Thursday, March 28, 2024

ၶၢဝ်ႇလိုဝ်းဝႃႈ “ ဝႃႉႁပ်ႉ NCA” ၼၼ်ႉ UWSA ပိုၼ်ၽၢဝ်ႇဝႃႈ ပဵၼ်ၶၢဝ်ႇပွမ်

Must read

UWSA ဢွၵ်ႇၶေႃႈပိုၼ်ၽၢဝ်ႇဝႃႈ လွင်ႈလိုဝ်းၵၼ်ဝႃႈ ဝႃႉႁပ်ႉ NCA ၶေႃႈတူၵ်းလူင်း ၵိုတ်းတိုၵ်းပတ်းပိုၼ်ႉ တူဝ်ႈမိူင်းဢၼ်ဝႃႈၼၼ်ႉ ဢမ်ႇၸႂ်ႈပဵၼ်ၶၢဝ်ႇဢမ်ႇမၢၼ်ႇမႅၼ်ႈ ဝႃႈၼႆ။

ၾၢင်ႁၢင်ႈ တပ်ႉသိုၵ်းဝႃႉ

ၽူႈမီးပုၼ်ႈၽွၼ်း လုမ်းၵပ်းသၢၼ်ဝႃႉ တီႈလႃႈသဵဝ်ႈ ဢူးယီႇယၢၼ်ႇ လၢတ်ႈဝႃႈ “ ဝၢႆးသေၶၢဝ်ႇၼႆႉ ဢွၵ်ႇယဝ်ႉ လွင်ႈဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ်ၵႂႃႇတၢင်းၼႃႈတေမီးၸိူင်ႉႁိုဝ်ဢၼ်ဝႃႈ ၼၼ်ႉ ၶႃႈႁဝ်းဢမ်ႇလႆႈႁပ်ႉႁူႉၸွမ်း။ မိူဝ်ႈၵူႈပွၵ်ႈတႄႉ မီးလွင်ႈႁူပ်ႉထူပ်းဢုပ်ႇဢူဝ်းၵၼ်ယူႇ။ ၵၢၼ်တႅမ်ႈလိၵ်ႈ သူင်ႇယိုၼ်ႈၵၼ်ၵေႃႈ မီးယူႇ။ ဢဝ်ၼႆႉၵႂႃႇ တေသိုပ်ႇဢုပ်ႇဢူဝ်း ၵၼ်ၵႂႃႇတၢင်းၼႃႈ ပဵၼ်ၶၵ်ႉပဵၼ်တွၼ်ႈတႄႉ တိုၵ်ႉမီးတင်းၼမ်ယူႇ” ဝႃႈၼႆ။

- Subscription -

ၼႂ်းၶေႃႈပိုၼ်ၽၢဝ်ႇၼၼ်ႉ တႅမ်ႈဝႆႉဝႃႈ ယွၼ်ႉၶၢဝ်ႇပွမ်ၼၼ်ႉသေ ႁဵတ်းႁႂ်ႈၶၵ်ႉၵၢၼ်လွင်ႈငမ်းယဵၼ်ၸိူင်ႉၵၢတ်ႈတူၵ်းလႃႈတူၵ်းလိုၼ်း။ ယူႇတီႈၸုမ်းဝႃႉသေ ဢမ်ႇသၢၼ်ၶတ်းလွင်ႈၵိုတ်းတိုၵ်းသေတႃႉ ဢၼ်ဢမ်ႇလႆႈၸႂ်ၶေႃႈတူၵ်းလူင်းမၢင်ၶေႃႈၼႂ်းလိၵ်ႈႁူမ်ႈမၢႆ NCA ၼၼ်ႉၵေႃႈ ယူႇတီႈဝႃႉသေ တေဢုပ်ႇဢူဝ်းတင်းလူင်ပွင်ၸိုင်ႈ NLD လႄႈ တပ်ႉသိုၵ်းၵႂႃႇယူႇ။

ၼင်ႇႁိုဝ် လုၵ်ႈၸုမ်းဢူၺ်းလီ ပွတ်းႁွင်ႇတေလႆႈၶဝ်ႈပႃးၼႂ်းပၢင်ၵုမ်လူင် လွင်ႈငမ်းယဵၼ်ၼၼ်ႉၵေႃႈ ၽူႈၼမ်းဝႃႉတေၶတ်းၸႂ် ဢုပ်ႇဢူဝ်းလူင်ပွင်ၸိုင်ႈလႄႈ တပ်ႉသိုၵ်းယူႇ ဝႃႈၼႆ။

လိူဝ်ၼၼ်ႉ ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ သဵၼ်ႈတၢင်းတႃႇဢုပ်ႇဢူဝ်းသၢမ်ပႃႈ သၢမ်ၾၢႆႇၼၼ်ႉ ပိုတ်ႇမႃးၼၼ်ႉၵေႃႈ ဢမ်ႇၸႂ်ႈဝႃႈ ဝႃႉတူၵ်းလူင်းလႆႈၸႂ် ၶေႃႈလႆႈၸႂ် NCA ။ ဝႃႉႁၼ်လီၵမ်ႉထႅမ်ပၼ်ႁႅင်း လွင်ႈငမ်းယဵၼ်လႄႈ လွင်ႈၵိုတ်းတိုၵ်း။ ဢမ်ႇပၼ်ႁႅင်း ဢၼ်ဢဝ်ႁႅင်းသိုၵ်းသေၵႄႈလိတ်ႈပၼ်ႁႃ။ ယွၼ်ႉၼၼ် ၸုမ်းဝႃႉၸင်ႇလႆႈလူင်းလၢႆးမိုဝ်းၵိုတ်းတိုၵ်းတင်းလူင်ပွင်ၸိုင်ႈ ၸဵမ်မိူဝ်ႈပီ 2011။

ၵူၺ်းၵႃႈ လူင်ပွင်ၸိုင်ႈ ယႃႉၶေႃႈလႆႈၸႂ်လွင်ႈငမ်းယဵၼ် တင်းဝႃႉ သေ ၶိုၼ်းသၢင်ႈၶေႃႈတူၵ်းလူင်းလိၵ်ႈႁူမ်ႈမၢႆ NCA ဢၼ်ဢမ်ႇပႃး ၵၢင်ၸႂ်ဝႃႉၼၼ်ႉသေဢမ်ႇၵႃး ယင်းသူၼ်းဢီး ႁႂ်ႈဝႃႉ လူင်းလၢႆးမိုဝ်းလိၵ်ႈၵိၼ်ၵႅၼ်ႇ NCA ၼၼ်ႉထႅင်ႈ။

လူင်ပွင်ၸိုင်ႈ NLD ၵေႃႈ သိုပ်ႇႁဵတ်းၸွမ်းႁွႆး NCA ထႅင်ႈလႄႈ ၸင်ႇႁဵတ်းႁႂ်ႈၵၢင်ၸႂ်လႄႈ တၢင်းႁၼ်ထိုင် လူင်ပွင်ၸိုင်ႈ၊ တပ်ႉသိုၵ်းလႄႈ ဝႃႉၼၼ်ႉ ပိူင်ႈၵၼ် ဝႃႈၼႆ။

ၶေႃႈမုလ်း – RFA

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း