ၵူၼ်းမူႇၸေႊ – ၼမ်ႉၶမ်း  ၶၢၼ်ၸႂ် လႆႈသႂ်ႇၶွၼ်ႇပၼ် ၸုမ်းယိပ်းၵွင်ႈၵၢင်ႇၼမ်

ၵူၼ်းၼမ်ႉၶမ်း ၶၢၼ်ၸႂ် လႆႈသႂ်ႇပၼ်ၶွၼ်ႇ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼႂ်းပိုၼ်ႉတီႈ ၼမ်ႁႅင်းလိူဝ်ၵူႈပီ ပဵၼ်သွင်ပုၼ်ႈ။

လိူၼ်ဢေႊပရိူဝ်း – မေႊ 2022 ၶၢဝ်းတၢင်းသွင်လိူၼ်မႃးၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း သိုၵ်းၶၢင် KIA တင်း သိုၵ်းတ ဢၢင်း TNLA ၵဵပ်းၶွၼ်ႇၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ မႃးႁၢဝ်ႈႁႅင်း။  ၼွၵ်ႈလိူဝ်ႁႃၵိၼ်လဵင်ႉတွင်ႉယၢပ်ႇ သိုၵ်းတဢၢင်းသမ်ႉၵဵပ်းငိုၼ်း ၼမ်ၶိုၼ်ႈသွင်ပုၼ်ႈ ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်ထူပ်းတၢင်းယၢပ်ႇၽိုတ်ႇ ၵိၼ်းၸႂ်ႁႅင်း။

ၵူၼ်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶၢဝ်းတၢင်း 2 လိူၼ်မႃးၼႆႉ သိုၵ်းလွႆ  မႃးၵဵပ်းၶွၼ်ႇ ၵူၼ်းၶၢႆလၢၼ်ႉ/ ႁၢၼ်ႉ ပီၼႆႉ တိူဝ်း ၶိုၼ်ႈထႅင်ႈ 2 ပုၼ်ႈ။ ပီၵၢႆ လႆႈပၼ် 3 သႅၼ် ပီၼႆႉ ပဵၼ်ၵႂႃႇ 6 သႅၼ်။  ပေႃးမေႃႈလၢတ်ႈမေႃသဵတ်ႈ လႆႈပၼ် 5 သႅၼ်။ ၸိူဝ်းလႆႈပၼ် 10 သႅၼ် ပီၵၢႆၼႆႉ ပီၼႆႉပဵၼ်ၵႂႃႇ 15-16 သႅၼ်ယဝ်ႉ။ ၵူၼ်းမိူင်းတႄႉ တုၵ်ႉၶၶႃႈဢေႃႈ ၵၢၼ်ငၢၼ်းၵေႃႈ ဢမ်ႇပဵၼ် ၶွၼ်ႇသမ်ႉ ၵဵပ်းၶိုၼ်ႈထႅင်ႈ ၸိူင်ႉၼႆ ပဵၼ်ဢၼ်ယၢပ်ႇ ၽိုတ်ႇႁႅင်းၶႃႈ”- ဝႃႈၼႆ။

လွင်ႈၼႆႉ သိုၵ်း TNLA ယၢမ်ႈလၢတ်ႈတီႈၽူႈတွႆႇႁွၵ်ႈဝႃႈ- ၼႂ်းပေႃႇလသီႇတိုၼ်းမီးဝႆႉယဝ်ႉလႄႈ ၼႂ်းၼႃႈတီႈ TNLA တူင်ႉၼိုင်ၵုမ်းၵမ်ၼၼ်ႉ တေၵဵပ်းၶွၼ်ႇမူတ်း။ လွင်ႈၵဵပ်းၶွၼ်ႇၼႆႉ ႁၢၼ်ႉလႂ် ႁိူၼ်းလႂ်ထုၵ်ႇလီၵဵပ်းၵႃႈႁိုဝ်ၼႆၼၼ်ႉ ယူႇတီႈၽူႈမီးပုၼ်ႈၽွၼ်းၾၢႆႇၵဵပ်းၶွၼ်ႇ ၸတ်းၵၢၼ်သေ ၵဵပ်းၵႂႃႇၵူၺ်း။ ငဝ်းငုၼ်းဢမ်ႇလႆႈၵုမ်းၵႅဝ်ၸွမ်း ဝႃႈၼႆဝႆႉ။

