ၸုမ်းသိုၵ်း/ပျီႇတူႉၸိတ်ႉ PNO ႁွၼ်ႇထဝ်ႇ ၼႂ်းၸႄႈဝဵင်းတူၼ်ႈတီး ၊ ႁူဝ်ပူင်း၊ သီႇသႅင်ႇ၊ ပၢင်လွင်း ၸိူဝ်းၼႆႉသေ ၶၢၼ်းငိုၼ်း၊ ၶၢၼ်းၵူၼ်းသိုၵ်းမႂ်ႇ ထပ်းၵၼ်မႃး ၶိူဝ်းယႂ်း။
ၼႂ်းၸႄႈဝဵင်းတူၼ်ႈတီး တၢင်းထုင်ႉဢိူင်ႇ ၼမ်ႉသီး၊ ၼွင်ၵႃး၊ တၢင်းၸႄႈဝဵင်းႁူဝ်ပူင်းသမ်ႉ တၢင်းပွတ်း ထုင်ႉၼမ်ႉၶူၵ်ႉ ၼွင်မွၼ် တၢင်းပွတ်းသီႇသႅင်ႇ သမ်ႉ ၼႂ်းထုင်ႉသၢႆးၶၢဝ် ထုင်ႉပူင်း ပႃးၸဵမ် တၢင်းၼႂ်း ၸႄႈဝဵင်း ပၢင်လွင်း ၸိူဝ်းၼႆႉ ၸုမ်းသိုၵ်း ပျီႇတူႉၸိတ်ႉ ပဢူဝ်း PNO/PNA ႁွၼ်ႈထဝ်ႇ ၶၢၼ်းငိုၼ်း ၶၢၼ်းၵူၼ်းသိုၵ်းမႂ်ႇ တင်ႈတႄႇဢဝ် ႁၢင်လိူၼ်မေႊ 2022 ၼႆႉမႃး တေႃႇယၢမ်းလဵဝ်။
ၵူၼ်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “တႄႇဝူင်ႈပူၼ်ႉမႃးတေႃႇယၢမ်းလဵဝ် ၸုမ်းပျီႇတူႉၸိတ်ႉ PNO ၵဵပ်းငိုၼ်း/ သဵၼ်ႈမၢႆသိုၵ်း တီႈ 4 လၵ်းလႄႈ 6 လၵ်းၶႃႈ ဢေႃႈ။ ၵဵပ်းပႃးငိုၼ်း တႃႇၾိုၵ်းသိုၵ်းၶဝ်၊ တႃႇငိုၼ်း ၵွင်ၵၢင်ႇ ၼႂ်းႁူင်းၾိုၵ်းသွၼ်၊ တႃႇၵမ်ႉၸွႆႈၼႂ်းႁူင်းႁဵၼ်းၸိူဝ်းၼႆႉဢေႃႈ၊ တေႃႈလဵဝ်ၵေႃႈ တိုၵ်ႉၶိုၼ်ႈႁိူၼ်း လူင်းႁိူၼ်း၊ ၵႂႃႇဝၢၼ်ႈ႞ ယဝ်ႉဝၢၼ်ႈၼိုင်ႈသေ ထတ်းထွင် ၶၢၼ်းငိုၼ်း ၶၢၼ်းၵူၼ်းဝႆႉယူႇၶႃႈ” – ဝႃႈၼႆ။
ၼွၵ်ႈလိူဝ်ၼၼ်ႉ တီႈ 4 လၵ်း ဝၢၼ်ႈမႆႉတွင်း ၊ ႁိမ်းႁွမ်း ထၢတ်ႈ(ၵွင်းမူး) ၽြႃးၵဝ်ႈသူႇ ဢၼ်မီးၼႂ်းၵႄႈ ႁူဝ်ပူင်း – တူၼ်ႈတီး ၸိူဝ်းၼၼ်ႉၵေႃႈ PNO လူင်းပိုၼ်ႉတီႈ ၵဵပ်းသဵၼ်ႈမၢႆသိုၵ်း၊ တူၺ်းၵူၼ်း မႃႇၶႅင်ႁႅင်းၵိုၼ်း သႅၼ်းဢႃႇယု ၼႂ်းၵႄႈ 18- 50 ပီ ဝႃႈၼႆ။
ၵူၼ်းၼုမ်ႇတႆး ၼႂ်းၸႄႈဝဵင်းသီႇသႅင်ႇ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ- “ၼိုင်ႈႁိူၼ်း ၶၢၼ်းငိုၼ်း သၢမ်မိုၼ်ႇ၊ ထတ်းပႃး သၢႆမၢႆ ၵူၼ်းၼုမ်ႇ ပေႃးၼႂ်း ႁိူၼ်း မီးၵူၼ်းၸၢႆး 2 ၵေႃႉ ၵေႃႈ တဵၵ်းႁႂ်ႈသူင်ႇပၼ် 1 ၵေႃႉဢေႃႈ။ တေႃႈလဵဝ် ဢွၼ်ၵၼ်ပၢႆႈဢေႃႈ ”- ဝႃႈၼႆ ။
ၸွမ်းၼင်ႇပိူင်ငဝ်ႈပိုင်းမိူင်း (လၵ်းမိူင်း) 2008 ဢၼ်ၸုမ်းသိုၵ်းမၢၼ်ႈယိုတ်းဢႃႇ ၼႃႇ (ပၢၼ်တၢၼ်းသူၺ်ႇ) ဢဝ်ၶၢဝ်းယၢမ်း 14 ပီ သေတိုတ်ႉတႅမ်ႈဝႆႉၼၼ်ႉ တတ်းဢဝ် မိူင်းတႆးပွတ်းၸၢၼ်း ၼႂ်းၸႄႈတွၼ်ႈ တူၼ်ႈ တီး ၸႄႈဝဵင်းသီႇသႅင်ႇ၊ ႁူဝ်ပူင်း တင်း ၸႄႈဝဵင်းပၢင်လွင်းသေ ႁႂ်ႈပဵၼ်ၼႃႈလိၼ်ၽွင်းငမ်းတူဝ်ၵဝ်ႇ ၸၢဝ်းပဢူဝ်း။
ၵူၼ်းၼုမ်ႇ သႅၼ်းႁူႉလိၵ်ႈလၢႆး ၵေႃႉၼိုင်ႈတႄႉလၢတ်ႈဝႃႈ လႆႈၼႃႈလိၼ်ၽွင်းငမ်းတူဝ်ၵဝ်ႇၵေႃႈ ဢမ်ႇလၢၵ်ႇလၢႆးသင် တွၼ်ႈတႃႇၵူၼ်းၶိူဝ်းပဢူဝ်း။ ဢၼ်ၵိၼ်ၸိၵ်း တွၵ်ႇၸွၵ်းၵူၼ်းမိူင်းၵေႃႈ ပဵၼ်ၸုမ်းပျီႇတူႉၸိတ်ႉ PNO/PNA တင်း ၸုမ်းသိုၵ်းမၢၼ်ႈယိုတ်းမိူင်းၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