ပၢင်တေႃႇလွင်း တီႈဝဵင်းၵျွၵ်ႉမႄး ပိုတ်ႇမႃးၶၢဝ်းတၢင်း လိူၼ်ပၢႆ ရူတ်ႉၶိူင်ႈၵူၼ်းမိူင်းႁၢႆ ဢမ်ႇယွမ်း 5 လမ်း ၊ ယွၼ်ႉပၢင်တေႃႇလွင်းသေ  ပေႃႈလုၵ်ႈ ၽိတ်းမေႃးၵၼ် ထိုင်တီႈၽၼ်းၵၼ်တၢႆၵေႃႈမီးမႃးယဝ်ႉ။

ၾၢႆႇသိုၵ်းမၢၼ်ႈယင်းပႆႇယိုတ်းၶိုၼ်းမၢႆမီႈႁၢမ်ႈဢွၵ်ႇၼွၵ်ႈႁိူၼ်းယၢမ်းၵၢင်ၶိုၼ်း (မႃႇသျႄႇလေႃး) သေတႃႉ ပၢင်တေႃႇလွင်း ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆႉ ၶၢႆႉတီႈသေ ပိုတ်ႇမႃးလႆႈၶၢဝ်းတၢင်းလိူၼ်ပၢႆ။ ၵူၼ်းၵႂႃႇတေႃႇလွင်းယၢမ်းၵၢင်ၶမ်ႈၵၢင်ၶိုၼ်းၵေႃႈ သိုၵ်းမၢၼ်ႈ ဢမ်ႇဢဝ်လိူင်ႈသင်။  

ယၢမ်းလဵဝ်ပိုတ်ႇဝႆႉတီႈ တီႈပွၵ်ႉ 2  ၵျွၵ်ႉမႄး ၊ တိုၵ်ႉပိုတ်ႇလႆႈၶၢဝ်းတၢင်း 3 ဝၼ်းၵူၺ်း ရူတ်ႉၶိူင်ႈၵူၼ်းမိူင်းႁၢႆ 2 လမ်း ။  ဝၢႆးသွင်ၵေႃႉပေႃႈလုၵ်ႈၶႃႈၵၼ်တၢႆယွၼ်ႉပၢင်လွင်းသေ ထိုင်မႃး ဝၼ်းတီႈ 4/7/2022 ယၢမ်းၵၢင်ၶမ်ႈ   ပၢင်တေႃႇလွင်းတီႈၵျွၵ်ႉမႄး ထုၵ်ႇသင်ႇပိၵ်ႉဝႆႉ ။

ၵူၼ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တေႃႇလွင်း တီႈပွၵ်ႉ 2 ၼႆႉ တၼ်းပိုတ်ႇမႃး လႆႈ 3 ဝၼ်း  ရူတ်ႉၶိူင်ႈ ၵူၼ်း မိူင်းႁၢႆ 2 လမ်း ။ပေႃးၼပ်ႉၸဵမ်မိူဝ်ႈတႄႇပိုတ်ႇပၢင်လွင်းၼႂ်းၵျွၵ်ႉမႄး မႃးတေႃႇယၢမ်းလဵဝ် ၶၢဝ်းတၢင်းလိူၼ်ပၢႆမႃးၼႆႉ ရူတ်ႉၶိူင်ႈၵူၼ်းမိူင်းႁၢႆ ဢမ်ႇယွမ်း 5 လမ်းယဝ်ႉ။ ၾၢႆႇၼိုင်ႈ ၵူၼ်းပႅၵ်ႇၼႃႈ၊ ၽူႈလၵ်ႉၸၵ်ႉၶုတ်ႈၵေႃႈ လိူင်ႇၼမ်မႃးႁႅင်း”  – ဝႃႈၼႆ။

မိူဝ်ႈဝၼ်းတီႈ 30/6/2022 ယၢမ်းဝၢႆးဝၼ်း 3 မူင်းပၢႆ သွင်ပေႃႈလုၵ်ႈၽိတ်းမေႃးၵၼ် ယွၼ်ႉပၢင်တေႃႇလွင်းၼႆႉသေ ၵေႃႉပဵၼ် လုၵ်ႈယိင်း   ၽၼ်း ၵေႃႉပဵၼ်ပေႃႈၸဝ်ႈၵဝ်ႇတၢႆ ဝႃႈၼႆ။

“ၸႂ်ႈၶႃႈဢေႃႈ ၵေႃႉပဵၼ်လုၵ်ႈယိင်းလူင် ၶႃႈႁႅမ်ပေႃႈၸဝ်ႈၵဝ်ႇတၢႆ ။ ပေႃႈမၼ်းၸိုဝ်ႈႁွင်ႉဝႃႈ ဢူးထုၼ်းဢူး ဢႃယု 73 ပီ ယူႇပွၵ်ႉ 1 ဝဵင်းၵျွၵ်ႉမႄး။  လုၵ်ႈယိင်းမၼ်းၵႂႃႇလွင်းသုမ်းသေ မႃးယွၼ်းငိုၼ်းတီႈပေႃႈမၼ်း ။  ပေႃႈမၼ်းဢမ်ႇပၼ်လႄႈ  ၽၼ်းပေႃႈမၼ်းတၢႆ။  ယွၼ်ႉ ပၢင်တေႃႇလွင်းၼၼ်ႉယဝ်ႉ။ ၽိူဝ်ႇမီးၶၢဝ်ႇလွင်ႈၼႆႉ ဢွၵ်ႇမႃးလႄႈ  ပၢင်တေႃႇလွင်း ပွၵ်ႉ 2 ၵေႃႈ ၶဝ်သင်ႇပိၵ်ႉ ဝႆႉယဝ်ႉၶႃႈ”- ၵူၼ်းၵျွၵ်ႉမႄး လၢတ်ႈၼႄထႅင်ႈၼင်ႇၼႆ။