ၾၢႆႇၼိုင်ႈသင်ဝႃႈ ၸဝ်ႈရူတ်ႉ၊ ၸဝ်ႈၵႃး၊ ၸဝ်ႈႁိူၼ်း၊ ၸဝ်ႉႁၢၼ်ႉ လႆႈလိၵ်ႈသူင်ႇထိုင်တႃႇသႂ်ႇၶွၼ်ႇယဝ်ႉသေ ဢမ်ႇၵႂႃႇသႂ်ႇၶွၼ်ႇပၼ်/ၵႂႃႇသႂ်ႇတူၵ်းလိုၼ်းၸိုင် မီးၸုမ်းသိုၵ်း ယိပ်းၵွင်ႈၸေးမိုဝ်း မႃးဢဝ်ထိုင်ႁိူၼ်း၊ ၵူၼ်းမိူင်းတုၵ်ႉၶလိူဝ်ၸႂ် ဢမ်ႇၸၢင်ႈၵႂႃႇလၢတ်ႈၵႂႃႇတိူင်ႇတီႈလႂ် ဝႃႈၼႆ။

“ပေႃးၼၢၼ်းၵပ်းၾူၼ်းၸူးၶဝ်ၼႆ ၶဝ်ယိင်ႈၶႅၼ်းၵဵပ်းၶိုၼ်ႈထႅင်ႈ  ။ ၶဝ်ပၢႆဝႃႈ သူလူလၢႆႁဝ်းႁႃႉ၊  ဢမ်ႇသၢင်းၵိၼ်ႁဝ်းႁႃႉ ႁဵတ်းၼႆဢေႃႈ။ ႁၢၼ်ႉၶၢႆ ၶူဝ်းၼႆႉ ဢမ်ႇဝႃႈ ၸွၵ်ႉလႂ် ၸဵင်ႇလႂ် ႁၢၼ်ႉလဵၵ်ႉ ႁၢၼ်ႉယႂ်ႇ ၵဵပ်းၵူႈႁၢၼ်ႉ ဢမ်ႇဝႆႉၵိုတ်းသေတီႈ ၶဝ်သွၵ်ႈတဝ်ၵဵပ်းၼႆႉ။ တေႃႈၼင်ႇ ဢမ်ႇၸႂ်ႈႁၢၼ်ႉၶၢႆ ပိူၼ်ႈပေႃႉၵိၼ်မၢၵ်ႇဢုတ်ႇၶၢႆၵူၺ်း ယင်းၵႂႃႇၵဵပ်းပႃးၶႃႈဢေႃႈ။ ပီၼႆႉ တီႈဢေႇသုတ်းမၼ်း ၶဝ်ၵဵပ်း 4 သႅၼ်ၶႃႈ။ သိုၵ်းၶၢင်ၵေႃႈ ၵဵပ်းႁႅင်းၼႃႇၶႃႈ ၵူၺ်းၵႃႈ ၶဝ်ႁႃၵဵပ်းၸွမ်းႁၢၼ်ႉယႂ်ႇလူင် ၸိူဝ်းၼၼ်ႉၵူၺ်း ႁၢၼ်ႉလဵၵ်ႉဢွၼ်ႇတႄႉ ၶဝ်ဢမ်ႇၵဵပ်း”- ၵူၼ်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇၸူး ၽူႈၶၢၼ်ပၢၵ်ႇ တပ်ႉသိုၵ်းၶၢင် KIA ။ မၼ်းၸၢႆးလၢတ်ႈဝႃႈ တီႈဢၼ်သိုၵ်းၶၢင်ႁၼ်ထိုင်ဝႃႈထုၵ်ႇလႆႈၵဵပ်းၼၼ်ႉ တိုၼ်းတေၵဵပ်းဝႃႈၼႆ။

