သိုၵ်းမၢၼ်ႈ ယိုတ်းမိူင်းတင်း SSPP/SSA ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈမိူင်းမိတ်ႈ ၾၢႆႇသိုၵ်းမၢၼ်ႈ လူႉတၢႆ 3 ၵေႃႉ မၢတ်ႇၸဵပ်း 15 ၵေႃႉ၊ ပႃးၽူႈမီးၸၼ်ႉ 3 မၢႆ ၵေႃႉၼိုင်ႈ ဝႃႈၼႆ။
မိူဝ်ႈဝၼ်းတီႈ 1/7/2022 ယၢမ်းဝၢႆးဝၼ်း 3:00 မူင်း – 4:40 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ပႃႇတီႇမႂ်ႇသုင်ၸိုင်ႈ တႆး/ တပ်ႉသိုၵ်းၸိုင်ႈတႆး SSPP/SSA ပဵၼ်ပၢင်တိုၵ်းၵၼ် ၼႂ်းၵႄႈဝၢၼ်ႈပုင်ႇၵၢင် တင်း ဝၢၼ်ႈဢုမ်ႈ ၼႂ်းဢိူင်ႇပုင်ႇၵၢင် ၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ လူႉတၢႆ 3 ၵေႃႉလႄႈ မၢတ်ႇၸဵပ်း 15 ၵေႃႉ ၼႆယဝ်ႉ။
ၽူႈမီးၸၼ်ႉ SSPP ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၾၢႆႇသိုၵ်းမၢၼ်ႈ လူႉတၢႆ 3 ၵေႃႉ၊ မၢတ်ႇၸဵပ်း 15 ၵေႃႉ။ ၼႂ်းၵူၼ်းမၢတ်ႇၸဵပ်းၼၼ်ႉ ပႃးၽူႈမီး ၸၼ်ႉသၢမ်မၢႆ 1 ၵေႃႉၼိုင်ႈ။ တင်းႁဝ်းၶႃႈတႄႉ မၢတ်ႇၸဵပ်း 1 ၵေႃႉ၊ လူႉတၢႆ 1 ၵေႃႉ”- ဝႃႈၼႆ။
သိုၵ်းမၢၼ်ႈ ဢၼ်မၢတ်ႇၸဵပ်း ၸိူဝ်းၼၼ်ႉ ယၢမ်းလဵဝ် ဢဝ်ၵႂႃႇယူတ်းယႃတူဝ်ဝႆႉတီႈ ၼႂ်းတပ်ႉၶဝ် တီႈဝဵင်းမိူင်းမိတ်ႈမူတ်းယဝ်ႉ ဝႃႈၼႆ။
“ပိူင်ပဵၼ်မၼ်းၼႆႉ ႁဵတ်းၼႆ သိုၵ်းလွႆၶဝ် သႂ်ႇၶူဝ်းၵူၼ်းမိူင်းသေ ၵႂႃႇႁႃယွၵ်ႇသိုၵ်းမၢၼ်ႈ ၼႂ်းဝဵင်းဢွၵ်ႇမႃး မိူဝ်ႈၽွင်းၼၼ်ႉ သိုၵ်း ႁဝ်းၶႃႈသမ်ႉ တူင်ႉၼိုင် ယူႇဝႆႉႁိမ်းၸွမ်းဝၢၼ်ႈလႄႈ ၶဝ်ယွၵ်ႇသိုၵ်းမၢၼ်ႈ မႃးသုပ်းသႂ်ႇႁဝ်းသေ လႆႈပဵၼ်ပၢင်တိုၵ်းၵၼ် သိုၵ်းလွႆ ၶဝ်ၼၼ်ႉတႄႉ ငိူင်ႉဝႄႈႁဵတ်းၼၼ်ႉ ယွၼ်ႉၼၼ် တင်းသွင်ၾၢႆႇ ၸင်ႇလႆႈပဵၼ်ပၢင်တိုၵ်းၵၼ်”- ၽူႈမီးၸၼ်ႉ SSPP သိုပ်ႇ လၢတ်ႈၼႄၼင်ႇၼႆ။
သိုၵ်းမၢၼ်ႈ ယိုတ်းမိူင်း တင်း SSPP/SSA လႆႈပဵၼ်ပၢင်တိုၵ်းၵၼ်ၼၼ်ႉ ပဵၼ် ၼႂ်းၵႄႈဝၢၼ်ႈဢုမ်ႈတင်း ဝၢၼ်ႈပုင်ႇၵၢင် ၾၢႆႇသိုၵ်းမၢၼ်ႈသမ်ႉ ပဵၼ်တပ်ႉၵွင် 276 တင်း တပ်ႉၵွင် 348 တႂ်ႈတပ်ႉသိုၵ်းမၢၼ်ႈ မိူင်းမိတ်ႈ ၵုမ်းၵမ် ဝႃႈၼႆ။
ထိုင်မႃး မိူဝ်ႈဝႃး ဝၼ်းတီႈ 3 သမ်ႉ သိုၵ်းမၢၼ်ႈ ယိုတ်းမိူင်းတင်း သိုၵ်း TNLA, PDF ပဵၼ်ပၢင်တိုၵ်းၵၼ် တီႈၼႂ်းၸႄႈဝဵင်း မိူင်းမိတ်ႈ ထႅင်ႈ ဝႃႈၼႆ။
ၾၢႆႇၼိုင်ႈ သိုၵ်းမၢၼ်ႈၼႆႉ ထႅမ်ႁႅင်းသိုၵ်းၶိုၼ်ႈၸူးၼႃႈလိၼ် SSPP တူင်ႉၼိုင်တၢင်းၸႄႈဝဵင်းမိူင်းသူႈသေ ၶဵင်ႈၶႅင်ၵၢၼ်သိုၵ်းၵၼ်ဝႆႉ ။