Tuesday, March 19, 2024

ထႆး – မၢၼ်ႈ ပႆႇတူၵ်းလူင်းၵၼ်လႆႈတႃႇ ပိုတ်ႇၶူဝ် မႄႈသၢႆ – တႃႈၶီႈလဵၵ်း   

Must read

ဝၼ်းတီႈ 1/6/2022 ၼႆႉ ၵူၼ်းမိူင်းၾင်ႇမိူင်းထႆး မႄႈသၢႆလႄႈ ၾၢႆႇလူင်ပွင်ၸိုင်ႈထႆး မီးၵၢင်ၸႂ်ၶႂ်ႈပိုတ်ႇၶူဝ်မိုတ်ႈၵိုဝ်း မၢႆ (1) တႃႈၶီႈလဵၵ်း – မႄႈသၢႆ လႅၼ်လိၼ်တႆး – ထႆး ၊ ဢုပ်ႇၵုမ်ယိုၼ်ႈၶေႃႈၼွင်ႇငိူၼ်ႈၶႆတေႃႇၵၼ်လၢႆလၢႆၵမ်းယဝ်ႉသေတႃႉ ၾၢႆႇလူင်ပွင်ၸိုင်ႈမၢၼ်ႈ ပႆႇတူၵ်းလူင်းပွင်ႇပၼ်ၶိုၼ်းလႄႈ ပႆႇၸၢင်ႈပိုတ်ႇ။

Photo CJ-ၶူဝ်မႄႈသၢႆ တႃႈၶီလဵၵ်း ၼႂ်းဝၼ်းတီႈ 1/6/2022

“တၢင်းၾၢႆႇ ထႆးၶႂ်ႈပိုတ်ႇၼႃႇယဝ်ႉ တၢင်းၾၢႆႇမၢၼ်ႈ ဢမ်ႇတႅပ်းတတ်းလႆႈလႄႈ လႆႈသိုပ်ႇလၢႆးငၢၼ်း ၵႂႃႇတၢင်းၼိူဝ်။ ၵွပ်ႈဝၢၼ်ႈမိူင်းပႆႇၼိမ်လႄႈ တႃႇတေပိုတ်ႇၼၼ်ႉ ယင်းဢမ်ႇတႅပ်းတတ်းဝၼ်းမၼ်းလႆႈဝႃႈ  ။ယင်းမီးၶၢဝ်ႇတၢင်းၼႂ်း ၾၢႆႇမိူင်းထႆးဝႃႈ – တႃႇပိုတ်ႇၶူဝ်ၼႆႉ မၢၼ်ႈယွၼ်းငိုၼ်းတီႈထႆး 50 လၢၼ်ႉ။ ထႆးသမ်ႉ ပၼ်လႆႈ 20 လၢၼ်ႉၵူၺ်း။ ၼႆႉၵေႃႈ တူၵ်းလူင်းၵၼ်ပႆႇလႆႈၼႆၵေႃႈဝႃႈ။ ” ၵူၼ်းယူႇတႃႈၶီႈလဵၵ်းၵေႃႉၼိုင်ႈလၢတ်ႈ

- Subscription -

ဢိင်ၼိူဝ် လွင်ႈၼႆႉ ၵူၼ်းႁဵတ်းၵၢၼ် ပၢႆးမၢၵ်ႈမီး  ၾင်ႇမိူင်းတႆး ဢွၼ်ၵၼ်ဝႃႈ လႆႈမုင်ႈမွင်းမႃးႁိုင်ၼႃႇယဝ်ႉ ဢမ်ႇပဵၼ် ပိုတ်ႇသေပွၵ်ႈလႄႈ ယၢမ်းလဵဝ်တႄႉ   ဢမ်ႇပေႃးမီးတၢင်းမုင်ႈမွင်းယဝ်ႉဝႃႈၼႆ။  

ၵူၼ်းၵႃႉၶၢႆ ၶူဝ်းၵုၼ်ႇ ၵေႃႉၼိုင်ႈ လႅၼ်လိၼ်ထႆး လၢတ်ႈတီႈၽူႈတွႆႇႁွၵ်ႈဝႃႈ – “ တၢင်းမႄႈသၢႆတႄႉ မုင်ႈမွင်းၶႂ်ႈ ပိုတ်ႇၼႃႇယဝ်ႉ ။ တၢင်းမၢၼ်ႈ တႄႉ ႁူႉယူႇၼႃႇ ၶဝ်တေဢမ်ႇပိုတ်ႇၵမ်းလဵဝ်။  မိူဝ်ႈဝၼ်းၼၼ်ႉ ၶဝ်လၢတ်ႈယဝ်ႉ ၶဝ်တေပႂ်ႉၶေႃႈၸီႉသင်ႇတၢင်းၼိူဝ်ၵွၼ်ႇ ပေႃးၶဝ်လႆႈၶႂၢင်ႉယဝ်ႉ ပိုတ်ႇလႄႈၼႆၵေႃႈ ၸင်ႇတေၸၢင်ႈပိုတ်ႇ လႆႈငိၼ်းဝႆႉၸိူင်ႉၼႆ။ ၵွပ်ႈၼႆ ႁဝ်းၶႃႈတႄႉ ဢမ်ႇပေႃးမီးလွင်ႈမုင်ႈမွင်းယဝ်ႉၶႃႈ  ”- ဝႃႈၼႆ။