“တီႈဢၼ်သိုၵ်းၶၢင်ႁၼ်ထိုင်ဝႃႈ ထုၵ်ႇလႆႈၵဵပ်းၶွၼ်ႇၼႆၼၼ်ႉ တိုၼ်းတေၵဵပ်းၵႂႃႇတိၵ်းတိၵ်းၶႃႈ။ ၵဵပ်းဢႄႇ ၵဵပ်းၼမ်ၼၼ်ႉတႄႉ ငဝ်ႈငုၼ်းပၼ်ပုၼ်ႈၽွၼ်း ၾၢႆႇၵဵပ်းၶွၼ်ႇ ဝႆႉယဝ်ႉလႄႈ ယူႇတီႈၶဝ်ၸတ်းၵၢၼ်ၵူၺ်း။ပၼ်ၶဝ်တႅပ်းတတ်းႁဵတ်းသၢင်ႈၵႂႃႇ။ ၵွပ်ႈၼႆ ၵူၼ်းမိူင်း မီးပုၼ်ႈၽွၼ်းလူဝ်ႇလႆႈသႂ်ႇၵေႃႈ တိုၼ်းတေလႆႈႁႃမႃးသႂ်ႇပၼ် ၼၼ်ႉၵူၺ်း ”- ဝႃႈၼႆ။

လိူဝ်ၼၼ်ႉ တီႈၸႄႈဝဵင်းၵူတ်ႉၶၢႆၵေႃႈ သိုၵ်းတဢၢင်း TNLA  ၵဵပ်းၶွၼ်ႇႁၢဝ်ႈႁႅင်း မိူၼ်ၵၼ် ႁၢၼ်ႉၶၢႆၶူဝ်းၼုင်ႈတၢင်းဝႆၵေႃႈဢမ်ႇဝႆႉ ရူတ်ႉၵႃးတၢင်ႇၵူၼ်းလႅၼ်ႈႁူဝ်ဝဵင်းႁၢင်ဝဵင်းၵေႃႈဢမ်ႇၵိုတ်း ၸွမ်းၵဵပ်းမူတ်းဝႃႈၼႆ။

ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ၶဝ်ၵဵပ်းႁႅင်းၼႃႇၶႃႈ ၸွမ်းၼင်ႇ တီႈႁဝ်းၶႃႈ လႆႈႁူႉတႄႉ ၼိုင်ႈႁၢၼ်ႉလႂ် လႆႈသႂ်ႇပၼ် 3 သႅၼ် ၶိုၼ်ႈၼိူဝ်။ ၶဝ်ၸႂ်ႉၵႂႃႇသႂ်ႇ တီႈတၢင်းၵႃလႅင်ပုၼ်ႉ။ ၸဵမ်ႁၢၼ်ႉယႂ်ႇ ႁၢၼ်ႉလဵၵ်ႉ ပႃးၸဵမ်လႅင်းၵႃး ၸိူဝ်းၼႆႉ လႆႈၵႂႃႇသႂ်ႇမူတ်းၶႃႈ”- ဝႃႈၼႆ။

ၼွၵ်ႈလိူဝ်ၼၼ်ႉ ၸဝ်ႈၵႃး ဢၼ်လႅၼ်ႈ တၢင်းလႃႈသဵဝ်ႈ – မူႇၸေႊ  ၵေႃႈ ၸဝ်ႈၵႃး  ၵႆႉၺႃးႁႄႉၵိုတ်းသေ ၵဵပ်းၶွၼ်ႇၵမ်းသိုဝ်ႈ။   ၵႃးဢွၼ်ႇ 1 လမ်း 3 မိုၼ်ႇ ထိုင် 1 သႅၼ်ပျႃး။ ပေႃးပဵၼ်ၵႃး 10 လေႃႉ ၶိုၼ်ႈၼိူဝ် ၸိူဝ်းၼႆႉသမ်ႉ ၵဵပ်းငိုၼ်းၼပ်ႉႁူဝ်သႅၼ်ၶိုၼ်ႈ  ။