ပၢင်တိုၵ်း တီႈဝဵင်းၾၢႆၶုၼ်  သိုၵ်းမၢၼ်ႈ တၢႆ 5 ၵေႃႉ

သိုၵ်းမၢၼ်ႈတင်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ၾၢႆႇသိုၵ်းမၢၼ်ႈ  တၢႆ 5 ၵေႃႉ  ။

ဝၼ်းတီႈ 13/7/2022 ၶွင်ႇသီႇသိုၵ်းမၢၼ်ႈ ယိုတ်းမိူင်း ဢၼ်ပၵ်းတပ်ႉဝႆႉ တီႈဝၢၼ်ႈသွင်ၼမ်ႉၵေး ၼႂ်းၸႄႈဝဵင်းၾၢႆၶုၼ် ၸႄႈ တွၼ်ႈတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၺႃးသိုၵ်းၵႅတ်ႇၶႄၵူၼ်းမိူင်း PDF တပ်ႉၵွင် (2) ဝဵင်းၾၢႆၶုၼ် ၶဝ်ႈလေႃႇ တိုၵ်းႁၢဝ်ႈႁႅင်းလႄႈ ၾၢႆႇသိုၵ်းမၢၼ်ႈ လူႉတၢႆ 5 ၵေႃႉ ဝႃႈၼႆ။

လုၵ်ႈၸုမ်း PDF ဝဵင်းၾၢႆၶုၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယူႇတီႈ ၸုမ်းႁဝ်းၶႃႈ ၶဝ်ႈတိုၵ်းၶဝ်ၶႃႈဢေႃႈ။   ပဵၼ်တပ်ႉပၢင်သဝ်းသိုၵ်းမၢၼ်ႈ  မႃးပၵ်းတပ်ႉယူႇဝႆႉ။ လႆႈယိုဝ်းၵၼ် မွၵ်ႈ 1 ၸူဝ်ႈမူင်းၼႆႉ။ ၾၢႆႇသိုၵ်းမၢၼ်ႈတၢႆ 5 ၵေႃႉ။ တၢင်းႁဝ်းၶႃႈတႄႉ ဢမ်ႇမီးလွင်ႈမၢတ်ႇၸဵပ်း လူႉတၢႆသင်”- ဝႃႈၼႆ။

  ပၢင်တိုၵ်းတီႈဝၢၼ်ႈသွင်ၼမ်ႉၵေးၼႆႉ  ၾၢႆႇသိုၵ်းမၢၼ်ႈ ယိုဝ်းၵွင်ႈလူင်ၸွႆႈလႄႈ သိုၵ်း PDF  လႆႈထွႆသိုၵ်းဢွၵ်ႇ ဝႃႈၼႆ။

“တၢင်းၾၢႆႇသိုၵ်းမၢၼ်ႈၶဝ် ယိုဝ်းၵွင်ႈလူင်ၸွႆႈလႄႈ ႁဝ်းၶႃႈလႆႈထွႆဢွၵ်ႇၶႃႈဢေႃႈ။ တီႈဝၢၼ်ႈသွင်ၼမ်ႉၵေးၼႆႉ ဢမ်ႇမီးၵူၼ်း ဝၢၼ်ႈယူႇယဝ်ႉၶႃႈ။ ၶဝ်ပၢႆႈၽေးသိုၵ်းဝႆႉလႆႈလၢႆလိူၼ်ယဝ်ႉ ပႆႇၸၢင်ႈပွၵ်ႈမႃး။ ယွၼ်ႉဝႃႈ ႁိမ်းႁွမ်းၸိူဝ်းၼၼ်ႉ မီးဝႆႉသိုၵ်းမၢၼ်ႈ ပၵ်းယူႇဝႆႉ ”- ၽူႈၶဝ်ႈၸုမ်း PDF သိုပ်ႇလၢတ်ႈၼႄၼင်ႇၼႆ။

  မိူဝ်ႈဝၼ်းတီႈ 9/7/2022 ၼၼ်ႉ ယူႇတီႈ ၸုမ်း PDF ၶဝ် ၶဝ်ႈလူမ်ႇယိုဝ်း ႁူင်းပလိၵ်ႈမၢၼ်ႈလႄႈ လုမ်းၽူႈၵွၼ်း ၸႄႈ ဝဵင်းၾၢႆၶုၼ် ၼင်ႇၵဝ်ႇ။

တႃႇတေလုၵ်ႉၽိုၼ်ႉၸဝ်ႈဢႃႇၼႃႇသိုၵ်း ႁႂ်ႈထွၼ်လႆႈတင်းႁၢၵ်ႈတင်းႁူဝ်ၼႆသေ ၸုမ်းသိုၵ်းၵႅတ်ႇၶႄၵူၼ်းမိူင်း (ဢၼ်မီးၵူၼ်းၼုမ်ႇၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ ၶဝ်ႈႁူမ်ႈပႃးဝႆႉ) ၼၼ်ႉ ႁူမ်ႈၵၼ်တင်းသိုၵ်းၸၢဝ်းၶိူဝ်းၼႂ်းမိူင်းယၢင်းၽိူၵ်ႇ ယၢင်းလႅင်သေ ပိုတ်းယိုဝ်းသိုၵ်းမၢၼ်ႈမႃးလူၺ်ႈၵူႈတၢင်း ၼႂ်းၶၢဝ်းတၢင်း ပီပၢႆၼႆႉ။