သိုၵ်းမၢၼ်ႈ တင်း PNO ႁူမ်ႈၵၼ် ႁွၼ်ႈထဝ်ႇ သွၵ်ႈတဝ်ယႃႉဢဝ် ၶူဝ်းၶွင်ၼႂ်းႁိူၼ်း ၵူၼ်းဝၢၼ်ႈ ၵူၼ်းမိူင်း ၼႂ်းၸႄႈ ဝဵင်းၾၢႆၶုၼ် သေဢမ်ႇၵႃး ၽဝ်ပႃးႁိူၼ်းယေးၵူၼ်းဝၢၼ်ႈ ဢမ်ႇယွမ်း 50 လင်။
ႁၢင်လိူၼ်မေႊ 2022 (လိူၼ်ၼႆႉမႃး) ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတူႉၸိတ်ႉ ပဢူဝ်း PNO ႁူမ်ႈၵၼ်သေ သွၵ်ႈတဝ်ယႃႉဢဝ် ၶူဝ်းၶွင် ၵူၼ်းဝၢၼ်ႈလွႆပဝ်း၊ ဝၢၼ်ႈၼမ်ႉသူမ်ႈ၊ ဝၢၼ်ႈမၢၵ်ႇၶိူဝ်ၶမ်း၊ ဝၢၼ်ႈၼမ်ႉမေႃႇ လူင်လႄႈ ဝၢၼ်ႈလႃႈႁႄ ၼႂ်းဢိူင်ႇလွႆပဝ်း ၸႄႈဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။
ၵူၼ်းၼႂ်းဢိူင်ႇလွႆပဝ်း လၢတ်ႈတီႈၽူႈတွႆႇႁွၵ်ႈဝႃႈ – “ပေႃးပဵၼ်ႁိူၼ်းလီတႄႉ ၶဝ်ယႃႉၵွႆသေ သွၵ်ႈဢဝ်ၶူဝ်းၶွင် ၵႂႃႇမူတ်း။ ပေႃးပဵၼ်ႁိူၼ်းမုင်းၶႃး ၵင်ႈၽႃသမ်ႉ ယင်းၸုတ်ႇၽဝ်ပႅတ်ႈ လူးၵွၼ်ႇဢေႃႈ။ ၶူဝ်းၼႂ်းႁိူၼ်းတႄႉ ၶဝ်ဢဝ်ႇၵႂႃႇ TV၊ မေႃႈ ၾႆး (ပႅတ်ႇထီႇ) ၶႅပ်းၾႆးသႅင်လႅတ်ႇ၊ ၽိူၼ်ၵိၼ်ၶဝ်ႈ၊ တူႈၶူဝ်း(တိူၵ်ႈ/တူႈ/ပီႇတူဝ်ႇ)၊ ၽႃႈႁူမ်ႈၶူဝ်းၼွၼ်း၊ ရူတ်ႉၶိူင်ႈ၊ ၸၢၵ်ႈထႆၼႃး၊ ပူင်းသိတ်ႇယႃ၊ ၵူႇၼွၼ်း လႄႈ မေႃႈဝၢၼ်ႇၵေႃႈ ဢဝ်ပႃး”- ဝႃႈၼႆ။
ၶူဝ်းၶွင် ဢၼ်ၸုမ်းသိုၵ်းမၢၼ်ႈ တင်း ပီႇတူႉၸိတ်ႉ PNO ဢဝ်ၵႂႃႇ ပဵၼ်ၶူဝ်းဢၼ်မီးၵႃႈၶၼ် – မိူၼ်ႇ ၼမ်ႉမၼ်း ၶိူင်ႈၸၢၵ်ႈ၊ ၸၢၵ်ႈယဵပ်ႉၶူဝ်း၊ ၸၢၵ်ႈထႆႁႆႈ/ ထႆသူၼ် ထူဝ်ႈလႃႈၵျီႈ ပႃးၸဵမ် ၽၵ်း လႄႈ မၢၵ်ႇၶဝ်ႈတဝ်ႈၼမ်ႉၼႂ်းသူၼ်ၼႂ်းႁႆႈ ၸိူဝ်းၼႆႉ တဵၵ်းဢဝ် ၶၢၼ်းဢဝ် ဢထမ်ႇမ ဢဝ်ၵႂႃႇ ၸိူဝ်းၼႆႉ။
ၸႄႈဝဵင်းၾၢႆၶုၼ်ၼႆႉ ဢမ်ႇၶဝ်ႈပႃးၼႂ်းၼႃႈလိၼ်ၽွင်းငမ်းတူဝ်ႇၵဝ်ႇ ပဢူဝ်း ( 3 ၸႄႈဝဵင်း – ႁူဝ်ပူင်း၊ ပၢင်လွင်း၊ သီႇသႅင်ႇ)။ ၵူၺ်းၵႃႈ ၸုမ်းသိုၵ်းမၢၼ်ႈဝႃႈ ၼႂ်းပိုၼ်ႉတီႈၼႆႉ မီးၼႅဝ်းႁူမ်ႈ သိုၵ်းၵႅတ်ႇၶႄၵူၼ်းမိူင်း PDF ၼႆသေ ႁွၼ်ႈထဝ်ႇသွၵ်ႈတဝ် တီႉၺွပ်းဢဝ်ၵူၼ်းဝၢၼ်ႈၵူၼ်းမိူင်းလႄႈ ႁဵတ်းႁႂ်ႈၵူၼ်းမိူင်း ပၢႆႈဢွၵ်ႇဝၢၼ်ႈ ဢွၵ်ႇဝဵင်း။ မၢင်ၸိူဝ်း ပၢႆႈထိုင်မိူင်းထႆးၵေႃႈ မီးၼမ်။
 ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတူႉၸိတ်ႉ ပဢူဝ်း PNO ႁူမ်ႈၵၼ်သေ သွၵ်ႈတဝ်ယႃႉဢဝ် ၶူဝ်းၶွင် ၵူၼ်းဝၢၼ်ႈလွႆပဝ်း၊ ဝၢၼ်ႈၼမ်ႉသူမ်ႈ၊ ဝၢၼ်ႈမၢၵ်ႇၶိူဝ်ၶမ်း၊ ဝၢၼ်ႈၼမ်ႉမေႃႇ လူင်လႄႈ ဝၢၼ်ႈလႃႈႁႄ ၼႂ်းဢိူင်ႇလွႆပဝ်း ၸႄႈဝဵင်းၾၢႆၶုၼ် ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။){kind=link}