မိူဝ်ႈႁၢင်လိူၼ်မေႊ ပူၼ်ႉမႃးၼႆႉ ထႆး-မၢၼ်ႈ သွင်ၾၢႆႇၵမ်းၵမ်းႁူပ်ႉဢုပ်ႇၵမ် ၊ ၾၢႆႇထႆး ယိုၼ်ႈၶေႃႈတူၵ်းလူင်း ၶႂ်ႈပိုတ်ႇၶူဝ်ဝၼ်းတီႈ 1/6/2022 ၼႆလႄႈ ၵူၼ်းမိူင်းမုင်ႈမွင်းတႃႇၵၢၼ်ၵႃႉၶၢႆ၊ တႃႇပၢႆးပိင်ႇၺႃႇ  ၊ တႃႇပၢႆးယူႇလီၵူႈလွင်ႈလွင်ႈသေ မီးၶၢဝ်ႇလိုဝ်းၵၼ်ဝႃႈ တေပိုတ်ႇ ၶူဝ်မႄႈသၢႆ – တႃႈၶီႈလဵၵ်း   ၼႂ်းဝၼ်းမိူဝ်ႈၼႆႉ။

ၵူၼ်းၼုမ်ႇ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလႂ်လႄႈ ၶူဝ်ၼႆႉ ပိုတ်ႇၽၵ်းတူဢႃႈလီလီ တင်းသွင်ၾၢႆႇၵွၼ်ႇ ႁဝ်းၶႃႈ ၸင်ႇတေၸၢင်ႈ ယုမ်ႇလႆႈဝႃႈ ၶဝ်ပိုတ်ႇၶူဝ်ယဝ်ႉ ပေႃးပဵၼ်ၶၢဝ်ႇသေ လိုဝ်းၵၼ်ႁဵတ်းၼႆၵူၺ်းတႄႉ ဢမ်ႇပေႃးမုင်ႈမွင်းယုမ်ႇသင်လႆႈၶႃႈ မၼ်းလိုဝ်းၵၼ်ၸိူင်ႉၼၼ် ၵူၺ်း”- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၵွၼ်းၸႄႈတွၼ်ႈတႃႈၶီႈလဵၵ်းတႄႉလၢတ်ႈဝႃႈ  ယွၼ်ႉတၢင်းပဵၼ်ၶူဝ်ႊဝိတ်ႉ 19 တိုၵ်ႉမီးယူႇလႄႈ  ပႆႇၸၢင်ႈပိုတ်ႇၶူဝ် မႄႈသၢႆ- တႃႈၶီႈလဵၵ်းဝႃႈၼႆ။  

ဢူးမိၼ်ႉၼၢႆႇ ၽူႈၵွၼ်းၸႄႈတွၼ်ႈတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “လူင်ပွင်ၸိုင်ႈ မိူင်းမၢၼ်ႈဝႃႈ ယွၼ်ႉတၢင်းပဵၼ်ၶူဝ်ႊဝိတ်ႉ 19 တိုၵ်ႉ မီးယူႇလႄႈ ပႆႇပဵၼ်ပိုတ်ႇၼႆၶႃႈ။ တေႃႈလဵဝ် ဢၼ်ပိၵ်ႉဢိုတ်းၽၵ်းတူယူႇၼႆႉၵေႃႈ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၵူၺ်း”- ဝႃႈၼႆ။

မိူဝ်ႈဝၼ်းတီႈ 24/5/2022 ၽူႈၵွၼ်းၸႄႈတွၼ်ႈၵဵင်းႁၢႆး ၽတ်းသၵွၼ်း ပုၼ်းယလၵ်းလႄႈ ၽူႈၵွၼ်းၸႄႈတွၼ်ႈတႃႈၶီႈလဵၵ်း ဢူးမျိၼ်ႉၼၢႆႇ ဢွၼ်မူႇၸုမ်းတၢင်တူဝ်တင်းသွင်ၾၢႆႇ ႁူပ်ႉထူပ်းဢုပ်ႇဢူဝ်းၵၼ် တီႈလၢၼ်ႇၵၢၼ်သိုဝ်ႉၶၢႆ ၾင်ႇမႄႈသၢႆ၊ တႃႇယုၵ်ႉမုၼ်း ၵၢၼ်ၵႃႉၶၢႆ တင်းသွင်ၾင်ႇ ၸိုင်ႈမိူင်းၼႆသေ ၾၢႆႇထႆးဢုပ်ႇဢူဝ်းယိုၼ်ႈလိၵ်ႈ တႃႇပိုတ်ႇၵဵတ်ႉ/လၢၼ်ႇ ၵဵင်းၶွင်၊ ၵဵင်းသႅၼ်လႄႈ လၢၼ်ႇမႄႈသၢႆ – တႃႈၶီႈလဵၵ်း ၼႂ်းဝၼ်းတီႈ 1/6/2022 ၼႆႉ။

