ယၢမ်းလဵဝ်သိုၵ်းမၢၼ်ႈယိုတ်းမိူင်း၊ SSPP လႄႈ RCSS သၢမ်ပႃႈသၢမ်ၾၢႆႇ ၶဵင်ႈၶႅင်ၵၢၼ်သိုၵ်းၵၼ်ဝႆႉ ၼႂ်းဝၢၼ်ႈဢိူင်ႇ ၸႄႈဝဵင်းလွၵ်ႉၸွၵ်ႇ ၊ ၵူၼ်းမိူင်းမႆႈၸႂ်ႈၵူဝ်ပဵၼ်ပၢင်တိုၵ်း၊ ဢွၼ်ၵၼ်ႁၢင်ႈႁႅၼ်းၶူဝ်းၵိၼ်ၶူဝ်းၸႂ်ႉဝႆႉတူဝ်ႈတၼ်း ၵူၼ်းၼႂ်းဢိူင်ႇၼွင်ဝူဝ်းလၢတ်ႈ။
သိုၵ်း 3 ၸုမ်းၼႆႉထႅမ်ႁႅင်းသိုၵ်း ၶဵင်ႈၶႅင်ငႃၵၼ်ဝႆႉၼႂ်း ဢိူင်ႇၼွင်ဝူဝ်း၊ ဢိူင်ႇၼွင်လူင်လႄႈ ဢိူင်ႇၵျွၵ်ႉၵူႇ ၼႂ်းၸႄႈဝဵင်းလွၵ်ႉၸွၵ်ႇၸဵမ်မိူဝ်ႈႁူဝ်လိူၼ်ၵျူႊလၢႆႊၼႆႉမႃး။
ၵူၼ်းဝၢၼ်ႈ ၼႂ်းဢိူင်ႇၼွင်ဝူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းတၢင်း 7-8 ဝၼ်းမႃးၼႆႉ သိုၵ်းမၢၼ်ႈ၊ သိုၵ်း SSPP လႄႈ သိုၵ်း RCSS ၶဝ်သၢမ်ၸုမ်းၼႆႉ ငႃၵၼ် မိူၼ်သၢမ်ၶႃၵဵင်းဝႆႉၶႃႈ။ ႁဝ်းၶႃႈ ၵူဝ်ၶဝ်ယိုဝ်းၵၼ်ၶႃႈဢေႃႈ။ ယၢမ်းလဵဝ်သမ်ႉ ပဵၼ် ၽွင်းၶၢဝ်းၵၢၼ်လႄႈ ပဵၼ်ဢၼ်ယၢပ်ႇၽိုတ်ႇတႃႇႁဝ်းၵူၼ်းမိူင်းတႄႉတႄႉ။ ၵမ်ႈၼမ် ပေႃးႁၢင်ႈႁႅၼ်းၶူဝ်းလဵင်း ၶဝ်ႈၼမ်ႉ တၢင်းၵိၼ်ၵၼ်ဝႆႉထႃႈယဝ်ႉ တႃႇတေပၢႆႈ ပေႃးသဵင်ၵွင်ႈတႅၵ်ႇ ”- ဝႃႈၼႆ။
သင်ဝႃႈ ပဵၼ်ပၢင်တိုၵ်းၵၼ်မႃး တေတုမ်ႉတိူဝ်ႉၵူၼ်းမိူင်းၵမ်းသိုဝ်ႈ။ ၵူၼ်းမိူင်းတေလႆႈဝႆႉၵၢၼ် ဝႆႉငၢၼ်းသေ ပၢႆႈ။ ၵွပ်ႈၼၼ်လႄႈၵူၼ်းမိူင်းတုၵ်းယွၼ်းဝႃႈ ယႃႇႁႂ်ႈလႆႈပဵၼ်ပၢင်တိုၵ်းသေၵမ်း ၵူၼ်းဝၢၼ်ႈၼႂ်းဢိူင်ႇၵျွၵ်ႉၵူႇလၢတ်ႈ။
တႄႇဢဝ် ႁၢင်လိူၼ်ၵျုၼ်ႊ မႃးတေႃႇထိုင် မိူဝ်ႈၼႆႉ 14/7/2022 ၼႆႉ သိုၵ်းမၢၼ်ႈ ပလိၵ်ႈမၢၼ်ႈ ႁူမ်ႈၵၼ် တင်ႈလၢၼ်ႇ ၼႂ်းၵႄႈ ဝဵင်းလွၵ်ႉၸွၵ်ႇ – ဝဵင်းယွင်ႁူၺ်ႈ၊ ၼႂ်းၵႄႈ လွၵ်ႉၸွၵ်ႇ – တူၼ်ႈတီး၊ တင်ႈပႃး ၼႃႈတပ်ႉပႃႉထူး (ဗထူး တပ်မြို့ ဢၼ်မီးၸၼ်ႉၸွမ်ၽူႈမီးၸၼ်ႉ) ၼိူဝ်သဵၼ်ႈတၢင်း လွၵ်ႉၸွၵ်ႇ – ၼမ်ႉလၼ်ႈ ႁၢမ်ႈၵူၼ်းၵႂႃႇမႃး တႄႇဢဝ် 8 မူင်းၵၢင် ၶမ်ႈ – 4 မူင်းၵၢင်ၼႂ်ၸဝ်ႉ။
လွင်ႈၼႆႉၵေႃႈ တုမ်ႉတိူဝ်ႉလွင်ႈၵႂႃႇမႃးႁဵတ်းၵၢၼ် ၵူၼ်းမိူင်းၼႆသေ ဢွၼ်ၵၼ်တုၵ်းယွၼ်းႁႂ်ႈပူတ်းလၢၼ်ႇ/ၵဵတ်ႉ ၸိူဝ်းၼၼ်ႉပႅတ်ႈ ၼႆလၢႆလၢႆၵမ်းၵေႃႈ သိုၵ်းမၢၼ်ႈဢမ်ႇထွမ်ႇဢမ်ႇသႂ်ႇၸႂ်။