 ပၢင်တေႃႇလွင်း တီႈဝဵင်းၵျွၵ်ႉမႄး လိူင်ႇၼမ်ၼႆႉ ပဵၼ်ယွၼ်ႉသိုၵ်းမၢၼ်ႈ၊ ပလိၵ်ႈမၢၼ်ႈ ဢမ်ႇဢဝ်လိူင်ႈ၊  တင်ႈၸႂ်ပွႆႇဝႆႉ  မိူၼ်ႁဵတ်းႁႂ်ႈ ဢၵျၢင်ႉတၢင်းယၢမ်ႈ ၵူၼ်းမိူင်း/ ၵူၼ်းၼုမ်ႇလူႉ  ၊ ၾၢႆႇၼိုင်ႈ  တီႈဝဵင်းၵျွၵ်ႉမႄးၼႆႉ မၢႆမီႈႁၢမ်ႈဢွၵ်ႇႁိူၼ်းယၢမ်းၵၢင်ၶိုၼ်း ယင်းတိုၵ်ႉမီးယူႇ – ၵူၼ်းၵျွၵ်ႉမႄးလၢတ်ႈၼင်ႇၼႆ။

ၵူၼ်းၼုမ်ႇ ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈပလိၵ်ႈၶဝ်ၼႆႉ သင်ဝႃႈ ၵၢင်ၶမ်ႈ 8 မူင်းပူၼ်ႉၵႂႃႇ ၶဝ်ပႂ်ႉၵူတ်ႇ ထတ်းၸႅတ်ႈထၢမ်ၵူၼ်းၵႂႃႇမႃး ၸွမ်းၼႂ်းဝဵင်းႁၢဝ်ႈႁႅင်း ပေႃးဝႃႈ လုၵ်ႉမႃးတီႈပၢင်တေႃႇလွင်းဢိူဝ်ႈၼႆ ၶဝ်ဢမ်ႇၸႅတ်ႈ ဢမ်ႇ တူၺ်းသင် ပၼ်ၵႂႃႇမႃးလွတ်ႈလႅဝ်း။ သင်ဝႃႈ လုၵ်ႉတၢင်ႇတီႈမႃး ဢမ်ႇၸႂ်ႈတီႈပၢင်တေႃႇလွင်းၼႆ ၶဝ်ၵူတ်ႇထတ်းၸႅတ်ႈထၢမ် ၸွမ်းၾူၼ်း ၸွမ်းၼႂ်းၵႃး တႂ်ႈၵွပ်းရူတ်ႉၶိူင်ႈ ယဝ်ႉၵေႃႈ ပၢႆပေႃႉထုပ်ႉၸႅတ်ႈထၢမ်ႁၢဝ်ႈႁႅင်းထႅင်ႈၶႃႈဢေႃႈ”- ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄးၼႆႉ ၽူႈလၵ်ႉၸၵ်ႉၶုတ်ႈ ၵူၼ်းပႅတ်ႇၼႃႈ ၸိူဝ်းၼႆႉၵေႃႈ လိူင်ႇၼမ်ႁႅင်း ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်သင် ဝႃႈၼႆ။

ၸဝ်ႈၶွင် ရူတ်ႉၶိူင်းႁၢႆ ၵေႃႉၼိုင်ႈ တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ရူတ်ႉၶိူင်ႈႁဝ်းၶႃႈ ႁၢႆလမ်းၼိုင်ႈၶႃႈ ။ ၵွပ်ႈၼႆလႄႈ ၶႂ်ႈၾၢင်ႉထိုင် ၵူၼ်းမိူင်းႁဝ်းၶႃႈ ၵူႈၵေႃႉ ဢမ်ႇဝႃႈၵၢင်ဝၼ်းၵၢင်ၶိုၼ်းယႃႇပေဢွၼ်ၵၼ်ဝႆႉမဝ်မၢင် ။ ယွၼ်ႉႁဝ်းၶႃႈ ၵူၼ်းမိူင်းၼႆႉ ဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်သင်သေဢိတ်းယဝ်ႉၶႃႈ”- ဝႃႈၼႆ။

ပၢင်တေႃႇလွင်း တီႈဝဵင်းၵျွၵ်ႉမႄးၼႆႉ တင်းမူတ်းပိုတ်ႇဝႆႉ 4 တီႈ မိူၼ်ၼင်ႇ ဝၢၼ်ႈပဵင်းၼိမ်၊ ပွၵ်ႉ 6 ၊ ဝၢၼ်ႈၸွႆးၵုင်းလႄႈ တီႈပွၵ်ႉ 2 ။ ၵူၺ်းၵႃႈ တီႈပၢင်တေႃႇလွင်း ပွၵ်ႉ 2 ၼႆႉတႄႉ လႆႈထုၵ်ႇပိၵ်ႉဢိုတ်းၵႂႃႇ မိူဝ်ႈဝႃး ဝၼ်းတီႈ 4 ယၢမ်းၵၢင်ၶမ်ႈ ၼႆယဝ်ႉ။