ၼႂ်းလၢၼ်ႇလႅၼ်လိၼ် 7 ဢွင်ႈတီႈၼၼ်ႉ တႃႇ 2 တီႈ ပဵၼ်လၢၼ်ႇၶဝ်ႈဢွၵ်ႇ ပဵၼ်တၢင်းၵၢၼ် လၢၼ်ႇၽၵ်းတူ ၶူဝ်မိုတ်ႈၵိုဝ်းမၢႆ 1 တင်း မၢႆ 2 တႃႈ ၶီႈလဵၵ်း – မႄႈသၢႆ။ တႃႇ 5 တီႈၼၼ်ႉသမ်ႉ ပဵၼ်လၢၼ်ႇၵၢၼ်ၵႃႉၶၢႆ ၶူဝ်းၶွင်ၵုၼ်ႇ ၸူဝ်ႈၶၢဝ်း မိူၼ်ၼင်ႇ – လၢၼ်ႇၵႃႉၶၢႆ ပိုၼ်ႉတီႈ တႃႈဝၢၼ်ႈသၢႆ လူမ်းၸွႆး ဢိူင်ႇဝဵင်းၽၢင်ၶမ်း ၸႄႈဝဵင်းမႄႈသၢႆ၊ လၢၼ်ႇၵႃႉၶၢႆ တႃႈဝၢၼ်ႈၵေႃႇသၢႆး ဢိူင်ႇမႄႈသၢႆ ၸႄႈဝဵင်းမႄႈသၢႆ၊ လၢၼ်ႇၵႃႉ ၶၢႆတႃႈဝၢၼ်ႈပၢင်း ႁႃႉ ဢိူင်ႇၵေႃႇၸၢင်ႉ ၸႄႈဝဵင်းမႄႈသၢႆ၊ လၢၼ်ႇၵႃႉၶၢႆ တႃႈလိၼ်လမ် မူႇ 5 ဢိူင်ႇၵေႃႇၸၢင်ႉ ၸႄႈ ဝဵင်းမႄႈသၢႆလႄႈ လၢၼ်ႉၵႃႉၶၢႆ ပၢၼ်ႉသူပ်ႇလူၵ်ႉ မူႇ 1 ဢိူင်ႇဝဵင်း ၸႄႈဝဵင်းၵဵင်းသႅၼ် ၸိူဝ်းၼႆႉ။

ဢိင်ၼိူဝ်တၢင်းပဵၼ်ၶူဝ်ႊဝိတ်ႉၽႄႈလၢမ်းတိတ်းၸပ်းၵၼ်မိူဝ်ႈႁူဝ်ပီ 2020 ၼၼ်ႉသေတႃႇႁႄႉၵင်ႈတၢင်းပဵၼ် တေဢမ်ႇလၢမ်းၽႄႈၸပ်းၵၼ်လႆႈၼၼ်ႉ ယူႇတီႈၽူႈၵွၼ်းၸႄႈတွၼ်ႈၵဵင်းႁၢႆး သင်ႇပိၵ်ႉ ဢိုတ်းၽၵ်းတူ လႅၼ်လိၼ်တႆး – ထႆး (မႄႈသၢႆ – တႃႈၶီႈလဵၵ်း) တေႃႇထိုင်ယၢမ်းလဵဝ်လႆႈမႃးၶၢဝ်းတၢင်း 2 ပီပၢႆ၊ ယၢမ်းလဵဝ် ၾၢႆႇထႆးပိုၼ်ၽၢဝ်ႇဝႃႈ တၢင်းပဵၼ်ၶူဝ်ႊဝိတ်ႉ ပဵၼ်တၢင်းပဵၼ်ယူဝ်းယူဝ်း ထမ်းမတႃး မိူၼ်ၸဵပ်းမႆႈၶႆႈၼၢဝ်ၵူၺ်းယဝ်ႉၼႆသေ ၶိုၼ်းပိုတ်ႇဝၢၼ်ႈပိုတ်ႇမိူင်း ၊ ႁပ်ႉၶႅၵ်ႇၼွၵ်ႈမိူင်း ၊ ပိုတ်ႇၽၵ်းတူလႅၼ်လိၼ် ဢၼ်တိတ်းၸပ်းမိူင်းလၢဝ်း မိူင်းၵမ်ႇပေႃႊတီႊယႃႊ မိူင်းမလေးသျႃး ယဝ်ႉသေတႃႉ လၢၼ်ႇဢၼ်တိတ်းၸပ်းတၢင်း မိူင်းမၢၼ်ႈတႄႉ ပႆႇၸၢင်ႈပိုတ်ႇသေတီႈ ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း