင်လိူၼ်မေႊ ၶွမ်ႊမတီႊဢုပ်ႇဢူဝ်း လွင်ႈငမ်းယဵၼ်လႄႈ လွင်ႈၽွမ်ႉႁူမ်ႈၸိူဝ်ႉၸၢတ်ႈ NSPNC သိုၵ်းမၢၼ်ႈ တႅမ်ႈလိၵ်ႈသူင်ႇၸူး SSPP ႁႂ်ႈထွႆထွၼ်တပ်ႉပၢင်သဝ်း 3 တီႈ ၸိူဝ်းပၵ်းဝႆႉတၢင်း လွႆၼၢႆးလႄႈ မၢၼ်ႈဝဵင်း ၼႂ်းၸႄႈဝဵင်းမိူင်းသူႈ။

တင်ႈတႄႇၼၼ်ႉမႃး သိုၵ်းမၢၼ်ႈသူင်ႇလိၵ်ႈ ၶိတ်ႇသဵၼ်ႈတၢႆပၼ်မႃး 3 ၵမ်းၵေႃႈ SSPP ဢမ်ႇထွႆထွၼ်။ 2 ၾၢႆႇၶဵင်ႈၶႅင်ၵၢၼ်သိုၵ်းတေႃႇၵၼ်မႃး တေႃႇထိုင်ဝၼ်းမိူဝ်ႈၼႆႉ။

ၾၢႆႇၼိုင်ႈ ဢၼ်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ယိုၼ်းမိုဝ်းၸူးၸုမ်းယိပ်းၵွင်ႈၵၢင်ႇ တႃႇဢုပ်ႇလွင်ႈငမ်းယဵၼ်ၼၼ်ႉ ၸုမ်းၸၢဝ်းၶိူဝ်း 10 ၸုမ်းပၼ်ဝႆႉသဵၼ်ၸိုဝ်ႈတႃႇၵႂႃႇႁူပ်ႉတီႈၼေႇပျီႇတေႃႇ။ ၼႂ်း 10 ၸုမ်းၼၼ်ႉ SSPP ၵေႃႈပၼ်ဝႆႉပႃးသဵၼ်ႈၸိုဝ်ႈ။ ႁိုင်မႃးၶၢဝ်းတၢင်း 2 လိူၼ် ၸုမ်းယိပ်းၵွင်ႈ 9 ၸုမ်း ၵႂႃႇႁူပ်ႉၸွမ်ၸိၵ်းသိုၵ်းမၢၼ်ႈယဝ်ႉသေတႃႉ SSPP တႄႉ ဢမ်ႇလႆႈၵႂႃႇႁူပ်ႉ တေႃႇထိုင်ယၢမ်းလဵဝ်။

ၽွင်း SSPP လႄႈ သိုၵ်းမၢၼ်ႈ ႁူပ်ႉၵၼ်တီႈမိူင်းၼွင်ၼႆႉ ၽူႈၼမ်းၸိၵ်းၸွမ်သိုၵ်းမၢၼ်ႈ မိၼ်းဢွင်ႇလၢႆႇသမ်ႉၵႂႃႇမီးမိူင်းရတ်ႉသျႃး တႃႇတၢင်ႇထီးၵွင်းမူးမၢၼ်ႈ ဢၼ်မီးတီႈမိူင်းရတ်ႉသျႃးၼၼ်ႉ လႆႈႁူႉၼင်ႇၼႆ။