ၸိုင်ႈတႆးပွတ်းၸၢၼ်း ၸႄႈဝဵင်းၾၢႆၶုၼ်ၼၼ်ႉ ၸုမ်းသိုၵ်းမၢၼ်ႈ ယိုတ်းမိူင်း ပွႆႇမၢၵ်ႇလူင် (ယိုဝ်းၵွင်ႈလူင်) ၵႂႃႇ တူၵ်းသႂ်ႇ ၼႂ်းဝၢၼ်ႈၼႂ်းသူၼ်၊ ႁဵၼ်းႁႂ်ႈၵူၼ်းဝၢၼ်ႈ ၵူၼ်းပၢႆႈၽေးသိုၵ်း ဢွၼ်ၵၼ်ပၢႆႈထႅင်ႈ။
မိူဝ်ႈဝၼ်းတီႈ 29/5/2022 ယၢမ်းၵၢင်ၼႂ် ၸုမ်းသိုၵ်းမၢၼ်ႈ ယိုတ်းဢႃႇၼႃႇ ယူႇတီႈၼိူဝ်လွႆၵူး (လွယ်ကူးတောင်ပေါ်) သေ ပွႆႇမၢၵ်ႇလူင်သႂ်ႇၼႂ်းဝၢၼ်ႈၽြႃးလွႆ (လွယ်ပန်းစုံကျေးရွာ) တင်း ဝၢၼ်ႈလွႆပဝ်း(လွယ်ပေါ) ၸႄႈဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းဢမ်ႇယွမ်း 10 လုၵ်ႈ။
ၵူၼ်းသိုၵ်းၸုမ်း PDF ၾၢႆၶုၼ် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းတႄႉ ယဵၼ်ဝႆႉယူႇဢေႃႈ။ သိုၵ်းမၢၼ်ႈ ယူႇတီႈလွႆၵူးၼၼ်ႉသေ လမ်းလိမ်းယိုဝ်းၵွင်ႈလူင်သႂ်ႇ ၼႂ်းဝၢၼ်ႈၽြႃးလွႆလႄႈ ဝၢၼ်ႈလွႆပဝ်း ဢမ်ႇယွမ်း 10 လုၵ်ႈၶႃႈ လွင်ႈတုမ်ႉတိူဝ်ႉ ၵူၼ်းမိူင်း မၢတ်ႇၸဵပ်းလူႉတၢႆတႄႉ ဢမ်ႇမီး၊ ၵူၺ်းၵႃႈ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ်ၼၼ်ႉၶႃႈၼႃႇ”- ဝႃႈၼႆ။
ဝၢၼ်ႈၽြႃးလွႆၼႆႉ တင်းမူတ်း မီးလင်ႁိူၼ်း 60 လင်ပၢႆ။ ယင်းမီးၵူၼ်းပၢႆႈၽေးသိုၵ်း တၢင်ႇဝၢၼ်ႈပၢႆႈမႃးသွၼ်ႈယူႇ ၸွမ်းထႅင်ႈၵေႃႈမီးတင်းၼမ်။
“ဝၢႆးသေ ၶဝ်ယိုဝ်း ၵွင်ႈလူင်တူၵ်းသႂ်ႇၼႆႉ ၸဵမ်ၵူၼ်းဝၢၼ်ႈလႄႈ ၵူၼ်းပၢႆႈၽေးသိုၵ်း ဢွၼ်ၵၼ်ပၢႆႈဢွၵ်ႇဝၢၼ်ႈၶႃႈဢေႃႈ။ တေႃႈလဵဝ် မီးၵူၼ်းပႂ်ႉႁိူၼ်းယေးဝႆႉၵမ်ႈၽွင်ႈၵူၺ်း” – ၽူႈမီးၸၼ်ႉ ၼႂ်း PDF သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 17/3/2022 ၼၼ်ႉ သိုၵ်းမၢၼ်ႈ တပ်ႉၸၵၶ 7 ဢဝ်မၢၵ်ႇလူင် 120 မမ ယိုဝ်းသႂ်ႇၼႂ်း ဝၢၼ်ႈၽြႃးလွႆၼႆႉ ပွၵ်ႈၼိုင်ႈ။ မၢၵ်ႇလူင်ၼၼ်ႉ တူၵ်းသႂ်ႇႁိူၼ်းယေးၵူၼ်းဝၢၼ်ႈ၊ ဝတ်ႉဝႃးၽႃသိူဝ်ႇလႄႈ ႁူင်းႁဵၼ်း ၸိူဝ်းၼႆႉ လူႉၵွႆတင်းၼမ်။ ၵူၼ်းပၢႆႈၽေးသိုၵ်း လႆႈမၢတ်ႇၸဵပ်းၸွမ်း 2 ၵေႃႉ။
ဝၢၼ်ႈၽြႃးလွႆၼႆႉ ပဵၼ်ဝၢၼ်ႈဢၼ်ယူႇဝႆႉၼႂ်းၵုၼ်ၼွင်ႁၢႆးယႃဝၢၼ်ႈၼိုင်ႈ သဵၼ်ႈတၢင်းၶဝ်ႈဢွၵ်ႇၵႂႃႇမႃးယၢပ်ႇ။ ၵမ်ႈၼမ် ၸႂ်ႉတၢင်းၼမ်ႉ တၢင်းႁိူဝ်း ၵႂႃႇမႃးၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